Scenar spačatku zamovili Alaksandru Kačanu, aŭtaru «Akupacyi».
Telekanał ANT maje źniać histaryčny film pra Vitaŭta Vialikaha — vybitnaha dziaržaŭnaha lidera Vialikaha Kniastva. Vitaŭt byŭ pieramožcam Hrunvalda, 600‑hodździe jakoha śviatkujecca sioleta. Hetaja bitva i maje stać naturalnym centram karciny.
Scenar spačatku zamovili Alaksandru Kačanu, aŭtaru «Akupacyi». Kačan zadumaŭ vostrasiužetny pryhodnicki film u čatyroch sieryjach. Hieroj — pałonny kryžak, jaki zakachaŭsia ŭ biełarusku. Začaravany talerantnaściu Vialikaha Kniastva i mudraściu Vitaŭta, jon pierachodzić na jaho bok. Pryhody maładych ludziej razhortvajucca na fonie Hrunvaldskaj bitvy. U siužet uplecienaja i intryha z sarvanaj karanacyjaj Vitaŭta.
Sinopsis Kačana stvaraŭ vobraz idealnaha Vialikaha Kniastva, dzie roznyja narody žyvuć u miry za mudrym Vitaŭtam.
Taki padychod nie zadavoliŭ telekanał. Sinopsis padpravili, źmianili akcenty.
«Kiepskija» hieroi nabyli łacinskija proźviščy, u scenary źjavilisia polskija intryhi i kašmary niamieckaj akupacyi. Scenaryst ad supracy z kanałam admoviŭsia,
zasiarodziŭšysia nad «Kałasach pad siarpom tvaim» — prajekcie, patranavanym ministram Łatuškam.
Ciapier pracu ź siužetam daručyli Iharu Taroćku, scenarystu kinakamiedyi «Na śpinie ŭ čornaha kata», dzie źniałasia ŭnučka Łukašenki Viktoryja. Pavodle jaho zadumy, zamiežniki ŭ filmie buduć razmaŭlać na svaich movach, a biełarusy — pa‑rasiejsku.
Režysioram maje stać Alaksiej Rakovič. Jon nie maje pastanovačnaha dośviedu mastackich filmaŭ, zatoje źniaŭ dakumientalnuju stužku «Chatyń». Vidać, na ANT razvažyli, što raz źniaŭ pra niamiecka‑fašysckich zachopnikaŭ, zdymie i pra niamiecka‑kryžackich.
Ź inšaha boku, u filmie miarkujecca aściarožna pryznać histaryčnaść bieł‑čyrvona‑biełaha ściaha i Pahoni. «My adabrali heta ŭ niahodnikaŭ, ciapier možam viartać», — skazaŭ na abmierkavańni prajekta ŭ kułuarach pradusar ANT Alaksandr Rydvan.
* * *
Vitaŭt Vialiki kiravaŭ VKŁ ad ad 1392 da 1430. Pačynaŭ kiravańnie siarod smuty, skončyŭ siarod słavy. Pry im našy prodki pašyryli miežy ad mora da mora, nazaŭždy spynili hiermanski nacisk na ŭschod. I viaršyli losy Maskvy. Vitaŭt dafarmavaŭ VKŁ jak dziaržavu, aryjentavanuju na zachodniejeŭrapiejskuju cyvilizacyju. Starabiełaruskaja mova była dziaržaŭnaj.
Ciapier čytajuć
«Čakajem u Minsku +1 słavutaść!» Błohieraŭ pryvieźli ŭ byłuju turmu na Vaładarskaha13
Kamientary