1—2 maja ŭ Turavie projdzie Fiestyval kulikoŭ.
Inicyjataram mierapryjemstva vystupiła hramadskaja arhanizacyja »Achova ptušak Baćkaŭščyny» (APB), suarhanizatarami źjaŭlajucca Ministerstva pryrodnych resursaŭ i achovy navakolnaha asiarodździa, Prahrama raźvićcia AAN u Biełarusi, Prahrama małych hrantaŭ Hłabalnaha ekałahičnaha fondu, Prajekt HEF/PRAAN pa Paleśsiu, Žytkavicki rajvykankam.
Jak paviedamiŭ śpiecyjalist pa ekałahičnaj adukacyi APB Rusłan Šajkin, meta fiestyvalu — pryciahnuć uvahu da ekałohii, sadziejničać raźvićciu pryrodnaha i kulturnaha turyzmu na terytoryi Žytkavickaha rajona.
Fiestyval adkryjecca sieminaram pa prablemach achovy ptušak adkrytych pojmiennych łuhoŭ, praduhledžana zabaŭlalna‑paznavalnaja prahrama.
U pryvatnaści, projduć vystupleńni falkłornych i muzyčnych kalektyvaŭ, pryśviečanyja ptuškam, a taksama defile »Kuličynaja moda», na jakim buduć pradstaŭleny kalekcyi junych dyzajnieraŭ rehijonu i dyzajnieraŭ Mižnarodnaj maładziožnaj tvorčaj majsterni »Młyn mody».
Akramia taho, dla ŭsich achvotnych buduć arhanizavany nazirańni za ptuškami, majstar‑kłasy APB pa vyjaŭleńni ptušak na tkaninie, tatu z ptuškami, a taksama majstar‑kłasy Turaŭskaha doma tvorčaści pa kieramicy, sałomcy, vyšyŭcy i inšych narodnych promysłach.
Zapłanavana vystava materyjałaŭ APB za ŭsie hady isnavańnia arhanizacyi: vydańni «Ptuški i my», płakaty‑vyznačalniki ptušak.
U druhi dzień fiestyvalu projdzie fotaplener «Ptuški Turaŭskaha łuhu», u jakim voźmuć udzieł prafiesijnyja fotapalaŭničyja.
Jak adznačyŭ Šajkin, fiestyval pravodzicca druhi raz. Čakajecca, što jon źbiare mnostva ŭdzielnikaŭ, u tym liku pradstaŭnikoŭ zamiežnych dypłamatyčnych misij, pradstaŭnictvaŭ mižnarodnych arhanizacyj u Biełarusi.
Pavodle słoŭ śpiecyjalista, Turaŭski łuh — adno z najbolš važnych miescaŭ hniezdavańnia i spynieńnia padčas mihracyi vodna‑bałotnych ptušak. Usiaho na łuzie žyvie kala 500 par 55 vidaŭ takich ptušak. Tut taksama raźmieščana samaje vialikaje pasialeńnie zaniesienaha ŭ Čyrvonuju knihu kulika‑maradunki. Akramia taho, sotni tysiač ptušak spyniajucca na łuzie padčas viasnova‑vosieńskich pralotaŭ.
Kamientary