Viadomy treveł-błohier Anton Ptuškin viarnuŭsia na YouTube. Ale ŭ Biełarusi jaho novy vypusk niedastupny
Znakamity ŭkrainski treveł-błohier i były viadoŭca «Arła i Reški» Anton Ptuškin niekalki hadoŭ nie vypuskaŭ videa. Ciapier ža jon vykłaŭ na svaim YouTube-kanale rolik pra naviedvańnie Antarktydy — pa-ŭkrainsku. Ale ŭ Biełarusi jaho možna pahladzieć tolki z VPN.
Film «Antarktyda» spačatku vyjšaŭ u kinaviersii. Jaho premjera ŭ kinateatrach adbyłasia 4 vieraśnia hetaha hoda, i stužka chutka stała rekardsmienam pa prahladach siarod dakumientalnych filmaŭ va Ukrainie. Tolki za pieršyja dva tydni film, jakaja raskazvaje pra žyćcio i pracu ŭdzielnikaŭ 30‑j Ukrainskaj antarktyčnaj ekśpiedycyi na stancyi «Akademik Viarnadski», pahladzieła 200 tysiač hledačoŭ.
10 śniežnia film vyjšaŭ na Netflix. Błohier taksama raźmiaściŭ videa ŭ siabie na YouTube-kanale, jaki maje zvyš 5,4 miljona padpisčykaŭ, i paviedamiŭ, što hetaja viersija na 3 chviliny daŭžejšaja za tuju, što pakazvali ŭ kinateatrach.
Hledačy zaŭvažyli, što, u adroźnieńnie ad papiarednich vypuskaŭ, novaje videa — na ŭkrainskaj movie. Hety fakt vyklikaŭ jak ździŭleńnie i padziaku, tak i niezadavolenaść niekatorych hledačoŭ.
«Na jakoj movie? Ja ŭkrainskaj nie razumieju. Jak hladzieć?» — kamientaryi takoha kštałtu možna pračytać u Threads.
«Ja sam ukrainiec, i zbolšaha razmaŭlaju pa-rusku. Mnohich tut aburaje, što ahučany film pa-ŭkrainsku. (…) Kali b kožnaja z krain (vy, vašy siemji, dzieci, baćki i ŭsie astatnija ludzi) u SND adčuli na sabie toje, što adčuvajuć ukraincy štodnia, vydatna b zrazumieli pryčynu, čamu film źniaty na ŭkrainskaj movie. Tamu, na žal, takija akaličnaści», — taktoŭna adkazvaje adzin z karystalnikaŭ.
«Nu i nachabnyja kamientatary! Čałaviek źniaŭ film na svajoj rodnaj movie, pa-ŭkrainsku! Źjeździŭšy na ŭkrainskuju daśledčuju stancyju imia Viarnadskaha! Na hrošy svaje, dziaržavy, hramadzianinam jakoj jon źjaŭlajecca, i sponsaraŭ, i heta dakładna nie vy! Chto choča pahladzieć u svajoj krainie SND — kuplajcie pravy, pierakładajcie na svaju lubuju na vybar movu, na jakoj vam chočacca pahladzieć, i atrymlivajcie asałodu! Što za ździŭleńnie takoje, blin!?» — nie chavaje emocyj inšaja žančyna.
«Ja ź Biełarusi, usio žyćcio dumaju i razmaŭlaju pa-rusku, razumieju i biełaruskuju, i ŭkrainskuju! Ptuškin, sakolik ty naš darahi, vykładvaj svoj nadzvyčajny kantent na luboj movie», — padtrymlivaje aŭtara adna z hladačak.
«Ludzi, viadoma, nachabnyja. Ptuškin — ukrainiec, sam vypuściŭ film, sam vyrašyŭ na ŭkrainskaj movie. Viadoma, zrazumieła čamu. Ale znojducca i tut niezadavolenyja: a čaho nie na ruskaj movie? Spadarstva, nu nie padabajecca z subcitrami hladzieć — nu nie hladzicie! Ja dumaju, Ptuškin acaniŭ ryzyki i stratu prahladaŭ. My taksama nie hladzim estonskija/polskija/turkmienskija filmy, bo movy nie razumiejem. I što?» — davodzić inšy.
Na žal, biełarusy, jak i žychary niekatorych inšych krain, nie mohuć pahladzieć hetaje videa z pryčyny hieahrafičnych abmiežavańniaŭ.
«Kryŭdna inšaje. Hety film schavany dla karystalnikaŭ ź Biełarusi. Źjaŭlajecca tolki z VPN. Čym ja tak pravinavaciŭsia, što ja nie varty pahladzieć jaho videa na ŭkrainskaj movie?!» — dzivicca hladač.
«Z vašaj terytoryi lacieli rakiety i na tankach zajšli ruskija vajskoŭcy», — tłumačać jamu.
Nahadajem, što ŭ sakaviku 2022 hoda błohier vypuściŭ na svaim YouTube-kanale videa «Dzie ja byŭ hetyja 8 hadoŭ», u jakim rezka vykazaŭsia nakont vajny Rasii suprać Ukrainy. Reakcyi z boku ahresara nie daviałosia doŭha čakać. U krasaviku taho ž hoda stała viadoma, što Rasija zabaraniła błohieru ŭjezd u krainu na 50 hadoŭ. Z pačatku vajny Ptuškin nie vypuskaŭ vialikich videa pra padarožžy.
Ciapier čytajuć
Biełastok na vušach praź źniknieńnie aktyvista Vajciachoŭskaha, susieda pamierłaha špijona Usiera. A toj ciškom viarnuŭsia ŭ Biełaruś22
Kamientary