Piać tendencyj, jakija źmianiajuć suśvietny rynak štučnaha intelektu

Kali try hady tamu daśledčyki vienčurnaj kampanii Andreessen Horowitz (a16z) upieršyniu sprabavali vyznačyć, jakija servisy sa štučnym intelektam sapraŭdy stali masavymi, rynak vyhladaŭ davoli prostym. Isnavała vyraznaja miaža pamiž kampanijami, jakija pieršapačatkova budavalisia vakoł štučnaha intelektu, takimi jak ChatGPT, Midjourney abo Character.AI, — i astatnim softam, jaki tolki pačynaŭ asvojvać novuju technałohiju.

Ciapier, jak adznačajuć aŭtary novaha analizu «Top-100 spažyvieckich prahram z hienieratyŭnym štučnym intelektam» (Top 100 Gen AI Consumer Apps), hetaje adroźnieńnie bolš nie aktualnaje. Štučny intelekt staŭ klučavym elemientam mnohich papularnych servisaŭ. Mienavita tamu ŭ novy analiz byŭ uklučany luby spažyviecki pradukt, dzie hienieratyŭny štučny intelekt staŭ asnoŭnaj častkaj karystalnickaha dośviedu.

Rejtynhi składzieny na padstavie kolkaści ŭnikalnych naviedvańniaŭ sajtaŭ (SimilarWeb) i štomiesiačnaj aŭdytoryi mabilnych prahram (Sensor Tower) pa stanie na studzień 2026 hoda.

Pavialičyć

1. ChatGPT zastajecca lidaram, ale baraćba za status «asnoŭnaha ŠI-pamočnika» tolki pačynajecca

ChatGPT pa-raniejšamu značna apiaredžvaje kankurentaŭ. U internecie jaho aŭdytoryja ŭ 2,7 razu bolšaja, čym u druhoha pa papularnaści servisu — Gemini, a na mabilnych pryładach — u 2,5 raza. Za apošni hod kolkaść štotydniovych karystalnikaŭ ChatGPT vyrasła na 500 miljonaŭ i dasiahnuła kala 900 miljonaŭ — heta bolš za 10% nasielnictva płaniety. Pa abjomie veb-trafiku ChatGPT u 2,5 razu apiaredžvaje svajho najbližejšaha kankurenta Gemini.

Adnak kankurencyja pastupova ŭzmacniajecca. Gemini i Claude chutka naroščvajuć kolkaść płatnych padpisčykaŭ: u 2025 hodzie ŭ ZŠA ich rost skłaŭ 258% dla Gemini i bolš za 200% dla Claude. Nazirajecca tendencyja da multypłatformiennaści: prykładna 20% štotydniovych karystalnikaŭ ChatGPT taksama źviartajucca da Gemini.

Gemini i Claude aktyŭna raźvivajuć ułasnyja ekasistemy i kramy dadatkaŭ, jakija dazvalajuć intehravać štučny intelekt z elektronnaj poštaj, kalendarom i biznes-sistemami, što istotna pavyšaje składanaść pierachodu da inšaha pastaŭščyka pasłuh.

Pavialičyć

Užo zaraz vyrazna vidać, jak płatformy razychodziacca ŭ roznych kirunkach. OpenAI imkniecca zrabić ChatGPT univiersalnym interfiejsam dla miljardaŭ ludziej, pieratvarajučy jaho ŭ «supier-dadatak» dla paŭsiadzionnych spraŭ nakštałt šopinhu, padarožžaŭ ci dohladu za zdaroŭjem. U svaju čarhu Anthropic (Claude) aryjentujecca na najbolš aktyŭnych i prafiesijnych karystalnikaŭ, prapanoŭvajučy ekskluziŭnyja intehracyi ź finansavymi terminałami, navukovymi bazami danych i składanaj infrastrukturaj dla raspracoŭščykaŭ.

U vyniku hetaje supraćstajańnie ŭsio mienš nahadvaje raniejšyja vojny pošukavych sistem z adnym daminujučym hulcom, a stanovicca bolš padobnym da kankurencyi mabilnych apieracyjnych sistem, dzie dźvie roznyja fiłasofii stvarajuć ułasnyja šmatmiljardnyja ekasistemy, što suisnujuć na rynku.

