Mahutnaja ataka dronaŭ na Maskvu i vobłaść. Jość achviary, haryć naftanaliŭnaja stancyja
U noč na 17 maja Maskoŭski rehijon zaznaŭ adnu z samych masiravanych atak bieśpiłotnikaŭ.
Pavodle źviestak rasijskich uładaŭ, tolki ŭ niepasrednaj blizkaści ad stalicy za sutki było źbita bolš za 120 bieśpiłotnikaŭ.
Pavodle OSINT-analizu vydańnia ASTRA, u vyniku načnoha vybuchu zaharełasia Soniečnahorskaja naliŭnaja stancyja. Hety bujny abjekt uvachodzić u sistemu mahistralnych naftaprovadaŭ vakoł Maskvy i vykarystoŭvajecca dla zachoŭvańnia i adhruzki bienzinu i dyzielnaha paliva.
Pažar taksama ŭ technaparku «Ełma» (Zielenahrad). Tam pracujuć bolš za 150 rezidentaŭ, jakija śpiecyjalizujucca na vytvorčaści mikraelektroniki, aptyčnaj techniki i navukovych raspracoŭkach, piša ASTRA.
Na hety čas viadoma pra troch zahinułych u Padmaskoŭi. U Chimkach dron trapiŭ u pryvatny dom — zahinuła žančyna. U Myciščach abłomki BPŁA zabili dvuch mužčyn na budoŭli.
U Krasnahorsku i Istry bieśpiłotniki paškodzili šmatkvaternyja damy, a ŭ pasiołku Ahraharadok pad udar trapili šeść pryvatnych damoŭ, dzie paranienyja čatyry čałavieki.
U samoj Maskvie paranieny najmienš 12 čałaviek.
Pavodle zajavy Minabarony RF, ahułam SPA źniščyli 556 ukrainskich BPŁA. Drony byli źbityja nad terytoryjami Biełharadskaj, Kałužskaj, Kurskaj, Arłoŭskaj, Branskaj, Varoniežskaj, Tulskaj, Smalenskaj, Pskoŭskaj, Lipieckaj, Ćviarskoj, Rastoŭskaj abłaściej, Krasnadarskaha kraju, Maskoŭskaha rehijonu, anieksavanaha Kryma, akvatoryjami Čornaha i Azoŭskaha moraŭ.
Kamientary
Dumali budietie hrabiť Ukrainu, ubivať ukrainciev i vam za eto ničieho nie budiet, ničieho nie priletit v otviet ?