Na śmietnicy pad Maskvoj samazvał naśmierć źbiŭ 61‑hadovuju biełarusku. Kiroŭcu adpuścili ŭ zale suda
Jana išła ŭładkoŭvacca na pracu.
Padolski haradski sud Maskoŭskaj vobłaści pryznaŭ vinavatym kiroŭcu samazvała, jaki ŭ kancy 2024 hoda naśmierć źbiŭ 61‑hadovuju hramadzianku Biełarusi na palihonie pa pierapracoŭcy budaŭničych adychodaŭ pad Padolskam. Heta vynikaje z tekstu prysudu.
Žančyna pryjechała ŭ Rasiju na zarobki. Žyła ŭ internacie, pracavała sartavalščycaj na śmietnicy, a ŭ apošni čas sprabavała ŭładkavacca tudy znoŭku — paśla taho jak adjazdžała ŭ Biełaruś pa asabistych spravach. Na momant hibieli aficyjna aformlenaja na pracu jana jašče nie była.
Pavodle materyjałaŭ spravy, kiroŭca samazvała Shacman, hramadzianin Kyrhyzstana, pavaročvaŭ naprava, kab razhruzić budaŭničaje śmiećcie. Žančyna ŭ hety momant išła ŭzdoŭž pravaha boku mašyny — u ślapoj zonie ahladu. Kiroŭca začapiŭ jaje pravym bokam aŭtamabila, jana ŭpała, paśla čaho jon pierajechaŭ jaje zadnimi kołami. Žančyna zahinuła na miescy ad mnostva pierałomaŭ i razryvaŭ unutranych orhanaŭ. Ałkaholu i narkotykaŭ u jaje kryvi ekśpiertyza nie vyjaviła.
Kiroŭca vinu nie pryznaŭ. Jon śćviardžaŭ, što nie bačyŭ žančynu praź ślapuju zonu, a jaho rucham kiravaŭ bryhadzir, jaki pakazvaŭ, kudy jechać. Sud hetyja dovady adchiliŭ: pavodle prysudu, kiroŭca pierad pačatkam ruchu nie pierakanaŭsia ŭ biaśpiecy manieŭra i ŭ adsutnaści piešachodaŭ, nie ŭklučyŭ pavarotnik, nie źniziŭ chutkaść i nie padaŭ hukavy sihnał.
Pradstaŭnicaj zahinułaj u sudzie spačatku była jaje siabroŭka i ziamlačka — taksama hramadzianka Biełarusi. Pavodle jaje pakazańniaŭ, rodzičy zahinułaj admovilisia pryjazdžać u Rasiju, kab zabrać cieła i arhanizavać pachavańnie, i nie cikavilisia spravaj; za ŭvieś čas jany ni razu nie źviarnulisia ŭ pravaachoŭnyja orhany. Sama siabroŭka kazała, što nie choča dla kiroŭcy realnaha źniavoleńnia i hatovaja na prymireńnie, paśla čaho źjechała ŭ Biełaruś. Kab pradstavić intaresy zahinułaj, sud pryciahnuŭ miascovy orhan sacyjalnaha raźvićcia.
Sud kvalifikavaŭ dziejańni kiroŭcy jak parušeńnie PDR, što paciahnuła pa nieaściarožnaści śmierć čałavieka (č. 3 art. 264 KK RF), i pryznačyŭ hod i miesiac pazbaŭleńnia voli ŭ kałonii-pasialeńni.
Z ulikam terminu, jaki kiroŭca ŭžo pravioŭ pad vartaj, sud paličyŭ pakarańnie adbytym — realna za kraty jon nie traplaje. Na ŭtrymańni ŭ jaho troje małaletnich dziaciej.
Ciapier čytajuć
Prapahandysty zapeŭnivajuć, što 196 palitviaźniaŭ užo na svabodzie9
Kamientary