«Dyk što vam jašče treba, šanoŭnyja kiraŭniki EHU?» Sieviaryniec zaklikaŭ biełarusizavać univiersitet, pakul nie pozna

Pra EHU treba stavić pytańnie rubam: terminova i rašuča pieratvarać EHU ŭ hałoŭnuju adukacyjnuju bazu biełaruskaha ruchu.

Jak i varta było čakać ad pačatku, režym pryznaŭ EHU «ekstremisckim», studentaŭ i ich baćkoŭ masava trasuć i dapytvajuć.

Dyk što vam jašče treba, šanoŭnyja kiraŭniki EHU? Čaho vy ciapier baiciesia? Pieramienaŭ? Čamu my bačym biaskoncyja relizy, što ŭsio narmalna, pracujem dalej jak i zaŭždy?

U EHU jość unikalny šaniec vychavać budučych prezidentaŭ i ministraŭ volnaj Biełarusi. Biełaruskamoŭnych. Ź jeŭrapiejskim uzroŭniem adukacyi. Adkrytych, śmiełych. U 2020 hodzie ŭsia Biełaruś uźniałasia, a EHU jak lažaŭ, tak i lažyć na dnie. Baicca ŭzdychnuć. Baicca mianiacca. Sucelnaja depresiŭnaja rasiejskamoŭnaja nudota apošnija hady.

EHU — heta naohuł pra što? Pra kaho? Bolšaść studentaŭ ź Biełarusi, ale što va ŭniviersitecie pra Biełaruś? Što tam pa-biełarusku? Jakija kadry rychtuje ŭniviersitet, kali ŭsio zastaniecca tak, jak ciapier?

Ja liču, adzinaje vyjście dla EHU siońnia — stanavicca elitnaj vyšejšaj škołaj dla biełarusaŭ zamiežža.

Kali nie rabić kardynalnych krokaŭ i pierakonvać usich, što «pracujem u zvyčajnym režymie», skončycca tym, što EHU albo začynicca, albo pieratvorycca ŭ adzin z zaštatnych, nikomu nie patrebnych biezabličnych «varyjantaŭ» dla tych, chto nie trapiŭ u prestyžnyja albo navat siarednija rehijanalnyja VNU.

Da 14 krasavika bajalisia, što pryznajuć ekstremistami. Curalisia «śviacicca». Usio, pryznali. Trasuć ludziej. Kryminalnyja spravy.

Ciapier bajacca niama čaho. Ciapier treba realna śviacić. I adkryta kazać Jeŭropie, jakaja ŭsie hetyja hady padtrymlivała EHU: patrebnaja kuźnia kadraŭ dla biełaruskich pieramienaŭ.

Jašče z kanca 1990‑ch biełarusy maryli pra sapraŭdy biełaruski ŭniviersitet, jaki maje rychtavać elitnyja kadry dla budučaj, demakratyčnaj Biełarusi.

Skažacie, chto ź biełarusaŭ zamiežža budzie addavać dziaciej u biełaruski apazicyjny EHU? Va ŭniviersitet, dzie pa-biełarusku vykładajuć Aleś Bialacki, Uładzimir Arłoŭ, Lavon Volski, Kaciaryna Vadanosava, Vincuk Viačorka, Pavieł Cieraškovič, Cimoch Akudovič — buduć.

Mianie pytajuć, kudy pastupać dzieciam 2020 hoda? Ciapier, kali ŭ samoj Biełarusi hromiać i biełaruskuju adukacyju, i kulturu, dziasiatki tysiačaŭ maładych biełarusaŭ i ŭ krainie, i za miažoj marać pra najlepšy ŭnivier u śviecie. Svoj.

Nu, słuchajcie, užo sam režym vypisvaje EHU «čaroŭnaha piendala». Niaŭžo i ciapier znoŭ zrobim vyhlad, što EHU — heta nie dla nas i nie pra nas? 

Ahu, EHU! Davajcie mianiacca! Davajcie pracavać dziela volnaj Biełarusi!

• 33
• 2
• 5
• 2
• 0
• 0
• 1
• 3