Najbujniejšaj u śviecie fan-supolnaściu Łedzi Hahi kiruje chłopiec ź Minska, jaki adsiedzieŭ za pratesty. Rasijanie paśpiašalisia zapisać jaho ŭ svaje
Dopis uładalnika fan-prajekta śpiavački pra svajo źniavoleńnie za ŭdzieł u pratestach suprać niesvabody vyklikaŭ škvał emocyj u sacsietkach. Mnohija na Zachadzie i ŭ Rasii ŭspryniali jaho jak prykład baraćby rasijan z režymam Pucina. «Naša Niva» znajšła, chto jon nasamreč i za što adbyvaŭ pakarańnie.
Paviedamleńnie źjaviłasia 22 vieraśnia 2026 hoda ŭ akaŭncie Gaga Daily ŭ tvitary i ŭžo sabrała bolš za try miljony prahladaŭ. U im zasnavalnik prajekta patłumačyŭ pryčynu svajoj bolš čym dvuchhadovaj adsutnaści:
«Vybačajcie za adsutnaść abnaŭleńniaŭ, ja litaralna byŭ u turmie. Heta Kirył. Kali vy mianie nie viedajecie, ja ŭładalnik Gaga Daily, i kožny dopis u sacsietkach, jaki vy bačyli z 2009 pa 2024 hod, byŭ ad mianie. Ja nikoli nie vykarystoŭvaju hety akaŭnt dla asabistych dopisaŭ, ale adčuvaju, što abaviazany vam usio patłumačyć.
U pačatku 2024 hoda mianie aryštavali na radzimie za pratesty suprać urada i asudzili bolš čym na dva hady turmy. Na praciahu ery MAYHEM hety akaŭnt viali maje siabry Kryścijan i Entani, jakija vykanali niejmaviernuju pracu. Ciapier ja na voli, ja ŭ biaśpiecy, i ja nie mahu dačakać, kab viarnucca da taho, što ja tak mocna lublu.
Ja nadzvyčaj kranuty i ŭdziačny za ŭsie tvity i paviedamleńni padtrymki, jakija vy mnie dasłali. Ja tak mocna lublu hetuju supolnaść, i zdajecca siurrealistyčnym, što tak šmat ludziej, jakija nie viedajuć adno adnaho, čyja adzinaja suviaź — heta takaja duraść, jak luboŭ da adnoj pop-zorki, mohuć sfarmavać takuju mocnuju suviaź, jakaja doŭžycca stolki hadoŭ. Dajcie viedać, kali ŭ vas jość pytańni, i nie saromiejciesia sačyć za mnoj u IG na @krzzle, kali chočacie zastavacca na suviazi. Kali LG8?»
Sorry about the lack of updates, I was literally in prison
Kirill here. If you don't know me, I'm the owner of Gaga Daily, and every social media post you saw from 2009 through 2024 was from me. I never use this account to post anything personal, but I feel like I owe you all…
Hety akaŭnt Gaga Daily źjaŭlajecca častkaj najbujniejšaj u śviecie supolnaści fanataŭ śpiavački Łedzi Hahi i byŭ stvorany jašče ŭ 2009 hodzie. Siońnia prajekt maje aficyjny sajt ź vielmi aktyŭnym forumam, akaŭnt u tvitary na 487 tysiač čytačoŭ, profil u instahramie, na jaki padpisana 517 tysiač čałaviek, i staronku ŭ fejsbuku, na jakuju padpisana 1,3 miljona fanataŭ śpiavački.
Łedzi Haha aficyjna pryznała hety resurs hałoŭnaj placoŭkaj svaich prychilnikaŭ. Va ŭsich sacsietkach prajekta pryviedziena jaje fraza: «Kali ja chaču daviedacca, što kažuć maje fanaty, ja idu na Gaga Daily».
«Ruski chłopiec»
Ni ŭ hetym dopisie, ni ŭ svaim asabistym instahram-akaŭncie chłopiec nie paznačyŭ ni krainy, ni svajho poŭnaha imieni. Adšukać hetuju infarmacyju prostym pošukam pa fotazdymkach taksama niemahčyma.
Z hetaj pryčyny imhnienna ŭ sacsietkach pačało daminavać mierkavańnie, jak siarod zachodniaj anhłamoŭnaj publiki, tak i siarod rasijskaj, što stvaralnika Gaga Daily trymali ŭ rasijskaj turmie.
I was LIVING while this was playing on prison radio omg
Dadatkovym tryhieram dla virusnaha abmierkavańnia staŭ adkaz Kiryła adnamu z karystalnikaŭ. Na pytańnie, ci bačyŭ jon klip na novuju pieśniu Łedzi Hahi «Abracadabra», uładalnik akaŭnta adkazaŭ: «Ja žyŭ u toj momant, pakul heta ihrała pa turemnym radyjo».
