U anłajn-śviecie chłopcaŭ, apantanych daskanałaściu svajho tvaru i cieła, nie isnuje nijakich zabaron, u tym liku na radykalnyja chirurhičnyja ŭmiašańni.
Brytanskaje vydańnie The Times raskazvaje pra novuju modu siarod maładych ludziej.
Šostaja ranicy. Jon pračynajecca biez budzilnika, bo forumy navučyli jaho: mienavita pamiž šostaj i vośmaj hadzinami ŭzrovień kartyzołu ŭ arhaniźmie dasiahaje piku. Pieršaje, što jon robić, — praviaraje svoj profil. Vystup padbarodka, hłybinia zapałaściaŭ pad vačyma, stan skury.
Jon adklejvaje z vusnaŭ płastyr, jaki trymaŭsia ŭsiu noč, kab harantavać ich dobraje ŭvilhatnieńnie, padychodzić da lusterka, dzie śviatło vystaŭlena admysłovym čynam: adna lampa źvierchu i miakki śviacilnik źleva, kab imitavać naturalnaje vuličnaje aśviatleńnie.
Jon prymaje charčovyja dabaŭki: cynk, B12, kałahien. Zatym nakładaje ledziany kampres uzdoŭž padvočnych duh, kab prybrać miaški pad vačyma, i dziesiać chvilin prachodzić sieans terapii čyrvonym śviatłom, adnačasova hartajučy TikTok.
Heta nie pačatak dnia kinazorki, a zvyčajnaja ranica sučasnaha junaka-łuksmaksiera.
Jak piša The Times, łuksmaksinh (ad anhlijskaha looksmaxxing — maksimalna palapšać svoj vyhlad) — heta cełaja fiłasofija, meta jakoj udaskanalić źniešnaść, kab dasiahnuć vobrazu «palaŭničaha-źbiralnika»: hipiermaskulinnaha tvaru z vostrymi linijami, hłyboka pasadžanymi vačyma i masiŭnaj skivicaj.
Karani łuksmaksinhu siahajuć u zmročnyja anłajn-forumy pačatku 2010-ch, dzie źbiralisia inceły («vymušanyja trymać celibat»), jakija ličać, što nie mohuć znajści seksualnaha partniora ad taho, što žančyny nie źviartajuć na ich uvahi, nie ličać ich vartymi. Tam naradziłasia ideja, što los mužčyny vyznačajecca jaho hienietykaj i strukturaj kostak. Jany stvaryli žorstkuju sistemu rejtynhaŭ, dzie mužčyn padzialajuć na «čedaŭ» (idealnych alfa-samcoŭ), «normi» (siaredniakoŭ) i «hienietyčnych tupikoŭ».
Siońnia novymi mikraznakamitaściami siarod padletkaŭ stali nie repiery ci futbalisty, a sucharlavyja maładyja ludzi, jakija viaduć strymy z razboram tvaraŭ.
Naprykład, takija strymy 20‑hadovaha Brejdena Pitersa (viadomaha pad psieŭdanimam Clavicular) źbirajuć dziasiatki tysiač hledačoŭ, dla jakich heta nie prosta zabava, a instrukcyja pa «asendynhu» — pierachodzie na vyšejšuju stupień pryvabnaści.
Nie mienš jarkaj postaćciu ŭ hetym asiarodździ źjaŭlajecca Ościn Uejn, čyje videa ŭ farmacie «mogwalks» nabirajuć miljony łajkaŭ. Heta svojeasablivyja estetyčnyja pierformansy: Uejn idzie pa ludnych vulicach Tajłanda ci Japonii, a kamiera fiksuje reakcyju minakoŭ, padkreślivajučy jaho vidavočnuju pieravahu ŭ ahulnaj masie tvaraŭ i ciełaŭ. Fiłasofija Uejna davoli prahmatyčnaja: jon upeŭnieny, što pośpiech u łuksmaksinhu na 80% zaležyć ad kampazicyi cieła.
Na takich sajtach, jak looksmax.org i looksmaxxing.com, chłopcy zahružajuć svaje profili i prosiać «brutalnaj ščyraści». U adkaz jany atrymlivajuć zaklučeńni kštałtu «sieradniak, pakul nie skinieš tłušč» i śpiecyfičnyja rekamiendacyi ab źmienie ładu žyćcia abo chirurhičnym umiašańni.
Soft i chard
Ekśpierty pravodziać miažu pamiž softmaksinham i chardmaksinham. Pieršy ŭklučaje ŭ siabie intensiŭny dohlad za skuraj (vykarystańnie eksfalijantaŭ, tonieraŭ, retynołu i mucynu ślimaka dla ełastyčnaści), vysokaprateinavyja dyjety, pracu nad pastavaj i štodzionnaje rasčesvańnie brovaŭ. Siudy ž adnosicca pryjom dabavak — cynku, kałahienu i vitaminu B12.
