U Tbilisi znajšli miortvym abchazskaha błohiera, jaki vystupaŭ za prymireńnie z Hruzijaj
31‑hadovaha Daura Buavu, adnaho z najbolš viadomych abchazskich błohieraŭ i prychilnikaŭ prymireńnia pamiž hruzinami i abchazami, znajšli miortvym u kvatery ŭ Tbilisi, dzie jon žyŭ. Apošni raz kamiery nazirańnia zafiksavali jaho 23 žniŭnia. Praź niekalki dzion susiedzi źviarnulisia ŭ palicyju, adčuŭšy mocny pach z kvatery, piša Ruskaja słužba Bi-bi-si.
Dakładnaja pryčyna śmierci pakul nie ŭstanoŭlenaja. Śledčyja pravodziać ekśpiertyzu i rasśledavańnie. Padčas pieršasnaha ahladu cieła śladoŭ hvałtu nie vyjavili. Sprava rasśledujecca, u pryvatnaści, pa artykule ab daviadzieńni da samahubstva.
Śmierć błohiera vyklikała vialiki rezanans u Hruzii. Ludzi nazyvajuć jaho «pasłom miru» i «mostam pamiž hruzinskim i abchazskim narodami». Znajomaja Buavu, dyrektarka Centra sacyjalnaj spraviadlivaści Tamta Mikieładze, zaklikała śledstva staranna vyśvietlić abstaviny jaho śmierci. Jana adznačyła, što błohier atrymlivaŭ šmat pahroz praz svaje pohlady.
Buava naradziŭsia ŭ Abchazii, vučyŭsia i niekatory čas žyŭ u Rasii, ale paźniej viarnuŭsia ŭ rodny rehijon. U 2021 hodzie jon pryjechaŭ u Tbilisi i mienavita tam istotna źmianiłasia jaho staŭleńnie da hruzinaŭ. Raniej jon usprymaŭ ich jak vorahaŭ, ale paśla žyćcia ŭ Tbilisi zajaviŭ, što nie ŭbačyŭ u hruzinskim narodzie varožaści, tamu vyrašyŭ zastacca ŭ Hruzii.
Błohier adkryta vystupaŭ za prymireńnie abchazaŭ i hruzinaŭ i padtrymlivaŭ ideju znachodžańnia Abchazii ŭ składzie Hruzii na pravach aŭtanomii. U adnym ź jaho najbolš viadomych videa jon vyjšaŭ na praśpiekt Rustavieli ŭ Tbilisi z płakatam: «Ja abchaz. Kali vy ličycie, što my braty — abdymicie mianie». Da jaho padychodzili minaki roznych uzrostaŭ i abdymali jaho.
Pazicyja Buavy vyklikała rezkuju reakcyju ŭ Abchazii. U 2022 hodzie miascovaja słužba dziaržaŭnaj biaśpieki zaviała suprać jaho kryminalnuju spravu pa artykule ab «dziaržaŭnaj zdradzie», zajaviŭšy, što jaho videa ŭ tyktoku nibyta škodziać suvierenitetu i biaśpiecy Abchazii. U śniežni taho ž hoda błohier atrymaŭ hramadzianstva Hruzii pa sproščanaj pracedury.
Buava mieŭ bolš za 100 tysiač padpisčykaŭ u tyktoku, kala 57 tysiač u fejsbuku i amal 23 tysiačy ŭ instahramie. Jon ličyŭ, što mienavita moładź pa abodva baki raki Inhury moža adyhrać važnuju rolu ŭ mirnym urehulavańni hruzinska-abchazskaha kanfliktu.
Abchazija faktyčna adździaliłasia ad Hruzii paśla vajny 1992‑1993 hadoŭ. U 2008 hodzie Rasija pryznała jaje niezaležnaść, adnak Hruzija ličyć rehijon akupavanaj Rasijaj terytoryjaj, a bolšaść krain śvietu pryznaje Abchaziju častkaj Hruzii.
Ciapier čytajuć
Viktar Łukašenka zaśviaciŭ na pasiadžeńni NAK svoj hadzińnik — ciažki luks4
Viktar Łukašenka zaśviaciŭ na pasiadžeńni NAK svoj hadzińnik — ciažki luks
«Čas, jaki patrabuje nadzvyčajnaj aściarožnaści». Polski vunderkind, jaki staŭ hałoŭnym navukoŭcam OpenAI, patłumačyŭ, čamu mienavita zaraz ŠI moža vyrvacca z-pad kantrolu77
Kamientary