Pavialičyć

2. Try asobnyja ekasistemy

Hieahrafična hłabalny rynak štučnaha intelektu raspadajecca na try asobnyja ekasistemy, pamiž jakimi pastupova pavialičvajecca razryŭ. Zachodnija instrumienty, takija jak ChatGPT, Claude, Gemini i Perplexity, majuć padobnuju bazu karystalnikaŭ u ZŠA, Indyi, Brazilii, Vialikabrytanii i Indaniezii, adnak jany amal nie pradstaŭleny ŭ Kitai i Rasii z-za sankcyj i cenzurnych abmiežavańniaŭ.

Adzinym praduktam, jaki zdoleŭ abjadnać hetyja rynki, staŭ DeepSeek, čyj veb-trafik raźmiarkoŭvajecca pamiž Kitajem, na jaki prypadaje 33,5%, Rasijaj z pakazčykam 7,1% i ZŠA, jakija zabiaśpiečvajuć 6,6% naviedvańniaŭ.

Rasija za karotki termin pieratvaryłasia ŭ treci niezaležny polus rynku, dzie sankcyi paspryjali chutkamu rostu miascovych raspracovak. Tak, braŭzier Yandex z ubudavanym asistentam «Alisa» dasiahnuŭ 71 miljona aktyŭnych mabilnych karystalnikaŭ u miesiac, uvajšoŭšy ŭ suśvietnuju dziasiatku lidaraŭ, a servis GigaChat ad Śbiera ŭpieršyniu trapiŭ u veb-rejtynh. Hetaja situacyja paŭtaraje kitajski dośvied, dzie akramia DeepSeek papularnaściu karystajucca Doubao ad Bytedance i miascovaja madel Kimi.

Kali ž razhladać uzrovień ukaranieńnia technałohij na dušu nasielnictva pavodle śpiecyjalnaha indeksa, hieahrafičnaja karcina vyhladaje inakš.

Pieršaje miesca ŭ śviecie zajmaje Sinhapur, za jakim iduć Abjadnanyja Arabskija Emiraty, Hankonh i Paŭdniovaja Kareja. Pry hetym ZŠA, dzie była stvorana bolšaść papularnych praduktaŭ na asnovie štučnaha intelektu, znachodziacca tolki na dvaccatym miescy ŭ hetym śpisie.

Pavialičyć

3. Tvorčyja instrumienty źmianiajuć pazicyi

Vidavočnaja evalucyja tvorčych prahram na bazie štučnaha intelektu. Kali ŭ vieraśni 2023 hoda 7 z 9 tvorčych instrumientaŭ u śpisie byli hienieratarami malunkaŭ, to praz try hady ich kolkaść skaraciłasia da 3, a volnyja miescy zaniali pradukty dla videa, muzyki i hołasu. Heta adbyłosia z-za intehracyi madelaŭ hienieracyi vyjaŭ niepasredna ŭ ChatGPT i Gemini, praz što papularnaść asobnych prahram upała: naprykład, Midjourney apuściŭsia z top-10 na 46 miesca.

Najbolš dynamičnym siehmientam stała videahienieracyja, dzie lidarstva pa jakaści ŭtrymlivajuć kitajskija raspracoŭki Kling AI i Hailuo.

Pavialičyć

Śfiery muzyki i hołasu akazalisia bolš ustojlivymi da kankurencyi z boku karparacyj: muzyčny servis Suno zachavaŭ svajo 15 miesca, a ElevenLabs niaźmienna prysutničaje ŭ rejtynhach dziakujučy ŭnikalnym funkcyjam kłanavańnia hołasu i dublažu.

Ahulnaja tendencyja pakazvaje, što ŭ tych halinach, dzie Google i OpenAI skancentravali svaje namahańni (vyjavy i videa), trafik asobnych prahram źnižajecca, tady jak u nišach muzyki i hołasu zastajecca bolš prastory dla niezaležnych praduktaŭ.