Chardmakisinh maje značna mienš prychilnikaŭ. Jon uklučaje chirurhičnyja apieracyi: impłanty ŭ padbarodak, źmianieńnie formy skivicy, rynapłastyku i navat ekzotyku nakštałt pierasadki tłušču pad vočy.
Asobnaje miesca zajmaje farmakałohija, naprykład, retatrutyd — pieptyd, jaki nazyvajuć «Hadziłaj» siarod srodkaŭ dla pachudzieńnia. Ź im abiacajuć dasiahnuć ekstremalna nizkaha pracenta tłušču ŭ ciele (nižej za 12%). Jon usio jašče prachodzić kliničnyja vyprabavańni i nie ŭchvaleny dla šyrokaha vykarystańnia.
Bolšaść łuksmaksieraŭ praktykujuć «mjuinh» — pryciskańnie jazyka da padniabieńnia dla madelavańnia skivicy.
Choć stvaralnik mietadu artadont Majk Mju, zusim nie płanavaŭ stanavicca kumiram padletkaŭ, navukovuju lekcyju pra toje, jak sučasnaje žyćcio (miakkaja ježa, dychańnie rotam i kiepskaja pastava) psuje raźvićcio tvaru, zahruziŭ na YouTube siem hadoŭ tamu.
Adnak jość i bolš radykalnyja praktyki, naprykład, «boŭnsmešynh» (bonesmashing). Heta sproby nanosić sabie mikratraŭmy ŭ vobłaści skuł abo padbarodka (rukami ci masažnymi pistaletami), kab stymulavać rost kaściavoj tkanki. Ekśpierty ličać heta čystym varjactvam.
Samaŭdaskanaleńnie ci kryzis asoby?
Psichołahi i miedyki zaniepakojenyja tym, što łuksmaksinh stanovicca formaj dysmarfafobii — chvaravitaj niezadavolenaści svaim ciełam. Tomas Midžli, psichołah z 25‑hadovym stažam, paraŭnoŭvaje łuksmaksinh z anareksijaj.
Pavodle jaho słoŭ, chłopcy traplajuć u pastku: paśla pieršych pośpiechaŭ u zale jany atrymlivajuć bolš uvahi, i heta padšturchoŭvaje ich iści dalej. Ale pakolki ŭpeŭnienaść hruntujecca tolki na vyhladzie, jana nikoli nie byvaje stabilnaj. Zaŭsiody znojdziecca milimietr kostki, jaki možna «palepšyć».
Miechmiet Manisali, kansultant pa skivična-tvaravaj chirurhii ŭ Łondanie, zaznačaje, što ałharytmy sacyjalnych sietak pastajanna padsoŭvajuć junakam adredahavanyja vyjavy, jakich niemahčyma dasiahnuć u realnaści. Manisali časta admaŭlaje pacyjentam, čyje čakańni nierealistyčnyja. Jon madeluje tvary z dapamohaj prahramnaha zabieśpiačeńnia, kab pakazać, što chirurhična dasiahalna, a što abiacaje Instagram. Kali realistyčny varyjant ich rasčaroŭvaje, jon prapanuje im praciahnuć pošuki ŭ inšym miescy.
Sami hetyja chłopcy nie ličać siabie achviarami. Dla ich heta racyjanalny adkaz na sučasnaść. 21‑hadovy švied Jochan Drumieŭ ščyra kaža:
«Dalejšaje ŭdaskanaleńnie majho vyhladu harantuje mnie jašče bolš žanočaj uvahi, bolš padpisčykaŭ u sacsietkach i bolš hrošaj. Ja stanu žyvym dokazam taho, što, majučy patrebnyja viedy, možna źmianić siabie, nie vyhladajučy pry hetym dziŭna ci štučna. Ja chaču zaćmiavać inšych svaim vyhladam, adčuvać siabie lepš, chaču raźvivacca. I mnie ŭsio adno, što heta nienaturalna. Bolšaść ludziej z vyklučnaj źniešnaściu atrymali jaje nie ad pryrody».
Jak zaŭvažaje The Times, pa vialikim rachunku, u łuksmaksinhu niama ničoha pryncypova novaha. Junaki va ŭsie časy stajali pierad lusterkam pierad spatkańniami, zaŭsiody chacieli bolš vostrych skivic, šyrejšych plačej, krychu bolš uvahi.
Adnak siońnia adbyłasia radykalnaja hiejmifikacyja hetaha žadańnia. Maładyja ludzi zahružajuć prahramy dla madelavańnia tvaru, na forumach analizujuć milimietry kaściej tvaru, jaki pieratvaryŭsia ŭ biaskoncy prajekt pa aptymizacyi. Łuksmaksinh u svaim najhoršym prajaŭleńni vučyć pakaleńnie chłopcaŭ bačyć u svaim adlustravańni nie asobu, a nabor inžyniernych pamyłak, jakija treba vypravić.
Ciapier čytajuć
«Jana daŭnavata ŭ Biełarusi». Baćka Anžaliki Mielnikavaj pryznaŭsia, što jana žyvaja i zdarovaja113
Kamientary