«Pracuju, ale nie mahu kupić ježu». U ajcišnika ŭ Polščy skončyŭsia termin dziejańnia pašparta — zaraz jon u pastcy

«Ja vyrašyŭ napisać, tamu što ŭ Polščy składvajecca davoli strašnaja situacyja z zamiežnikami, jakija hadami čakajuć rašeńnia ab DNŽ.

Pakul dziaržava razhladaje dakumienty, u ludziej zakančvajucca pašparty, karty pobytu i inšyja dakumienty — a dalej jany traplajuć u biurakratyčnaje zamknionaje koła, ź jakoha, zdajecca, nichto nie viedaje vyjścia.

Spačatku ja dumaŭ, što moj vypadak niejki vyklučny. Ale kali pačaŭ pytacca ŭ čatach i supołkach zamiežnikaŭ u Polščy, vyśvietliłasia, što z padobnymi prablemami sutykajecca mnostva ludziej.

U maim vypadku ŭsio dajšło da absurdu: ja lehalna žyvu i pracuju ŭ Polščy, atrymlivaju zarobak i płaču padatki — ale ciapier faktyčna zastaŭsia biez narmalnaha dostupu da zaroblenych hrošaj. Mnie ŭžo stanovicca niama čym płacić za kvateru i kuplać ježu.

A pačałosia ŭsio sa zvyčajnaj zajavy na novy DNŽ.

U vieraśni 2025 hoda ja padaŭ dakumienty. U vydadzienaj mnie daviedcy było paznačana, što rašeńnie čakajecca ŭ siaredzinie śniežnia 2025 hoda. Ciapier vierasień 2026‑ha — rašeńnia da hetaha času niama.

Za hety čas skončyŭsia termin dziejańnia majho biełaruskaha pašparta. Raniej, z-za niemahčymaści atrymać novy pašpart, mnie vydali polski prajazny dakumient dla zamiežnika. Pakul ja čakaŭ rašeńnia pa DNŽ, skončyŭsia i termin jaho dziejańnia, jak i majoj staroj karty pobytu.

Paśla hetaha banki abmiežavali mnie dostup da rachunkaŭ z-za adsutnaści sapraŭdnaha dakumienta.

Ja praciahvaju pracavać, zarobak pastupaje na moj rachunak u biznes-inkubatary, ale narmalna atrymać jaho ja nie mahu: dla hetaha mnie treba vyvieści hrošy na asabisty polski bankaŭski rachunak, dostup da jakoha zabłakavany.

Ja pasprabavaŭ padać zajavu na novy polski prajazny dakumient. Va ŭpraŭleńni admovilisia jaje pryniać, spasłaŭšysia na adsutnaść sapraŭdnaj karty pobytu.

Ale karty pobytu ŭ mianie niama mienavita tamu, što ja amal hod čakaju rašeńnia pa DNŽ.

Nie, u banku PKO pryniali štamp ab padačy dakumientaŭ, ale patrebny jašče adzin dakumient, jaki paćviardžaje asobu. Prajazny dakumient pracavaŭ, pakul nie skončyŭsia termin jaho dziejańnia. A na druhi prajazny dakumient u mianie nie chočuć prymać zajavu bieź dziejnaj karty DNŽ.

Atrymlivajecca niejkaje zamknionaje koła: dziaržava nie paśpiavaje razhledzieć tvaje dakumienty, za čas čakańnia astatnija dakumienty zakančvajucca, banki błakujuć rachunki, atrymać zarobak stanovicca niemahčyma, a novy dakumient tabie nie dajuć atrymać z-za adsutnaści dakumienta, jaki tabie jašče nie vydała dziaržava.

I ŭvieś hety čas čałavieku treba dzieści žyć i niešta jeści.

Ciapier ja ŭžo ŭsurjoz dumaju pra toje, što budzie, kali pryjdzie čas nastupnaj apłaty kvatery.

Hrošaj na ježu taksama praktyčna nie zastałosia.

Dachodzić da dumak, dzie znajści biaspłatnuju ježu abo jak atrymać chacia b niekalki złotych hatoŭkaj. Navat butelki asabliva nie naźbiraješ i nie zdasi, jak heta možna zrabić u niekatorych inšych krainach.

To-bok čałaviek pracuje ŭ IT, płacić padatki, svoječasova padaŭ dakumienty — i ŭ vyniku moža apynucca bieź ježy i na vulicy prosta tamu, što niekalki dziaržaŭnych i finansavych sistem pamiž saboj nie praduhledžvajuć narmalnaha vyjścia z takoj situacyi.

I, miarkujučy z taho, što raskazvajuć inšyja zamiežniki, ja daloka nie adziny.

Mnie zdajecca, heta ŭžo nie historyja pra moj kankretny DNŽ, a pytańnie pra toje, što ŭvohule pavinien rabić čałaviek, jaki apynuŭsia ŭ takoj biurakratyčnaj pastcy», — reziumuje jon.

• 6
• 0
• 3
• 4
• 4
• 19
• 16
• 0