Vajciuškievič pryśviačaje Karatkieviču adzin z samych pryhožych kancertaŭ
20 traŭnia, a 19.00, Źmicier Vajciuškievič i WZ‑Orkiestra zaprašajuć usich prychilnikaŭ i siabroŭ na premjeru prahramy, pryśviečanaj 80‑aj hadavinie z Dnia Narodzinaŭ Uładzimira Karatkieviča. Kancert ź simvaličnaj nazvaj «Dzie moj kraj?» projdzie ŭ Domie vieteranaŭ.
Padčas vystupu prahučać pieśni z daŭniaha, pakul niavydadzienaha supolnaha prajekta «Skrypka dryhvy» («Biezhałovaja Vieniera», «Mora», «Dzie moj kraj»), i tvory, admysłova napisanyja dla kancerta («Karčma», «Zajac varyć piva», «Impresija» i inš). Usiaho WZ‑Orkiestra vykanaje trynaccać śpievaŭ na vieršy Ŭładzimira Karatkieviča.
«Ciapier Karatkievič jadnaje i česnych, i niačesnych — i heta vydatna!
— adznačaje Źmicier, — Ja ŭpeŭnieny, što heta budzie adzin z samych pryhožych maich kancertaŭ, bo heta Karatkievič. Ad archaniołaŭ da biezhałovaj Vieniery, ad patryjotyki da humarystyčnych vieršaŭ».
Aproč nazvanych tvoraŭ, prahučać pieśni na vieršy siabroŭ Karatkieviča Hienadzia Buraŭkina i Ryhora Baradulina.
«Miarkuju, u Biełarusi niama ludziej, što nie lubiać Uładzimira Karatkieviča, tamu našaj prahramie prosta nakanavany pośpiech. Paśla kancerta my płanujem vydać live‑płytu s zapisam vystupa».
Pa dadatkovuju infarmacyju źviartajciesia pa telefonie (029) 64 90 888.
Kamientary