Kanada viadzie kułuarnyja pierahavory ab statusie asacyjavanaha siabra Jeŭrasajuza
Handlovaja vajna z Vašynhtonam i rytoryka amierykanskaha prezidenta pra dałučeńnie susiedniaj krainy ŭ jakaści čarhovaha štata spravakavali hieapalityčny razvarot Atavy. Kanadski ŭrad pačaŭ biesprecedentnyja pierahavory z Brusielem, sprabujučy vyrvacca z-pad tatalnaj ekanamičnaj zaležnaści ad ZŠA praz ščylnuju intehracyju ź jeŭrapiejskim rynkam.
Jak paviedamlaje The Wall Street Journal, premjer-ministr Kanady Mark Karni inicyjavaŭ kułuarnyja kansultacyi ź jeŭrapiejskimi lidarami ab nadańni jaho krainie statusu «asacyjavanaha siabra» Jeŭrasajuza.
Brusiel nikoli raniej nie prapanoŭvaŭ padobnaha farmatu dla transatłantyčnych partnioraŭ, adnak maštabny ekanamičny kanflikt u Paŭnočnaj Amierycy prymušaje abodva baki šukać niestandartnyja rašeńni.
Adnosiny dźviuch krain, ZŠA i Kanady, mocna pahoršylisia paśla viartańnia Donalda Trampa ŭ Bieły dom u pačatku 2025 hoda: ZŠA ŭviali žorstkija pošliny, a sam Tramp nieadnarazova publična prapanoŭvaŭ Kanadzie stać « 51‑m štatam». Karni na heta kateharyčna adkazaŭ, što jaho kraina nie pradajecca, i zapatrabavaŭ ad amierykanskaha kiraŭnictva «spynić rabić miemy» zamiest narmalnaj dypłamatyi.
Zamiest taho kab sastupać ekanamičnamu cisku Vašynhtona, jaki pahłynaje bolš za 70 pracentaŭ kanadskaha ekspartu, kanadski ŭrad uziaŭ kurs na deamierykanizacyju klučavych halin.
Ahienctva Reuters piša pra abmierkavańnie biesprecedentnaha ŭzroŭniu intehracyi: ad svabodnaha, biaźvizavaha pieramiaščeńnia rabotnikaŭ da źlićcia stratehičnych łancužkoŭ pastavak u halinie enierhietyki, štučnaha intelektu i zdabyčy krytyčnych minierałaŭ.
Kanada płanuje budavać sumiesnyja ź Jeŭropaj data-centry, prakładać padvodnyja internet-kabieli i stvarać novyja spadarožnikavyja sietki, kab pazbavicca zaležnaści ad amierykanskich technałahičnych hihantaŭ.
Dziela dasiahnieńnia hetaj mety Karni vykarystoŭvaje svoj brytanski mabilny numar dla pramych niefarmalnych pierapisak z Emaniuelem Makronam, Džordžaj Miełoni i niamieckim kancleram Frydrycham Miercam, pierakonvajučy ich, što
«Kanada — samaja jeŭrapiejskaja ź niejeŭrapiejskich krain».
Demanstracyjaj novaha viektara stanie majučy adbycca vizit Marka Karni ŭ Strasbur, dzie jon pavinien pradstavić svajo bačańnie jeŭrapiejska-kanadskaha aljansu pierad Jeŭraparłamientam. Adrazu paśla hetaha, 20 vieraśnia, kanadski premjer sustreniecca z prezidentam Francyi na archipiełahu Sien-Pjer i Mikiełon — zamorskaj francuzskaj terytoryi la samaha ŭźbiarežža Kanady.
Palityčny padtekst hetaj sustrečy vidavočny. Napiaredadni Donald Tramp apublikavaŭ u svajoj sacyjalnaj sietcy kartu Paŭnočnaj Amieryki, dzie pravakacyjna nakłaŭ amierykanski ściah nie tolki na Kanadu, Mieksiku i Hrenłandyju, ale i na francuzskija ŭładańni.
Sumiesny vizit jeŭrapiejskaha i kanadskaha lidaraŭ zaklikany prademanstravać Vašynhtonu niepachisnaść suvierennych miežaŭ i hatoŭnaść sajuźnikaŭ baranić svaju ekanamičnuju i palityčnuju niezaležnaść.
Adnak ambicyjnyja płany Atavy niepaźbiežna sutykajucca ź jeŭrapiejskaj biurakratyčnaj realnaściu. Dahavor ab svabodnym handli pamiž ES i Kanadaj (CETA), padpisany jašče dziesiać hadoŭ tamu, dahetul nie ratyfikavany dziesiaćciu jeŭrapiejskimi dziaržavami praz unutranyja sprečki vakoł kvot na sielskahaspadarčuju pradukcyju.
Tym nie mienš šancy na pośpiech zastajucca: raniej kancler Hiermanii Frydrych Mierc užo prapanoŭvaŭ kancepcyju «asacyjavanaha siabroŭstva» dla Ukrainy, što stvaraje nieabchodny jurydyčny i idejny precedent dla realizacyi jeŭrapiejskaj mary Kanady ŭ abychod kłasičnaj, zanadta doŭhaj pracedury ŭstupleńnia ŭ ES.
Brat biełaruskaj karalevy pryhažości trapiŭ u reanimacyju ŭ Azierbajdžanie4
Brat biełaruskaj karalevy pryhažości trapiŭ u reanimacyju ŭ Azierbajdžanie
Małady biełarus nie chacieŭ siadzieć u Rasii za narkotyki, tamu prydumaŭ, jak chutka vyjści z kałonii — i vyjšaŭ na ŭkrainskija pazicyi pad Pakroŭskam44
Kamientary