Heta sparadziła novuju chvalu miemaŭ. Zachodnija fanaty i papularnyja pop-kulturnyja akaŭnty, naprykład, Pop Hub, pačali masava pisać, što trek «Abracadabra» staŭ chitom u rasijskich turmach. Karystalniki ździŭlalisia faktu tranślacyi pop-muzyki dla źniavolenych i žartavali pra toje, jak viaźni ŭ Rasii adkryvajuć dla siabie tvorčaść śpiavački praz radyjokropku.
Adzin z zachodnich karystalnikaŭ adznačyŭ ironiju, što sten Tejłar Śvift, 19‑hadovaja izrailcianka, była aryštavana i praviała dva miesiacy ŭ turmie za admovu ŭstupać u CACHAŁ, a sten Hahi — za pratesty ŭ Rasii. Inšyja byli ŭschvalavanyja, što pravioŭšy minuły hod u rasijskaj turmie, stvaralnik adnaho z hałoŭnych fan-prajektaŭ tolki ciapier adkryje dla siabie novuju eru śpiavački.
GAGA DAILY IS RUSSIAN????? https://t.co/cdAcUQvtYQ
Navat prosty anhłamoŭny tvit «Gaga Daily ruski???» sabraŭ try tysiačy łajkaŭ, a pabačyli jaho sotni tysiač karystalnikaŭ sacsietki.
Fanaty taksama źviazvali ŭjaŭny rasijski aryšt z historyjaj samoj Łedzi Hahi, uzhadvajučy jaje kancert u Maskvie ŭ 2012 hodzie. Tady rasijskija ŭłady pahražali śpiavačcy aryštam za słovy ŭ padtrymku ŁHBT-supolnaści, što dadało situacyi simvalizmu ŭ vačach zachodniaj aŭdytoryi.
Temu aryštu nieŭzabavie padchapiŭ i rasijski siehmient tvitara, tłumačačy jaho taksama ŭ kantekście baraćby z režymam Uładzimira Pucina.
Ničieho siebie.
Okazyvajetsia, čiełoviek, kotoryj s 2009 hoda vioł samyj bolšoj fan-akk Lady Gaga - rośsijanin, kotoryj v 2024 hodu był ariestovan za protiesty protiv riežima, i bolšie 2 let provioł za riešiotkoj.
Tiepieŕ on na svobodie, no iz posta nieponiatno, ostajotsia li on v Rośsii. https://t.co/szE6A6rLij
Antyvajenny i apazicyjny błohier pad nikam «Prof. Prieobražienskij» kanstatavaŭ jak fakt, što ŭładalnik najbujniejšaha akaŭnta Łedzi Hahi — rasijanin, jaki bolš za dva hady pravioŭ za kratami za pratesty suprać režymu. Praŭda, paśla pryjšłosia vypraŭlać pamyłku.
Ja sošła s uma. Čiełoviek, kotoryj vieł samyj bolšoj fan akkaunt Ledi hahi 1) iz Rośsii 2) był v tiuŕmie https://t.co/cLWyr28e2Q
«Padabajecca, što siońnia virusicca voś hety tvit i adnačasova ź im toj, u jakim pytajucca, ch*li ruskija nie vykazvajucca adkryta nakont vajny. Nu dumajcie», — prakamientavaŭ tvit akaŭnt ź nikam «n-diaja», sabraŭšy tysiačy łajkaŭ.
nravitsia čto siehodnia virusitsia vot etot tvit i odnovriemienno s nim tot v kotorom sprašivajut chuli russkije nie vyskazyvajutsia otkryto nasčiot vojny
nu dumajtie https://t.co/QMpJSLEXqB
Mnostva łajkaŭ i repostaŭ sabraŭ i tvit, u jakim Kirył nazyvaŭsia «ruskim chłopcam, jaki admataŭ dvušačku ŭ kałonii». Na zaŭvahi ŭ kamientaryjach pra biełaruski kantekst jaho aŭtar lohka admachnuŭsia, maŭlaŭ, usiaho tolki pašpartam pamyliŭsia, a tak ŭsio roŭna ahulny «surovy ŭschodniejeŭrapiejski vajb».
Papularny brazilski akaŭnt StagePop, nie razabraŭšysia ŭ tonkaściach palityčnaj situacyi va Uschodniaj Jeŭropie, uvohule napisaŭ, byccam Kirył byŭ aryštavany va Ukrainie.
Chto taki Kirył?
Sapraŭdy, u asabistym profili chłopca ŭ instahramie nie zastałosia nijakich namiokaŭ na biełaruski kantekst — padobna, što jany byli vyčyščany ź mierkavańniaŭ biaśpieki.
