«Mikoła źnik, a zmahary jaho navat nie šukajuć». U infarmacyjnaj śpiecapieracyi biełaruskich słužbaŭ źmianilisia akcenty
Voś što ŭkidvajuć pra Mikołu Statkieviča prapahandysty siońnia.
11 vieraśnia Mikołu Statkieviča razam ź inšymi palitviaźniami vyvieźli na miažu ź Litvoj. Ale jon nie pahadziŭsia na departacyju, vysadziŭ dźviery aŭtobusa i vyskačyŭ na niejtralnaj pałasie miž Biełaruśsiu i Litvoj. Palityk niekalki hadzin znachodziŭsia ŭ niejtralnaj zonie, a paźniej, jak zafiksavała litoŭskaja pamiežnaja słužba, viarnuŭsia ŭ Biełaruś.
Łukašenkaŭskaja prapahanda ž uviečary 11 vieraśnia sprabavała zapeŭnić, što palitviazień nie viarnuŭsia nazad u Biełaruś, a ŭsio ž taki pierajšoŭ u Litvu. Praciahłaje znachodžańnie palityka ŭ niejtralnaj zonie na miažy jany padajuć jak pastaŭleny im śpiektakl.
Ryhor Azaronak u svaim telehram-kanale spačatku raźmiaściŭ zdymak, na jakim siarod inšych palitźniavolenych vidać Mikołu Statkieviča, dadaŭšy karotki post:
«Mikałaj Statkievič u Litvie. Infa sotka».
A paźniej jon apublikavaŭ karotki ŭryvak razmovy ź Juryjem Vaskrasienskim, supravadziŭšy jaho takim kamientarom:
«Jon u Litvie. Jon zdrysnuŭ u Litvu. Dzied vyrašyŭ pavypiendryvacca i troški nabić sabie bały. Jon mianie rasčaravaŭ. Mikoła vielmi chutka zduŭsia, zładziŭšy na praciahu dvuch hadzin śpiektakl. Finał, na žal, jak vyjaviłasia, zaŭsiody banalny i prosty: zachaciełasia prosta znoŭ paviačerać».
Pry hetym nijakich fota— ci dokazaŭ hetamu nie pryvodziłasia.
Hetuju temu padchapili i inšyja prapahandysckija resursy. Post Azaronka pierapościŭ u svaim kanale prapahandyst Ihar Tur.
Telehram-kanał «Biełorusskij front», jaki źviazvajuć ź Minabarony, u svaju čarhu, napisaŭ:
«Ludzi kažuć, što pamiłavany zmahar Statkievič daŭnym-daŭno ŭciok u Litvu, jak łoś pa kukuruzie, i tolki jaho i bačyli».
Ranicaj 12 vieraśnia viektar aśviatleńnia situacyi vakoł Mikałaja Statkieviča źmianiŭsia.
Aŭtary telehram-kanała KrysołOFF apublikavali post z pytańniem: «Dzie dzied?» i kamientaryjem:
«Mikoła źnik, a zmahary jaho navat nie šukajuć, byccam by staroha nikoli nie było. Voś s*ki».
Nasamreč, naadvarot: situacyja sa Statkievičam była 11 vieraśnia ŭ fokusie ŭvahi jak apazicyi, tak i niezaležnych ŚMI.
Na hetym aŭtary kanała nie spynilisia i raźmiaścili paskvil u styli «Uvaha, vyšuk» na Mikołu Statkieviča.
Nie zastaŭsia ŭbaku i Azaronak. Ranicaj 12 vieraśnia jon raźmiaściŭ post z pytańniem: «Dzie Statkievič!?», a paźniej pierapościŭ dopis kanała KrysołOFF.
Pytańniem «Chdzie pan Mikoła?» zadajecca i vizavi Azaronka Volha Bondarava.
Dakładnaje miesca znachodžańnia palityka Mikałaja Statkieviča zastajecca nieviadomym. Śviedki bačyli, jak ź miažy jaho zabrali nieviadomyja ŭ maskach.
«Faktyčna, jon paŭtaryŭ podźvih Maryi Kaleśnikavaj, paŭtaryŭ u zusim inšych umovach, kali bolš niama nadziei na chutkuju pieramohu, kali tvaja admova moža aznačać navat fizičnuju śmierć», — kaža fiłosaf, pradstaŭnik pa pytańniach kultury i nacyjanalnaha adradžeńnia Abjadnanaha pierachodnaha kabinieta Pavieł Barkoŭski.
Chto taja biełaruska, jakuju ekstradavali ŭ ZŠA dla suda za kantrabandu detalaŭ dla samalotaŭ6
Chto taja biełaruska, jakuju ekstradavali ŭ ZŠA dla suda za kantrabandu detalaŭ dla samalotaŭ
«Kab Biełaruś nie addali Pucinu ŭ jakaści suciašalnaha pryza». Cichanoŭskaja zaklikaje ŭklučyć biełaruskaje pytańnie ŭ mirnyja pieramovy Ukrainy i Rasii3434
Kamientary
Nie dastaje chiba pieśni Lube