Minekanomiki dazvoliła STA ŭstanaŭlivać ceny na aŭtazapčastki z ulikam kanjunktury rynku.
Jak paviedamiła pres‑słužba Ministerstva ekanomiki, 22 krasavika nabyła moc pastanova viedamstva № 70 ad 1 krasavika 2010 hoda, pavodle jakoj «ŭsie materyjały, zapasnyja častki, vuzły i ahrehaty, jakija vykarystoŭvajucca niepasredna pry akazańni pasłuh pa techničnym absłuhoŭvańni i ramoncie transpartnych srodkaŭ, apłačvajucca zamoŭcami pa cenach, sfarmiravanych subjektami pradprymalnickaj dziejnaści z ulikam kanjunktury rynku».
Raniej asnoŭnaja masa STA ŭ Biełarusi, nie źjaŭlajučysia imparciorami, nie mieła prava ŭstanaŭlivać nacenku na zapčastki. Heta značyć pry akazańni pasłuh pa ramoncie aŭtamabilaŭ jany pavinny byli pradavać zapasnyja častki pa sabiekošcie. U struktury zbytu aficyjnaj STA zapčastki składajuć prykładna 65% koštu ramontu.
Jak zajaviŭ staršynia kiraŭnictva Biełaruskaj aŭtamabilnaj asacyjacyi Siarhiej Michnievič, «dakumient daje mahčymaść STA lehalna farmiravać svaje składy zapčastak i zarablać na ich. Realna siońnia stancyi techabsłuhoŭvańnia mohuć farmiravać ekanamična abhruntavanyja biźnies‑płany prybytkovaj dziejnaści».
Pavodle słoŭ ekśpierta, «taki praryŭny momant budzie spryjać raźvićciu aŭtaservisu. Kali raniej dylery kuplali zapasnyja častki ŭ imparcioraŭ, jany nie mahli rabić nijakija skidki. Zapčastki adpuskalisia pa sabiekošcie, a nižej za sabiekošt pradavać nielha było. Ciapier stvarajucca pieradumovy dla budučaha źnižeńnia cen, tamu što dylery mohuć rabić skidki ŭ vypadku rasprodažu, ucenki, akcyj. Heta stvaraje mahčymaść dyleram dziejničać bolš hnutka, i klijent ad hetaha tolki vyjhraje».
Kamientary