U šaści haradach Biełarusi pačałasia epidemija reśpiratornych infiekcyj. A jakaja situacyja ŭ cełym?

Kolki čałaviek zachvareła?

Dakumient padrychtavany śpiecyjalistami «Respublikanskaha centra hihijeny, epidemijałohii i hramadskaha zdaroŭja» i adrasavany Ministerstvu achovy zdaroŭja. U spravazdačy — danyja ab zachvorvańni na 11-m kalandarnym tydni 2025 hoda (heta značyć z 10 pa 16 sakavika) i situacyja, aktualnaja na 17 sakavika 2025 hoda.

Śpiecyjalisty padličyli, kolki było vypadkaŭ vostrych reśpiratornych infiekcyj u 18 samych bujnych haradach Biełarusi (hetyja harady nazyvajuć «kantrolnymi») u hety pieryjad.

Za tydzień epidemijołahi zarehistravali 78 167 takich vypadkaŭ.

Šmat heta ci mała? Padchapili virusy ci bakteryi značna bolš ludziej, čym na anałahičnym tydni hod tamu (+35,8%). Ale letašni epidemičny siezon u cełym adroźnivaŭsia ad ciapierašniaha. Tady pik jahonaj samaj prykmietnaj chvali prypaŭ na studzień, a ŭ sakaviku ŭžo možna było kazać pra palahčeńnie situacyi. U hetym ža siezonie zachvorvańnie pastupova raście z pačatku hoda.

Pavialičyć

Epidemijołahi dadatkova paličyli ŭ siami bujnych haradach tych, u kaho byli bolš surjoznyja simptomy:

• 19 čałaviek, u tym liku 11 dziaciej, źviarnulisia pa dapamohu z «hrypapadobnym zachvorvańniem». Siarod jaho simptomaŭ — tempieratura bolšaja za 38°C, kašal abo bol u horle i adsutnaść inšych simptomaŭ, jakija patrabujuć špitalizacyi;
• 12 čałaviek, u tym liku 5 dziaciej, trapili ŭ balnicy z «ciažkaj vostraj reśpiratornaj infiekcyjaj». Jaje prykmiety — tempieratura vyšejšaja za 38°C, kašal abo bol u horle i dychavica abo abciažaranaje dychańnie, jakija pryvodziać da špitalizacyi.

U šaści haradach — epidemija

Ci možna kazać pra epidemiju? U śpiecyjalistaŭ jość kankretnaja ličba, jakuju jany ličać epidemičnym uzroŭniem. Hetaja miaža dla reśpiratornych infiekcyj — 1632,22 vypadki na 100 tysiač čałaviek.

Na momant składańnia dakumienta zachvorvańnie ŭ 18 najbujniejšych haradach była nižejšaje za «epidemičny ŭzrovień» i składała 1464,77 vypadku na 100 tysiač. Heta značyć, pa ŭsioj krainie epidemii niama.

Adnak u šaści haradach epidemičny paroh byŭ pieravyšany. Heta Viciebsk, Barysaŭ, Babrujsk, Połack, Navapołack i Hrodna. Pra epidemiju taksama možna było havaryć u dźviuch abłaściach — Viciebskaj i Minskaj.

A voś u Homielskaj i Bresckaj na momant składańnia spravazdačy chvareli krychu mienš, čym u inšych rehijonach. U siaredzinie sakavika ŭ Bresckaj vobłaści zachvorvańnie i zusim pajšło na spad, u adroźnieńnie ad astatniaj Biełarusi.

Bolšaść chvorych — dzieci

Hetaj viasnoj dzieci chvarejuć čaściej, čym darosłyja. Pacyjentaŭ, małodšych za 18 hadoŭ, u cełym bolš pa krainie, u niekalki razoŭ vyšej, čym paŭnaletnich.

Samaja vysokaja dziciačaja zachvorvalnaść — u Minsku. Za tydzień z 10 pa 16 sakavika 2025 hoda hety pakazčyk dasiahnuŭ 5110,12 vypadku na 100 tysiač čałaviek (+16% da minułaha tydnia). Heta značyć, za siem dzion zachvareli 5,1% usich dziaciej, uličanych staličnaj sistemaj achovy zdaroŭja.

Na što ciapier chvarejuć?

