Maryja Šarapava pryjechała na Homielščynu

Viadomaja rasijskaja tenisistka, 17‑ia rakietka śvietu Maryja Šarapava, jakaja zaviaršyła svoj udzieł va Uimbłdonskim turniry, prylacieła 30 červienia ź Vialikabrytanii ŭ Homiel. U jakaści pasła dobraj voli Prahramy raźvićcia AAN jana naviedaje terytoryi, što paciarpieli ad katastrofy na Čarnobylskaj AES.

Šarapava prybyła ŭ Homiel čarternym rejsam razam z kiraŭnikom pradstaŭnictva Jeŭrasajuza ŭ Biełarusi i va Ukrainie Žaze Manuelem Pintu Tejšejram.

Jak paviedamiŭ BiełaPAN kaardynatar infarmacyjnaj dziejnaści PRAAN u Biełarusi Uładzisłaŭ Chilkievič, u Homielskaj vobłaści dabračynny fond Maryi Šarapavaj dapamoh prafinansavać šerah prajektaŭ PRAAN, aryjentavanych na moładź. Pavodle infarmacyi pres‑słužby Homielskaha abłvykankama, vizit spartsmienki pačniecca z naviedvańnia horada Čačerska, dzie zapłanavana jaje sustreča z pradstaŭnikami rajonnaj vykanaŭčaj ułady. Šarapava aznajomicca z prajektam «Chvareć nie strašna», jaki realizoŭvajecca za jaje srodki ŭ Čačerskaj centralnaj rajonnaj balnicy — tut vykarystoŭvajecca terapieŭtyčny padychod da baraćby sa stresam. Zatym hościa naviedaje centr dziciačaj tvorčaści, dzie dzieci vyvučajuć ekałohiju i ŭdzielničajuć u dobraŭparadkavańni horada ŭ miežach prafinansavanaha spartsmienkaj prajekta «Ekałohija dušy». 1 červienia ŭ Homieli ŭ Biełaj haścioŭni pałaca Rumiancavych i Paskievičaŭ Šarapava sustreniecca z atrymalnikami stypiendyi zasnavanaha joju fondu, a paśla daść majstar‑kłas pa tenisie.

Viadomaja rasijanka stała pasłom dobraj voli PRAAN u 2007 hodzie. Jaje rola zaklučajecca ŭ sadziejničańni dasiahnieńniu Metaŭ raźvićcia tysiačahodździa z akcentam na aktyvizacyju adnaŭleńnia terytoryj, što paciarpieli ad čarnobylskaj avaryi.

U partniorstvie z PRAAN fond Maryi Šarapavaj akazaŭ padtrymku siami prajektam, jakija aryjentujucca na moładź i realizavanyja ŭ paciarpiełych rehijonach Biełarusi, Rasii i Ukrainy. Fond taksama finansuje ŭ Biełarusi prahramu stypiendyj dla studentaŭ, vychadcaŭ z zabrudžanych radyjenuklidami rajonaŭ.

«Ja zaŭsiody maryła zrabić svoj uniosak u praces adnaŭleńnia rehijonu, ź jakim u mianie asabistaja suviaź, — zajaŭlała raniej Maryja Šarapava, jakaja maje siamiejnyja karani ŭ Homieli. — Davańnie maładym ludziam instrumientaŭ, nieabchodnych dla dasiahnieńnia ich mary, — heta dobry sposab pieraadoleńnia spadčyny Čarnobyla. Dapamahčy ludziam navučycca dapamahać samim sabie — heta sutnaść misii PRAAN, i ja ź nieciarpieńniem čakaju mahčymaści na svaje vočy ŭbačyć vyniki».

***

Maryja Šarapava naradziłasia ŭ 1987 hodzie ŭ horadzie Niahań u Sibiry, kudy jaje baćki pierajechali z Homiela paśla čarnobylskaj katastrofy. Pražyŭšy dva hady ŭ Niahani, siamja pierabrałasia ŭ Sočy. U 1995 hodzie Šarapava pakinuła Rasiju, kab zajmacca tenisam u ZŠA. U 2004 hodzie jana vyjhrała svoj pieršy turnir Vialikaha Šlema va Uimbłdonie i była pryznana hulcom hoda pa viersii Žanočaj tenisnaj asacyjacyi. U 2006 hodzie Maryja stała pieramožnicaj Adkrytaha čempijanatu ZŠA, a ŭ 2008‑m — vyjhrała Adkryty čempijanat Aŭstralii.

• 0
• 0
• 0
• 0
• 0
• 0
• 0
• 0