Kitaj zabłakavaŭ sprobu Meta vykupić raspracoŭščyka ahienta štučnaha intelektu Manus
Dvum suzasnavalnikam startapa zabaranili pakidać Padniabiesnuju. Rašeńnie stała pakazčykam, nakolki vialikija dziaržavy honiacca za lidarstvam u śfieru ŠI i nakolki trymajucca za mazhi, zdolnyja ŠI raźvivać.
U pačatku hetaha tydnia Dziaržaŭny kamitet pa raźvićci i reformach Kitaja — klučavoje viedamstva, adkaznaje za ekanamičnuju stratehiju krainy, — vystupiŭ z zajavaj ab nakładańni vieta na ŭhodu pamiž amierykanskim technahihantam Meta (uładalnikam Facebook i Instagram) i startapam Manus, jaki ciapier bazujecca ŭ Sinhapury.
Kitajski rehulatar pryniaŭ aficyjnaje rašeńnie ab zabaronie zamiežnych inviestycyj u prajekt Manus i patrabuje ad usich bakoŭ nieadkładna anulavać praces kupli.
Raspracavany piekinskim startapam Butterfly Effect («Efiekt matyla»), Manus staŭ šyroka viadomy publicy ŭ sakaviku 2025 hoda paśla taho, jak demanstracyjnaje videa jaho pracy stała virusnym u sacyjalnych sietkach. Dastupny dla biznes-klijentaŭ pa indyvidualnych zaprašeńniach, jon chutka vyklikaŭ ažyjataž i vialikuju zacikaŭlenaść.
U adroźnieńnie ad zvykłych čat-botaŭ, takich jak ChatGPT abo kitajski DeepSeek, Manus Manus adnosicca da katehoryi paŭnavartasnych ahientaŭ štučnaha intelektu. Jaho zadača — nie prosta vieści dyjałoh ci adkazvać na pytańni, a samastojna vykonvać kompleksnyja zadačy «ad pačatku i da kanca». Naprykład, jon zdolny aŭtanomna pravodzić sartavańnie reziume abo zajmacca poŭnaj arhanizacyjaj padarožžaŭ i braniravańniem pasłuh biez pakrokavaha ŭdziełu čałavieka.
Jak zaŭvažaje Le Monde, zajava Piekina prahučała na fonie technałahičnaha sapiernictva sa Złučanymi Štatami. Analityki jašče ŭ kancy śniežnia 2025 hoda, kali Meta abviaściła ab dasiahnieńni pahadnieńnia ab kupli Manus, papiaredžvali, što ździełka moža być spynienaja rehulujučymi orhanami KNR. Situacyja abvastryłasia minułym miesiacam, kali hazieta Financial Times paviedamiła, što kitajskija ŭłady zabaranili dvum suzasnavalnikam startapa pakidać miežy krainy.
Raniej Ministerstva zamiežnych spraŭ Kitaja publična staviła Manus u prykład jak uzor paśpiachovych nacyjanalnych inavacyj. Heta adbyłosia ŭśled za inšym siensacyjnym praryvam pačatku 2025 hoda — vychadam madeli łahičnaha myśleńnia R1 ad kampanii DeepSeek.
Infarmacyjnaje ahienctva France-Presse užo źviarnułasia da pradstaŭnikoŭ Meta i Manus pa kamientaryi, adnak na hety momant baki ŭstrymlivajucca ad zajavaŭ. Analityki ŭ svaju čarhu aznačajuć, što błakavańnie ździełki z Meta vyhladaje nie tolki jak ekanamičny krok, ale i jak palityčny sihnał: Kitaj nie hatovy addavać klučavyja technałohii pad kantrol zamiežnych karparacyj.
Kamientary