«Išła zakryvać balničny». Baćka pra pamierłuju ŭ balnicy ŭ Jelsku 14-hadovuju dačku
U reanimacyi Jelskaj centralnaj rajonnaj balnicy pamierła 14-hadovaja dziaŭčynka. Śledčy kamitet pačaŭ pravierku abstavinaŭ jaje śmierci.
Paviedamleńnie pra trahiedyju pastupiła ŭ rajonny adździeł unutranych spraŭ 17 maja 2025 hoda. Niepaŭnaletniaja 2011 hoda naradžeńnia pamierła ŭ reanimacyjnym adździaleńni balnicy.
— U chodzie pravierki pryznačanyja ŭsie nieabchodnyja ekśpiertyzy, — adznačyli ŭ SK. — Paśla praviadzieńnia pracesualnych dziejańniaŭ i pravieračnych mierapryjemstvaŭ pa dadzienym fakcie budzie dadziena pravavaja acenka, u tym liku dziejańniam asob, što akazvali miedycynskuju dapamohu.
Jak raskazaŭ Onliner baćka dziaŭčynki, da taho jak trapić u balnicu, jana 4 dni była na balničnym — z kašlem i bolami ŭ horle.
U toj dzień (16 maja) jana išła zakryvać balničny, bo adčuvała siabie dobra, tempieratury nie było. Jana navat paśpieła paviedamić kłasnaj kiraŭnicy, što hatovaja viarnucca da zaniatkaŭ.
Dziaŭčynku supravadžała maci, jany razam daviedalisia: treba špitalizavacca, bo ŭ lohkich byli chrypy. Kala 10-j hadziny ranicy padletka nakiravali ŭ balnicu. Pierad afarmleńniem jana zajšła da babuli, kab sabrać rečy. Prykładna da 11-j hadziny dziaŭčynka była ŭ balnicy.
Pa słovach baćki, praź niekalki hadzin (u 13:35) baćkam patelefanavali i paviedamili, što dzicia ŭ komie ŭ reanimacyi.
A 17:30—17:40 pryjechaŭ reanimacyjny aŭtamabil z Mazyra, adnak było pryniata rašeńnie čakać śpiecyjalistaŭ z Homiela — jany pryjechali prykładna ŭ 23:30. Jašče za 2,5 hadziny da hetaha (kala 21:00) baćkoŭ papiaredzili, što treba rychtavacca da najhoršaha: u dziciaci nieadnarazova spyniałasia serca.
A 23:50 baćku paviedamili, što dziaŭčynka pamierła.
Viadoma, što padletak vychoŭvałasia ŭ šmatdzietnaj siamji — u jaje zastalisia try siastry i dva braty. Pamierłaja dziaŭčynka była druhoj pa staršynstvie. Jana vučyłasia ŭ siomym kłasie. Pa słovach baćki, dačka zachaplałasia sportam — zajmałasia bieham. U budučyni chacieła stać nastaŭnicaj i maryła navučycca jeździć na matacykle.
Ciapier čytajuć
Biznesmien, biełaruska sa Šviecyi, chłopiec, asudžany za čat na piaciarych. Kaho jašče vyzvalili i vyvieźli ŭ Vilniu razam ź Siarhiejem Cichanoŭskim1212
Kamientary
Chitraść i biezadkaznaść - radnia.
U chvackija 90-je biezadkaznych i chitrych lekaraŭ karali prama ŭ ich kabiniecie, ale ich niepieramahčy, ich lehijon, sitavina takaja.
Mnohija z tych, jak bačać mianie - pierabiahajuć na inšy bok darohi, pamiatajuć. Choć pry sustrečy rastapyrvali palcy - u mianie vyšejšaja katehoryja, vučonaja stupień, vialiki vopyt. U mianie taksama miedycynskaja adukacyja i dośvied vialiki. Adrazu pačynajuć skuholić - my ž kalehi.
Škada, u hramadstvie chitraść kultyvujecca, tamu im ničoha nie zrabić.