U noč na subotu siamja prasłaŭlenaha baksiora Džordža Formana paviedamiła pra jahonuju śmierć va ŭzroście 76 hadoŭ.
Džordž Forman — uradženiec Techasa. Jon atrymaŭ pieramohu na Alimpijadzie 1968 hoda, a paśla pačaŭ karjeru ŭ prafiesijnym boksie, dzie dasiahnuŭ vialikich pośpiechaŭ. U pryvatnaści, z 1973 pa 1974 hod byŭ absalutnym čempijonam śvietu.
U 1974 hodzie Forman prajhraŭ boj Machamiedu Ali ŭ Kinšasie (tady Zair, a ciapier Demakratyčnaja Respublika Konha). Boj uvajšoŭ u historyju pad nazvaj «hrukat u džunhlach». Vynik pajadynku staŭ niečakanaściu, pakolki favarytam ličyŭsia mienavita Forman.
U 1977 hodzie Forman pakinuŭ boks, staŭ chryścijanskim prapaviednikam, dapamahaŭ moładzi. Ale ŭ 1987 hodzie jon viarnuŭsia i vystupaŭ jašče niekalki hadoŭ.
U 1991 hodzie jon prajhraŭ absalutnamu čempijonu śvietu Evanderu Cholifiłdu, ale pry hetym 42-hadovy Forman ździviŭ mnohich ekśpiertaŭ tym, što zmoh dać kankurentny boj małodšamu supierniku.
U 1994 hodzie va ŭzroście 45 hadoŭ Forman staŭ čempijonam śvietu pa viersijach WBA i IBF, atrymaŭšy pieramohu nad Majkłam Mureram. Prajhrajučy boj, jon zmoh adpravić Murera ŭ nakaŭt u kancy pajadynku.
Forman dahetul ličycca samym starym čempijonam śvietu pa boksie ŭ historyi ŭ ciažkaj vazie.
Jon zdoleŭ atrymać pośpiech i pa-za rynham. U pryvatnaści, Forman zrabiŭ sabie imia ŭ biznesie: jon stvaryŭ kampaniju pa vytvorčaści elektrahrylaŭ, jakija stali papularnymi. Amierykanskija ŚMI adznačyli, što hety biznes, vierahodna, prynios Formanu bolš hrošaj, čym usie jahonyja pieramohi na prafiesijnym rynhu.
Ciapier čytajuć
Hetaja biełaruskaja instazorka dajšła da Playboy — ale, u adroźnieńnie ad mnohich, nie spyniłasia5
Kamientary