U Minsku raźvitvajucca z ratavalnikami, jakija zahinuli padčas pažaru 11 maja
Hramadzianskaja panichida, jakaja pačałasia apoŭdni, prajšła ŭ Minskim haradskim upraŭleńni MNS.
Raźvitacca z zahinułymi ratavalnikami pryjšli supracoŭniki padraździaleńniaŭ MNS ź Minska i rehijonaŭ Biełarusi, a taksama šmatlikija cyvilnyja asoby. U dvary haradskoha ŭpraŭleńnia Ministerstva pa nadzvyčajnych situacyjach pryspuščany dziaržaŭny ściah i ściah MNS, prybranyja žałobnymi stužkami. Z raźmieščanych u dvary anharaŭ vyviedziena technika MNS, pobač ź joj vystrajeny dziažurnyja źmieny ratavalniki. Dziažuryć niekalki bryhad chutkaj dapamohi.
Jak paviedamiŭ BiełaPAN pres‑sakratar MNS Vital Navicki, zahinułyja ratavalniki buduć pachavanyja na Uschodnich (Maskoŭskich) mohiłkach Minska. Raniej nazyvalisia Kalvaryjskija mohiłki.
Supracoŭniki MNS Vadzim Lesik, Dźmitryj Łoŭdar, Andrej Muchin i Juryj Sysoj zahinuli 11 maja padčas tušeńnia pažaru ŭ składskim pamiaškańni AAT «Minski zavod vyličalnaj techniki» (MZVT).
Jašče čaćviora ratavalnikaŭ byli špitalizavanyja z apiokami, pierałomami, atručeńniem čadnym hazam i praduktami hareńnia. Na dadzieny momant jany iduć na papraŭku.
Śledčym adździełam papiaredniaha rasśledavańnia Frunzienskaha RUUS Minska raspačata sprava pa č. 3 art. 304 Kryminalnaha kodeksa (parušeńnie praviłaŭ pažarnaj biaśpieki, jakoje pryviało pa nieaściarožnaści da śmierci čałavieka).
Žurnalistam paviedamili, što najbolš vierahodnaj pryčynaj pažaru stała praviadzieńnie zvaračnych prac u cachu, raźmieščanym pa susiedstvie sa składam, adnak razhladajucca i inšyja viersii ŭźniknieńni pažaru. Siemjam zahinułych i paciarpiełych padčas pažaru na MZVT budzie akazana materyjalnaja dapamoha.
Kamientary