Lavonaŭ: Śledstva ad pačatku prapanoŭvała paćvierdzić viersiju pra terakt

Na pracesie pa spravie vaŭkavyskich pradprymalnikaŭ Mikałaja Aŭtuchoviča i Uładzimira Asipienki, jaki prachodzić u Viarchoŭnym sudzie Biełarusi, były fihurant hetaj spravy Juryj Lavonaŭ zajaviŭ, što śledstva z samaha pačatku prapanoŭvała jamu paćvierdzić viersiju ab terakcie.

Pra heta paviedamiŭ pravaabaronca Aleh Vołčak.

Pavodle jaho słoŭ, Lavonaŭ, jaki byŭ dapytany 5 krasavika ŭ Viarchoŭnym sudzie, źjaŭlajecca adnym z asnoŭnych śviedak pa spravie Aŭtuchoviča i Asipienki. Jon byŭ zatrymany razam ź imi ŭ Vaŭkavysku 8 lutaha 2009 hoda. 8 žniŭnia Lavonaŭ byŭ vyzvaleny sa śledčaha izalatara, 24 vieraśnia kryminalnaja sprava ŭ dačynieńni da jaho była spyniena i ź jaho byli źniaty ŭsie abvinavačańni.

Zaraz Lavonaŭ časova žyvie ŭ Maskvie, dzie dahladaje chvoruju maci.

«Lavonaŭ padčas dopytu zajaviŭ, što ź pieršaha dnia aryštu śledčyja patrabavali ad jaho pryznańnia, što Aŭtuchovič rychtavaŭ zamachi na byłoha staršyniu Hrodzienskaha abłvykankama Uładzimira Saŭčanku i namieśnika ministra pa padatkach i zborach Vasila Kamianko.

Lavonaŭ taksama zajaviŭ, što na jaho naciskali psichałahična, kab jon daŭ patrebnyja pakazańni. Patrabavali, kab jon pryznaŭ svaju vinu, pahražajučy, što inakš jon apyniecca ŭ hłybockaj turmie siarod samych niebiaśpiečnych złačyncaŭ», — skazaŭ Vołčak.

Lavonaŭ abvierh pakazańni Alaksandra Łaryna, zhodna ź jakimi toj nibyta razmaŭlaŭ ź im ab zamachu na Saŭčanku ŭ kvatery Lavonava. «Lavonaŭ zajaviŭ, što nie čuŭ ad Aŭtuchoviča ab płanach zamachu ci pomście čynoŭnikam za źniščeńnie biźniesu Aŭtuchoviča. Jon zajaviŭ, što

było šmat łajanki na adras čynoŭnikaŭ, u tym liku i ź jaho boku, ale ličyć takoje stanovišča naturalnym, bo z 2003 hoda firma «Nika‑trans», u jakoj jon pracavaŭ dyrektaram, była pad pastajannym presinham padatkovych struktur»,

— paviedamiŭ Vołčak.

Vołčak skazaŭ, što ŭ sudzie byli dapytany dva milicyjaniery, jakija ažyćciaŭlali patrulavańnie ŭ rajonie doma Saŭčanki. Pavodle ich słoŭ, nijakaha sačeńnia za domam jany nie vyjavili i ničoha padazronaha nie zaŭvažali.

Nahadajem, u Viarchoŭnym sudzie razhladajecca kryminalnaja sprava, pa jakoj prachodziać Mikałaj Aŭtuchovič, Uładzimir Asipienka, Alaksandr Łaryn i Michaił Kazłoŭ. Pieršych troch abvinavačvajuć u padrychtoŭcy terarystyčnaha akta ŭ dačynieńni da namieśnika ministra pa padatkach i zborach Vasila Kamianko i byłoha staršyni Hrodzienskaha abłvykankama Uładzimira Saŭčanki. Aŭtuchovič i Asipienka taksama abvinavačvajucca ŭ arhanizacyi padpału doma byłoha načalnika Vaŭkavyskaha RAUS Siarhieja Kacuby ŭ 2004 hodzie.

Padpałkoŭnik milicyi Michaił Kazłoŭ, były kiraŭnik UBEZ pa Hrodzienskaj vobłaści, abvinavačvajecca ŭ tym, što viedaŭ ab płanach padrychtoŭki terarystyčnaha akta, ale nie pryniaŭ mier dla jaho praduchileńnia.

• 0
• 0
• 0
• 0
• 0
• 0
• 0
• 0