«Na śvitańni pačynajecca ekanamičny «Dzień D» — najbujniejšy finansavy nastup, kali-niebudź arhanizavany suprać praciŭnika», — napisaŭ Skot Biesent.
ZŠA ŭžo asłabili vajenny patencyjał Irana, ciapier Vašynhton zabiaśpiečyć «dzień D» dla iranskaj ekanomiki. Pra heta ŭ artykule dla The Financial Times napisaŭ kiraŭnik Ministerstva finansaŭ ZŠA Skot Biesent.
«Prezident Donald Tramp i pieravažnaja moc našych uzbrojenych sił značna padarvali vajenny patencyjał Irana i asłabili jaho jadziernuju prahramu. Ciapier my ŭstupajem u finalnuju stadyju. Na śvitańni pačynajecca ekanamičny «Dzień D» — najbujniejšy finansavy nastup, kali-niebudź arhanizavany suprać praciŭnika», — napisaŭ ministr finansaŭ.
Biesent adznačyŭ, što ekanomika Irana asłablena da miažy, ale Tehieran usio jašče raźličvaje na dapamohu inšych krain. Pamočniki Irana, jak piša ministr, kuplajuć jaho naftu, absłuhoŭvajuć finansavyja patoki i zapluščvajuć vočy na niezakonnyja apieracyi.
«Prezident Tramp robić toje, ad čaho admaŭlalisia jaho papiaredniki», — skazaŭ jon. Na dumku Biesenta, poŭnaja finansavaja izalacyja Irana zdolnaja likvidavać nieabchodnaść prymianieńnia vajennaj siły.
Pavodle słoŭ Biesenta, tyja, chto razarvie suviazi z Tehieranam, umacujuć ułasnyja ekanomiki, a tyja, chto zastaniecca ekanamična pryviazanym da Tehierana, «padzielać jaho izalacyju».
«Stać schoviščam dla teroru — značyć stać u vačach Złučanych Štataŭ suśvietnym izhojem», — papiaredžvaje Biesent.
Pieršapačatkova «Dzień D» u historyi — heta vysadka amierykancaŭ, brytancaŭ i kanadcaŭ 6 červienia 1944 hoda ŭ Narmandyi, što pryviało ŭ vyniku da poŭnaha vyzvaleńnia Zachodniaj Jeŭropy ad nacystaŭ. Potym «Dzień D» — heta ŭ vajennaj terminałohii dzień pačatku bujnoj vajennaj apieracyi.
Ciapier čytajuć
Mistyčnaje koła Vilni: Kalinoŭski byŭ pachavany ź miedaljonam śviatyni, kala jakoj vyras hatyčny pałac doktara z-pad Oršy. Ciapier pareštki Kalinoŭskaha pierapachavali ŭ mahilni taho ž doktara1
Kamientary