Na momant składańnia dakumienta asnoŭnym reśpiratornym virusam u krainie byŭ hryp. Jaho vyjavili prykładna ŭ 41% usich pravieranych uzoraŭ. Rejtynh «papularnych» štamaŭ ciapier taki:

• virus hrypu typu A (biez udakładnieńnia padtypu);
• virus hrypu A (H1N1) (raniej viadomy jak «śviny hryp»);
• virus hrypu typu B.

Siarod inšych reśpiratornych virusaŭ łabaratoryi čaściej za inšych vyjaŭlali RS-virus i rynavirus. Fiksavalisia adzinkavyja vypadki adenavirusa, bakavirusa, siezonnaha karanavirusa i bakteryi mikapłazmy (Myc. pneumoniae).

Karanavirus SARS-CoV-2 łabaratoryi vyjavili ŭsiaho čatyry razy za tydzień (z bolš jak 800 uzoraŭ). Novy mietapnieŭmavirus «z Kitaja» — usiaho raz. U troch probach vyjavili źmiešanuju infiekcyju, to-bok niekalki ŭzbudžalnikaŭ chvarob adrazu.

Kolkaść pnieŭmanij taksama raście

Za tydzień u Biełarusi zarehistravali 3305 vypadkaŭ pnieŭmanij. 56,4% pacyjentaŭ adpravili na stacyjanarnaje lačeńnie, astatnich — ambułatorna. U 81,4% vypadkaŭ dyjahnaz «pnieŭmanija» staviać na padstavie «klinika-renthienałahičnych danych» — heta značyć biez dadatkovych testaŭ.

Pakazčyk zachvorvalnaści na pnieŭmaniju skłaŭ 36,6 na 100 tysiač nasielnictva. Heta vyšej, čym na minułym tydni i hod tamu, ale značna mienš, čym było viasnoj «kavidnaha» 2021-ha.

Za tydzień pakazčyk vyras amal va ŭsich rehijonach, akramia Minskaj i Mahiloŭskaj abłaściej. Samy prykmietny rost zdaryŭsia ŭ Hrodzienskaj vobłaści — +12,9% da ŭzroŭniu minułaha tydnia.

Pry łabaratornych daśledavańniach u 83,3% vypadkaŭ u pacyjentaŭ vyjaŭlajuć bakteryjalnuju fłoru. Try samyja častyja ŭzbudžalniki, jakija znachodzili va ŭzorach, — klebsijoła pnieŭmanii (Kl. pneumoniae), załacisty stafiłakok (S. aureus), i pnieŭmakok (S. pneumoniae). Tolki ŭ 5,2% vypadkaŭ u daśledavańni vyjavilisia virusy, uklučajučy SARS-CoV-2.

Što raić Ministerstva achovy zdaroŭja?

Ministerstva achovy zdaroŭja apošni raz paviedamlała pra situacyju z reśpiratornymi chvarobami 5 sakavika. Jano nie kazała pra kolkaść pacyjentaŭ i ŭzrovień zachvorvańnia, adnak čynoŭniki padkreślivali, što jon «nižejšy za epidemičny» (biez udakładnieńniaŭ pra situacyju ŭ asobnych haradach i abłaściach).

U viedamstvie adznačyli važnaść vakcynacyi, a taksama pryviali praviły asabistaj hihijeny i «reśpiratornaha etykietu»:

• kašlać i čchać u survetku abo, pry jaje adsutnaści, — u vyhin łokcia;
• čaściej pravietryvać pamiaškańni i pravodzić vilhotnuju ŭborku;
• trymacca zdarovaha ładu žyćcia i fizičnaj aktyŭnaści;
• zabiaśpiečyć racyjanalny režym pracy i adpačynku, zbałansavanaje charčavańnie;
• zachoŭvać sacyjalnuju dystancyju i dystancyjavańnie;
• čaściej byvać na śviežym pavietry i minimizavać naviedvańnie miescaŭ masavaha zboru ludziej.

Taksama ŭ Ministerstvie achovy zdaroŭja nahadali, što pacyjentaŭ z pavyšanaj tempieraturaj i prykmietami reśpiratornaha zachvorvańnia ŭ paliklinikach ciapier prymajuć u śpiecyjalnych «infiekcyjnych kabinietach».

• 0
• 1
• 0
• 1
• 0
• 1
• 0
• 0