U Jeŭraparłamiencie zapatrabavali ad ZŠA viarnuć Francyi statuju Svabody

Deputat Jeŭraparłamienta Rafael Hluksman zapatrabavaŭ ad uład ZŠA viarnuć Francyi statuju Svabody. Biahučaja administracyja i prezident ZŠA pakazvajuć svaimi rašeńniami, što kaštoŭnaści svabody im nie blizkija, vynikaje z pramovy Hluksman, piša DW.

U svajoj pramovie Hluksman aktyŭna asudziŭ Vašynhton za zbližeńnie z Maskvoj. Pavodle jaho słoŭ, ZŠA «vyrašyli stać na bok tyranaŭ». Akramia taho, francuzski palityk raskrytykavaŭ administracyju Donalda Trampa za zvalnieńnie navukoŭcaŭ, jakija nastojvali na svajoj navukovaj svabodzie.

U suviazi z hetym jeŭradeputat zaklikaŭ ZŠA viarnuć statuju Svabody. «My padaryli jaje vam, ale, zdajecca, vy joju pahardžajecie», — skazaŭ jon, źviartajučysia da amierykancaŭ.

Statuja Svabody była stvorana ŭ Francyi pad kiraŭnictvam skulptara Ahiusta Bartoldzi. Jana stała padarunkam ZŠA ad Francyi ŭ honar stahodździa Vajny za niezaležnaść ZŠA, u jakoj francuzy padtrymali amierykancaŭ.

Miednaja statuja vyšynioj 46 mietraŭ była adkryta ŭ 1886 hodzie na Vostravie Svabody ŭ Ńju-Jorku. Dla miljonaŭ mihrantaŭ, jakija kaliści čakali dazvołu na ŭjezd u ZŠA na susiednim vostravie Elis-Ajłend, jana simvalizavała nadzieju na lepšaje žyćcio.

«Pierapisvańnie» histaryčnych rašeńniaŭ — u duchu novych uład ZŠA

Pra surjoznaść adozvy Hluksmana havaryć nie davodzicca, adnak jana šmat u čym adpaviadaje papulisckaj palitycy samoha Trampa.

Dziejučy prezident ZŠA jašče da svajoj inaŭhuracyi abiacaŭ pierajmienavać pik Denali na Alascy ŭ pik Mak-Kinli. Pieršy varyjant nazvy — aryhinalny, jon raspaŭsiudžany siarod karennych žycharoŭ Alaski. U Rasijskaj impieryi, jakaja ŭ svoj čas kałanizavała rehijon, u chodzie była nazva pika ź miascovych moŭ, adnak u 1896 hodzie, kali Alasku kałanizavali ZŠA, hara była pierajmienavana ŭ pik Mak-Kinli. U 2015 hodzie histaryčnuju nazvu rasparadziŭsia viarnuć Barak Abama, jaki byŭ na toj momant prezidentam ZŠA.

Vialikim kurjozam stała anałahičnaje žadańnie Trampa «amierykanizavać» Mieksikanski zaliŭ. U pieršyja ž dni paśla inaŭhuracyi Tramp rasparadziŭsia pierajmienavać zaliŭ, jaki nasiŭ raniejšuju nazvu z momantu adkryćcia, u «Amierykanski». 

Razam z tym Tramp pravodzić i bolš hrubyja sproby «adkatu» histaryčnych rašeńniaŭ — jon pahražaje viarnuć pad kantrol ZŠA Panamski kanał, pieradadzieny ŭ karystańnie łacinaamierykanskaj dziaržavie pavodle damoŭlenaściej dźviuch krain ad 1977 hoda. Prezident ZŠA nie vyklučyŭ i mahčymaści siłavoha zachopu kanała, što prymusiła Panamu źviarnucca ŭ AAN.

• 21
• 0
• 2
• 3
• 0
• 0
• 0
• 0