Biełarus, uziaty ŭ pałon ukraincami, źviarnuŭsia da Łukašenki z prośbaj zakinuć za jaho słoŭca pierad Pucinym
U telehram-kanale ŭkrainskaha prajekta «Choču žiť» źjaviŭsia videazvarot hramadzianina Biełarusi Rusłana Kupraceviča, źviernuty da Alaksandra Łukašenki. U im 24‑hadovy mužčyna, jaki vajavaŭ na froncie za Rasiju i jakoha ŭkraincy ŭziali ŭ pałon, prosić Łukašenku pachadajničać pierad Pucinym, kab jaho ŭklučyli ŭ rasijskija śpisy dla abmienu vajennapałonnymi.
U svaim zvarocie Kupracevič piša, što padpisaŭ kantrakt z rasijskim Ministerstvam abarony 24 lipienia 2025 hoda, znachodziačysia ŭ kałonii ŭ rasijskim Surhucie. U pałon trapiŭ 4 vieraśnia.
Mužčyna prosić Łukašenku «źviarnucca z prośbaj da prezidenta Rasijskaj Fiederacyi Uładzimira Uładzimiraviča Pucina i dapamahčy mnie chutčej viarnucca damoŭ. Tamu što doma mianie čakajuć maje žonka, dzicia, ciotka i babula».
Raniej paviedamlałasia, što Kupracevič adbyvaŭ termin u rasijskaj kałonii za kradziež. Jon byŭ adpraŭleny na słužbu ŭ 136‑iu asobnuju motastrałkovuju bryhadu Suchaputnych vojskaŭ, jakaja dysłakujecca ŭ Dahiestanie i jakoj kamanduje dahiestaniec.
Varta adznačyć, što, jak raniej nieadnarazova pisali, abmienienym vajennapałonnym u Rasii navat nie zaŭsiody dazvalajuć sustrecca ź siemjami, a zamiest hetaha adpraŭlajuć nazad na front, pryčym nie stanoviacca pieraškodaj navat ranieńni abo kiepski stan zdaroŭja.
Ciapier čytajuć
Adstaŭny padpałkoŭnik milicyi adsudziŭ kvateru ŭ svajoj dački. Hučnaja siamiejnaja historyja z Bresta1
Kamientary