U Varšavie projdzie biaspłatny fiestyval niamoha kino — pakažuć i biełaruski film

U prahramu ŭvajšli stužki z ZŠA, Francyi, Hiermanii i Biełarusi. Muzyku admysłova da hetych filmaŭ napisali biełaruskija kampazitary Volha Padhajskaja i Kanstancin Jaśkoŭ, polskaja kampazitarka Aleksandra Chmieleŭska.

Film adkryćcia — kamiedyja Bastera Kitana — budzie pakazvacca ŭ supravadžeńni biełaruskaha pijanista-virtuoza Kanstancina Haračaha, viadomaha jak suzasnavalnika džazavaha hurta Apple Tea.

Prahrama

1 vieraśnia, 20.00: «Kinaapieratar» — ZŠA (1928)

Pieršaja kamiedyja lehiendarnaha komika Bastera Kitana, adnoj z klučavych postaciaŭ suśvietnaj kinakamiedyi, źniataja dla studyi Metro-Goldwyn-Mayer. Chacia hetaja supraca stałasia pačatkam abmiežavańnia tvorčaj svabody Kitana, «Kinaapieratar» mnohimi ličycca najlepšaj kamiedyjaj ź jahonym udziełam. U rečyščy «kino pra kino» stužka raskazvaje historyju maładoha čałavieka, jaki namahajecca ŭładkavacca kinaapierataram na MGM, kab być bližej da dziaŭčyny, u jakuju zakachany.

Režysiory: Baster Kitan, Edŭard Sedžŭik

Tapior (pijanist, jaki supravadžaje niamoje kino): Kanstancin Haračy — fartepijana

Praciahłaść: 70 chvilin

3 vieraśnia, 20.00: «Pakuty Žanny d'Ark» — Francyja (1928)

Adzin z najvialikšych filmaŭ u historyi niamoha kino i kiniematohrafu ahułam. Dacki režysior Karł Teadar Drejer pakazvaje ŭ im apošnija dni nacyjanalnaj hieraini Francyi Žanny d'Ark. Film byŭ zabaronieny da pakazu ŭ Vialikaj Brytanii praź niekamplimientarnyja vobrazy brytanskich sałdataŭ. Na fiestyvali budzie pakazanaja viersija filma ŭ aryhinalnym mantažy. Jana doŭha ličyłasia stračanaju, pakul nie była znojdzienaja ŭ 1981 hodzie ŭ kamory psichijatryčnaj kliniki ŭ Osła.

Režysior: Karł Teadar Drejer

Kampazitar: Kanstancin Jaśkoŭ

Vykanaŭcy: Kanstancin Jaśkoŭ — fartepijana, Palina Horbač — vijałančel

Praciahłaść: 80 chvilin

10 vieraśnia, 20.00: «Kabiniet doktara Kalihary» — Hiermanija (1920)

Kultavy tvor niamieckaha ekspresijanizmu ŭ žanry choraru i adzin z samych upłyvovych filmaŭ u historyi suśvietnaha kino. Tajamničy hipnatyzior prosić u meryi dazvołu pakazać na miascovym kirmašy niezvyčajnaha piersanaža — Samnambułu. Paźniej kapryznaha čynoŭnika, jaki nie nadaje naležnaj uvahi i pavahi vizicioru, znachodziać zabitym u jahonaj spalni. Adna śmierć pieratvarajecca ŭ sieryju tajamničych zabojstvaŭ…

Režysior: Robert Vine

Kampazitarka: Volha Padhajskaja

Vykanaŭcy: Volha Padhajskaja — arhan, Kuźma Papakul — 1‑ia skrypka, Anastasija Piatrova — 2‑ia skrypka, Vital Epaŭ — saprana-saksafon (Five-Storey Ensemble)

Praciahłaść: 75 chvilin

17 vieraśnia, 20.00: «Sud pavinien praciahvacca» — Biełaruś (1930)

Heta adna ź sieryi biełaruskich stužak 1920— 1930‑ch hadoŭ, pryśviečanych prablemie žanočaj emansipacyi. U kantekście «Niamoj lichamanki» jana sensava praciahnie minułahodni pakaz «Prastytutki». Film raspaviadaje pra sudovy praces nad piaćciu mužčynami, jakija abvinavačvajucca ŭ zhvałtavańni łabarantki elektrazavoda Aleny, a taksama pra viartańnie achviary da paŭnavartasnaha pracoŭnaha žyćcia.

Režysiory: Jafim Dzihan, Barys Šrejbier

Kampazitarka: Aleksandra Chmieleŭska

Vykanaŭcy: Aleksandra Chmieleŭska — fartepijana/elektronika, Filip Sporniak — vijałančel

Praciahłaść: 63 chviliny

Uvachod na pakazy volny. Usie filmy buduć supravadžacca subcitrami na biełaruskaj i polskaj movach.

«Niamyja filmy nie byli sapraŭdy niamymi — jany hučali dziakujučy muzycy. Siońnia epocha niamoha kino amal całkam vyklučanaja z uvahi publiki, i dla nas asabliva kaštoŭna, što na našym fiestyvali my dajem hetym stužkam novaje pračytańnie i novaje žyćcio», — kaža arhanizatarka fiestyvalu Irena Kaciałovič.

Fiestyval adbyvajecca pry finansavaj padtrymcy fonda Trzy Trąby, German Marshall Fund Złučanych Štataŭ Amieryki (GMF), Centra dyjałohu imia Juljuša Mierašeŭskaha, Staramiejskaha doma kultury i pry ŭdziele Muzieja volnaj Biełarusi, Centra dumki Jana Paŭła II.

• 0
• 0
• 0
• 0
• 0
• 0
• 0
• 0