Padčas maštabnaj načnoj ataki bieśpiłotnikaŭ na Maskoŭski rehijon paciarpieŭ mižnarodny aeraport Šaramiećcieva. Na jaho terytoryi zafiksavana ŭzharańnie, a ŭ pasažyrskich terminałach uvodzilisia ekstrannyja miery biaśpieki.
Pavodle analizu vydańnia ASTRA, pažar uźnik u rajonie treciaj uźlotna-pasadačnaj pałasy, adnak dakładny abjekt paražeńnia pakul nie viadomy.
Kiraŭnictva aeraporta aficyjna paćvierdziła «padzieńnie abłomkaŭ BPŁA», ale zajaviła, što jany znachodziacca na biaśpiečnaj adlehłaści ad samalotaŭ, paciarpiełych niama, a praca praciahvajecca ŭ stabilnym režymie.
Adnak vidavočcy apisvajuć situacyju ŭnutry aeravakzała zusim inakš. Pavodle słoŭ pasažyraŭ, na momant ataki supracoŭniki kram i stojek rehistracyi pakinuli svaje pracoŭnyja miescy, asnoŭnaje tabło rejsaŭ było adklučana, a praz hučnuju suviaź ludziej zaklikali zachoŭvać spakoj i terminova adyści ad voknaŭ.
«Usie supracoŭniki, jakija pracavali na stojkach rehistracyi i ŭ kramach — pakinuli svaje pracoŭnyja miescy. Było vyklučana asnoŭnaje tabło, tolki rekłama kruciłasia. Praz hučnahavaryciel prasili zachoŭvać spakoj i adyści ad voknaŭ», — raskazaŭ pra abstanoŭku ŭ aeraporcie ŭ momant ataki čytač ASTRA.
Bližejšyja rejsy «Minsk-Maskva» (Šaramiećcieva) admienienyja ci adkładzienyja.
Kamientary