4. ŠI-ahienty stanoviacca realnaściu

Nastupnaja tendencyja, jakuju adznačajuć aŭtary, — heta pierachod ad zvyčajnych čat-botaŭ da razumnych ličbavych pamočnikaŭ — ŠI-ahientaŭ. U adroźnieńnie ad zvykłaha štučnaha intelektu, jaki prosta adkazvaje na pytańni ci maluje karcinki, hetyja prahramy mohuć samastojna vykonvać za vas składanuju paśladoŭnuju pracu: naprykład, pravieści daśledavańnie, zapoŭnić tablicy ci spłanavać spravy.

Hetaja śfiera raźvivajecca vielmi chutka: kampanija Meta zapłaciła kala 2 miljardaŭ dalaraŭ za pamočnika Manus, a stvaralniki ChatGPT nabyli prajekt OpenClaw, jaki staŭ nievierahodna papularnym u pačatku 2026 hoda. Novyja padobnyja servisy, jak Genspark, užo pryciahvajuć sotni miljonaŭ dalaraŭ inviestycyj.

Dla mnohich ludziej takija pamočniki stanoviacca častkaj paŭsiadzionnaha žyćcia, bo imi možna karystacca praz zvyčajnyja paviedamleńni ŭ WhatsApp ci Telegram. Ciapier hałoŭnaje pytańnie palahaje ŭ tym, ci stanuć hetyja vuzkaśpiecyjalizavanyja ahienty asnoŭnymi instrumientami, ci karystalniki addaduć pieravahu ŭžo znajomym ChatGPT, Claude i Gemini.

Pavialičyć

5. Štučny intelekt vychodzić za miežy braŭzieraŭ i prahram

Apošniaja važnaja tendencyja zaklučajecca ŭ tym, što štučny intelekt pierastaje być prosta asobnym sajtam ci mabilnaj prahramaj. Ciapier značnaja častka jaho vykarystańnia adbyvajecca tam, dzie tradycyjnyja rejtynhi nie mohuć jaho zafiksavać.

Pa-pieršaje, sami internet-braŭziery pieratvarajucca ŭ pradukty štučnaha intelektu. Za apošni hod OpenAI zapuściła braŭzier Atlas z ubudavanym ChatGPT, Perplexity — Comet, a Browser Company — Dia. Zamiest stvareńnia novych braŭzieraŭ Google i Anthropic vyrašyli ŭkaranić svaich pamočnikaŭ Gemini i Claude niepasredna ŭ papularny Chrome.

Značny rost pakazali kampjutarnyja prahramy dla prafiesijanałaŭ. Claude Code dasiahnuŭ hadavoha dachodu kala $1 miljarda za šeść miesiacaŭ, a Codex ad OpenAI nabraŭ 2 miljonaŭ štotydniovych karystalnikaŭ. Siarod zvyčajnych karystalnikaŭ papularnaść nabyli prahramy dla aŭtamatyčnaha stvareńnia natatak i zapisu sustreč (naprykład, Fireflies, Otter, Granola), jakija razam majuć 20 miljonaŭ naviedvalnikaŭ.

Narešcie, štučny intelekt staŭ ubudavanaj funkcyjaj u tych instrumientach, jakimi my karystajemsia štodzień. Ciapier Claude i ChatGPT pracujuć niepasredna ŭnutry Excel i PowerPoint.

Google hłyboka intehravała Gemini ŭ svaje dakumienty, elektronnuju poštu i tablicy, a ŭ studzieni 2026 hoda zapuściła sistemu «Piersanalny intelekt». Heta dazvalaje pamočniku bačyć vašy braniravańni hatelaŭ u pošcie, asabistyja fotazdymki i historyju prahladaŭ na YouTube, kab dapamahać vam bieź lišnich tłumačeńniaŭ.

U vyniku tradycyjnyja rejtynhi naviedvalnaści sajtaŭ usio mienš adlustroŭvajuć realnaść, bo štučny intelekt pieratvarajecca z asobnaha servisu ŭ niabačnuju, ale karysnuju funkcyju ŭnutry kožnaj prahramy.

• 7
• 1
• 2
• 0
• 0
• 0
• 0
• 0