«Adbiarycie ŭ hetych nieadekvatnych piłu!» Jak deputaty «naviali paradak» na histaryčnych mohiłkach u Breście
Maštabnaja akcyja pa dobraŭparadkavańni histaryčnych mohiłak u Breście skončyłasia skandałam i paškodžańniem nadmahillaŭ. Pakul haradskija słužby rapartavali pra dobraŭparadkavańnie, žychary horada pabačyli zusim inšuju karcinu: pabityja pomniki i zavały sa śpiłavanych dreŭ prosta na pachavańniach. U subotniku, paśla jakoha zastalisia razbureńni, udzielničali deputaty haradskoha Savieta i pradstaŭniki Savieta moładzi.
Bieraściejec 15 sakavika naviedaŭ Tryšynskija mohiłki i zastaŭsia ŭ šoku ad ubačanaha: paškodžanyja pomniki, kuča nieprybranych halin i raśpiłavanych dreŭ, piša BGmedia.
Pry hetym 14 sakavika ŭ miežach miesiačnika pa dobraŭparadkavańni haradskija deputaty pryvodzili hety niekropal u paradak.
Na Tryšynskich mohiłkach paśla ŭborki pakinuli śpiłavanyja drevy i paškodžanyja pomniki
Bieraściejec apublikavaŭ 15 sakavika ŭ Threads fota z Tryšynskich mohiłak. Na ich možna zaŭvažyć paškodžanyja pomniki, nieprybranyja haliny i raśpiłavanyja drevy.
Žychary horada ŭ kamientarach nie chavajuć svajho abureńnia:
«Adbiarycie ŭ hetych nieadekvatnych piłu! Mohiłki adnosiacca da histaryčnych kaštoŭnaściaŭ horada!»
«Heta aburalna. Hetak ža piłavali na katalickich mohiłkach, raźbili mnostva pomnikaŭ. Niaŭžo haradskim uładam niama spravy!? (vidavočna, na žal, što niama)».
«Prodki nie zadavolenyja svaimi naščadkami».
«Ruka*opy».
«Hienijalnyja kiraŭniki i talenavityja vykanaŭcy. Heta niejkaja hańba…»
U miežach miesiačnika pa dobraŭparadkavańni Tryšynskija mohiłki «pryvodziać u paradak»
KUP «Bresckaje śpiecpradpryjemstva» ŭziałosia za naviadzieńnie paradku na Tryšynskich mohiłkach u pačatku sakavika. Naprykład, 5 sakavika Bresckaje haradskoje ŽKH paviedamiła, što «ŭ miežach miesiačnika pa sanitarnaj ačystcy i ŭborcy terytoryi Bresta siońnia na Tryšynskich mohiłkach idzie vydaleńnie avaryjnych dreŭ i suchastoju».
Tam zajavili, što «raboty pa ŭtrymańni i dobraŭparadkavańni mohiłak «Tryšynskija» ažyćciaŭlajucca siłami KUP «Bresckaje śpiecpradpryjemstva» ŭ adpaviednaści z patrabavańniami Pravił utrymańnia i dobraŭparadkavańnia miescaŭ pachavańnia, zaćvierdžanych pastanovaj Ministerstva ŽKH».
«Na terytoryi niekropala vykonvajucca raboty, jakija ŭklučajuć u siabie abrazańnie i farmoŭku dreŭ, vydaleńnie avaryjnych dreŭ, što znachodziacca ŭ nienaležnym stanie, u tym liku invazijnych vidaŭ. Hety vid rabot pravodzicca z metaj niedapuščeńnia paškodžańnia abo razbureńnia pomnikaŭ i nadmahillaŭ niekropala», — napisali ŭ telehram-kanale Bresckaha haradskoha ŽKH.
7 sakavika ŭ Breście praviali subotnik. Tryšynskija mohiłki «pryvodzili ŭ paradak» deputaty Bresckaha haradskoha Savieta.
11 sakavika Bresckaje haradskoje ŽKH paviedamiła, što na Tryšynskich mohiłkach «kipić praca pa naviadzieńni paradku». Supracoŭniki KUP «Bresckaje śpiecpradpryjemstva» vyrazali chmyźniaki i invazijnyja raśliny, piłavali raniej vydalenyja avaryjnyja drevy.
«Tryšynskija mohiłki znachodziacca ŭzdoŭž hałoŭnaj aŭtamahistrali Bresta, tamu jany na vidu va ŭsich žycharoŭ i haściej horada. Pradpryjemstva kinuła vialikija siły na hety adkazny ŭčastak, kab tut byŭ uzorny paradak. Usiaho ŭ ekałahičnaj akcyi zadziejničana kala 40 rabotnikaŭ», — paviedamili ŭ Bresckim haradskim ŽKH.
Nastupny post pra Tryšynskija mohiłki źjaviŭsia ŭ telehram-kanale Bresckaha haradskoha ŽKH 14 sakavika. U im paviedamili, što «deputaty haradskoha Savieta i Saviet moładzi prybirajuć śmiećcie, vyrazajuć invazijnyja raśliny i chmyźniaki».
Vychodzić, što paškodžanyja pomniki, haliny i raśpiłavanyja drevy pakinuli paśla siabie haradskija deputaty i členy Savieta moładzi.
Tryšynski niekropal — unikalny «archiŭ pad adkrytym niebam» u centry Bresta
U hieahrafičnym centry Bresta raźmiaščajecca najstarejšy z zachavanych niekropalaŭ horada — Tryšynskija mohiłki, dzie spačyvaje kala 12 tysiač čałaviek. Pahost staŭ ahulnaharadskim u 1830‑ch hadach, kali stary Brest byŭ źniesieny i pieraniesieny na ŭschod dziela budaŭnictva Bresckaj krepaści. Samaje staroje z zachavanych tut nadmahillaŭ datujecca 1834 hodam. Aficyjna mohiłki byli zakrytyja dla pachavańniaŭ u 1969 hodzie.
Za svaju historyju mohiłki stali miescam spačynu mnohich vydatnych ludziej. Akramia taho, na terytoryi niekropala byli pierapachavanyja astanki bolš za sotni viaźniaŭ Bresckaha hieta, a taksama spačyvajuć sałdaty carskaj i hiermanskaj armij.
Z 2 žniŭnia 2016 hoda Tryšynski niekropal nadzieleny statusam histaryčna-kulturnaj kaštoŭnaści rehijanalnaha značeńnia i achoŭvajecca dziaržavaj.
Niahledziačy na vysoki status, mnohija ŭnikalnyja darevalucyjnyja nadmahilli imkliva razburajucca. Surjozny ŭron nanieśli vandały i «čornyja kapalniki», jakija dziesiacihodździami krali čyhunnyja elemienty, kryžy i aharodžy dziela zdačy na mietałałom. Na hety momant biudžetnych srodkaŭ na paŭnavartasnuju restaŭracyju pomnikaŭ niama.
Palaki kuplajuć damy ŭ Biełarusi — cikaviacca, ci chopić na žyćcio jeŭrapiejskaj piensii, i radujucca śmiešnym vydatkam9
Kamientary
[Zredahavana]