Adkryty list Stanisłava Šuškieviča

Hazeta «Narodnaja vola» apublikavała adkryty list člen-kara Nacyjanalnaj akademii navuk i byłoha kiraŭnika dziaržavy Stanisłava Šuškieviča da prem'jer-ministra Biełarusi Sidorskaha, staršyni savieta respubliki Rubinava, staršyni pałaty pradstaŭnikoŭ Andrejčanki, kiraŭnika Administracyi prezidenta Makieja, staršyni Vyšejšaha Haspadarčaha suda Biełarusi Kamiankova z patrabavańniem adnavić spraviadlivaść.

Adkryty list

Prem'jer-ministru Respubliki Biełaruś S. S. Sidorskamu

Staršyni Savieta Respubliki Nacyjanalnaha schodu RB A. M. Rubinavu

Staršyni Pałaty pradstaŭnikoŭ Nacyjanalnaha schodu RB V. P. Andrejčanku

Kiraŭniku Administracyi Prezidenta Respubliki Biełaruś U. U. Makieju

Staršyni Vyšejšaha Haspadarčaha suda Respubliki Biełaruś V. S. Kamiankovu

Hramadzianin, jaki maje padstavy mierkavać, što jaho pravy parušanyja, nie moža ŭ sučasnaj Biełarusi źviarnucca ŭ Kanstytucyjny sud. U adpaviednaści ź dziejučym zakanadaŭstvam heta možna zrabić tolki praz adnu z ustanovaŭ, jakija ŭznačalvajucca vami. Tamu ja i źviartajusia mienavita da vas — kiraŭnikoŭ usich hetych dziaržaŭnych ustanovaŭ.

Sutnaść spravy.

Viarchoŭny Saviet RB 12-ha sklikańnia pryniaŭ zakon ab maim pažyćciovym piensijnym zabieśpiačeńni. Maja piensija, jak piensija vyšejšaj słužbovaj asoby ŭ Biełarusi, nie dasiahała ŭzroŭniu siońniašnich piensijaŭ šerahovych deputataŭ, ale, što chavać, była prymalnaj.

9 vieraśnia 1997 byŭ padpisany dekret № 16 ab «uparadkavańni piensijaŭ za asablivyja zasłuhi pierad biełaruskim narodam». Pavodle jakoha vysokija piensii paćvierdžanyja byłym vyšejšym funkcyjanieram CK KPB Sakałovu, Palakovu, Dziemiancieju, inšym byłym staršyniam Viarchoŭnaha Savieta (ci jaho Prezidyuma) i mnie byli pryznačanyja tak zvanyja piensii ŭ 3200 rubloŭ u miesiac. Praŭda, z takoj mizernaj piensijaj zastaŭsia ja adzin — M. Hryb atrymlivaje bolš vysokuju — vajennuju, S. Šarecki vyjechaŭ u zamiežža, a H. Tarazievič pamior bieź piensii.

Mienavita takuju piensiju «za asablivyja zasłuhi pierad biełaruskim narodam» — 3200 rubloŭ u miesiac (mienš za 1 jeŭra) ja siońnia i atrymlivaju.

Vidavočna, što dekret, kali jon adpaviadaje Kanstytucyi, nie moža pieratvarać piensiju ŭ naśmiešku, zrabić jaje mienš za minimalnuju sacyjalnuju piensiju. Ale, paŭtaraju, pavodle našych zakonaŭ ja sam nie mahu źviarnucca ŭ Kanstytucyjny sud, kab sud heta paćvierdziŭ. Tamu, u adpaviednaści z artykułam 116 Kanstytucyi RB, ja prašu Vas źviarnucca ŭ Kanstytucyjny sud, kab jon vyznačyŭ, nakolki adpaviadaje Kanstytucyi RB dekret prezidenta № 16 ad 9 vieraśnia 1997 hoda, zhodna ź jakim maja piensija pieratvoranaja ŭ naśmiešku i hańbić nia tolki taho, chto jaje pryznačyŭ svaim dekretam, ale i ŭsie dziaržaŭnyja instytuty, jakija majuć dačynieńnie da sacyjalnaha zabieśpiačeńnia.

Stanisłaŭ Šuškievič, doktar navuk, prafiesar, čalec-kar. NAN RB, zasłužany dziejač navuki i techniki BSSR, łaŭreat Dziaržaŭnaj premii BSSR, łaŭreat premii SM SSSR, narodny deputat SSSR (1989—1991 hh.), Deputat Viarchoŭnaha Savieta RB 12-ha i 13-ha sklikańniaŭ, pieršy namieśnik Staršyni VS RB (1990—1991 hh.), Staršynia VS RB (1991—1994 hh.)

• 0
• 0
• 0
• 0
• 0
• 0
• 0
• 0