Vialikija biełyja akuły ŭ Mižziemnym mory apynulisia na miažy źniknieńnia. Pavodle vysnoŭ amierykanskich navukoŭcaŭ, jakija pracavali razam z brytanskaj ekałahičnaj arhanizacyjaj Blue Marine Foundation, hałoŭnaj pahrozaj dla hetych drapiežnikaŭ zastajecca niezakonny vyłaŭ, paviedamlaje Bi-bi-si.
Daśledčyki paviedamlajuć, što tolki ŭ 2025 hodzie kala ŭźbiarežža Paŭnočnaj Afryki było zabita nie mienš za 40 vialikich biełych akuł. Choć hety vid, jak i jašče bolš za dvaccać vidaŭ mižziemnamorskich akuł, znachodzicca pad mižnarodnaj achovaj i jaho vyłaŭ dy prodaž zabaronienyja, akuły praciahvajuć źjaŭlacca na miascovych rynkach.
Žurnalisty pravieryli videa z sacyjalnych sietak i paćvierdzili ich sapraŭdnaść: na kadrach bačna, jak miortvych akuł vyhružajuć u rybałoŭnych partach Paŭnočnaj Afryki. U Ałžyry, naprykład, zafiksavali dastaŭku vialikaj biełaj akuły, a ŭ Tunisie — padrychtoŭku da prodažu častak akuły-mako, jakaja taksama znachodzicca pad pahrozaj źniknieńnia.
Kiraŭnik daśledavańnia, marski bijołah Frančeska Fiereci z univiersiteta Virginia Tech, adznačaje, što kolkaść akuł u Mižziemnym mory, asabliva biełych, za apošnija dziesiacihodździ katastrafična skaraciłasia. Pavodle jaho słoŭ, ni ŭ adnym inšym marskim rehijonie śvietu niama takoha intensiŭnaha pramysłovaha rybałoŭstva. Mižnarodny sajuz achovy pryrody adnosić mižziemnamorskuju papulacyju vialikaj biełaj akuły da katehoryi «ŭ krytyčnaj niebiaśpiecy».
Sioleta navukoŭcy sprabavali znajści akuł u pralivie pamiž Sicylijaj i Tunisam, jaki ličycca adnym z apošnich prytułkaŭ redkich vidaŭ. Na praciahu dvuch tydniaŭ jany vykarystoŭvali prynady, padvodnyja kamiery i analiz DNK u marskoj vadzie, ale zmahli zafiksavać tolki adnu błakitnuju akułu. Vialikich biełych akuł znajści nie ŭdałosia.
Adnačasova daśledčaja hrupa atrymlivała novyja źviestki pra hibiel biełych akuł u rybałoŭnych rajonach Paŭnočnaj Afryki, u tym liku pobač ź miescami praviadzieńnia daśledavańniaŭ. Navukoŭcy padkreślivajuć, što takija straty asabliva niebiaśpiečnyja dla ŭžo vielmi małalikaj papulacyi.
Ekołahi źviartajuć uvahu, što, niahledziačy na mižnarodnyja zabarony, uzrovień achovy akuł istotna adroźnivajecca ŭ roznych krainach, a prablema vypadkovaha ŭłovu zastajecca niavyrašanaj. U biednych prybiarežnych supolnaściach rybaki časta vymušanyja vybirać pamiž zachavańniem redkich vidaŭ i nieabchodnaściu zarablać na žyćcio.
Buraja hijena, alpijski kaziaroh, embryjon nasaroha. U Vialikabrytanii padviali vyniki konkursu na najlepšyja foty dzikaj pryrody
U Aŭstralii akuła napała na padletka. Jaho vyratavali advažnyja siabry
Navukoŭcy ŭpieršyniu zafiksavali aranžavuju akułu-niańku FOTA
Navukoŭcy pakazali VIDEA, jak vaśminoh katajecca na samaj chutkaj u śviecie akule
Ivan Prus raskazaŭ, jak nažyŭsia na $200, pasialiŭšy kinazorku ŭ zaniadbanaj kvatery kala śmietnika ŭ Šabanach, abstaŭlenaj rečami ź jaho internata1616
Ivan Prus raskazaŭ, jak nažyŭsia na $200, pasialiŭšy kinazorku ŭ zaniadbanaj kvatery kala śmietnika ŭ Šabanach, abstaŭlenaj rečami ź jaho internata16
Topavy pierakładčyk pajechaŭ u Biełaruś mianiać pašpart — i sieŭ za danaty. «KDB pahladzieŭ na sumu i vyrašyŭ, što nichto ŭ zdarovym rozumie nie moža vydatkavać stolki ŭłasnych hrošaj»1313
Kamientary