Zastalisia tolki fotazdymki z časoŭ jaho vučoby ŭ Maskvie — chłopiec skončyŭ u 2019 hodzie mahistraturu na fakultecie zamiežnych moŭ i rehijonaznaŭstva Maskoŭskaha dziaržaŭnaha ŭniviersiteta, — dy niepaznavalnyja łakacyi. 24 lutaha 2022 hoda ŭ jaho profili źjaviŭsia ŭkrainski ściah, a 1 sakavika taho ž hoda chłopiec apublikavaŭ fotazdymak z maskoŭskaha aŭtazaka, kudy trapiŭ paśla zatrymańnia na antyvajennym mitynhu. Usio byccam by paćviardžaje mierkavańnie pra «ruskaha chłopca».
Błytaniny dadavała i toje, što pieršyja paviedamleńni pra toje, što fan-supolnaściu Gaga Daily kiravaŭ biełarus Kirył Nhujen, jaki adbyŭ termin za pratesty 2020 hoda, supravadžalisia fotazdymkami, uziatymi z sajtaŭ biełaruskich pravaabaroncaŭ. Ale na ich byŭ zusim inšy mužčyna azijackaj źniešnaści, čym u akaŭncie krzzle — vyhladała, byccam žurnalisty niešta pabłytali.
Pra biełaruski śled śviedčyŭ tolki adzin archiŭny fotazdymak za 13 vieraśnia 2020 hoda, na jakim byŭ bačny chłopiec z płakatam z cytataj śpiavački Ryjany «A Rat Is a Rat» (Pacuk — heta pacuk) i ludzi ź bieł-čyrvona-biełymi ściahami na fonie. Adnak hety dopis byŭ vydaleny abo schavany nieŭzabavie paśla taho, jak jaho paśpieli zaŭvažyć i apisać žurnalisty vydańnia «Lusterka».
«Naša Niva» taksama adšukała inšyja dokazy taho, što Kirył pachodzić ź Biełarusi. Tak, naprykład, u žniŭni 2020 hoda jon pakinuŭ słovy padtrymki pad videazvarotam IT-pradprymalnika Mikity Mikada, a taksama ŭstupiŭ u sprečku pad dopisam brenda Kardash. Dyzajniery prapanoŭvali nabyć cišotki z łahatypami strajkujučych biełaruskich zavodaŭ, abiacajučy pieravieści pałovu srodkaŭ u fond salidarnaści. Chłopiec raskrytykavaŭ ich košt 97 biełaruskich rubloŭ.
Dakładna vyznačyć, što Kirył pachodzić ź Minska ŭdałosia dziakujučy inšaj detali: raniej usie jaho profili ŭ sacyjalnych sietkach nazyvalisia kirillyen. My miarkujem, što niknejm źjaŭlajecca kambinacyjaj imia Kirył i finalnaj častki raspaŭsiudžanaha vjetnamskaha proźvišča Nhujen (Nguyễn).
U kancy 2014 hoda jon apublikavaŭ fatahrafiju viasiołki ź Minska, jakaja zastałasia na staronkach partała «Chartyja-97».
U červieni 2015 hoda akaŭnt ź nikam kirillyen stvaryŭ temu na biełaruskim forumie abaroncaŭ žyvioł. Jon raskazvaŭ, jak jaho maci padabrała kala ich doma źbitaha mašynaj kata, i prasiŭ parady pa dohladzie za paralizavanaj žyviołaj. U pierapiscy jon adznačaŭ, što žyvie za 10 chvilin ad dziaržaŭnaj vieterynarnaj kliniki na vulicy Hurskaha ŭ Minsku. Paźniej jon źmianiŭ hety niknejm na novy — kir93 — ale ślady staroha zastalisia ŭ adkazach ad inšych karystalnikaŭ i ŭ paznakach pry redahavańni im ułasnych dopisaŭ.
Novy niknejm daje dakładny hod naradžeńnia — 1993 hod. Uzrost i historyja ź niknejmami dazvolili kančatkova supastavić uładalnika Gaga Daily sa śpisami biełaruskich palitviaźniaŭ. Poŭnaje imia chłopca — Kirył Kuokavič Nhujen, jon naradziŭsia 8 śniežnia 1993 hoda.
Zdymak, źmieščany na staronkach pra palitźniavolenaha Kiryła Nhujena na resursach biełaruskich pravaabaroncaŭ, nakolki možna mierkavać, naležyć inšamu Kiryłu Nhujenu, jaki taksama žyŭ u Biełarusi, ale naradziŭsia ŭ 1996 hodzie ŭ Chanoi.
Jak piša «Viasna», Kiryła zatrymali ŭ pačatku 2024 hoda. 10 maja 2024 hoda sudździa Ina Siviec u sudzie Kastryčnickaha rajona Minska asudziła jaho pavodle tak zvanaha «narodnaha» artykuła — č. 1 art. 342 Kryminalnaha kodeksa (arhanizacyja i padrychtoŭka dziejańniaŭ, jakija hruba parušajuć hramadski paradak) na 1 hod i 6 miesiacaŭ kałonii.
25 sakavika 2025 hoda adbyŭsia druhi sud pa tym ža artykule za inšy epizod, paśla čaho ahulny termin źniavoleńnia pavialičyli da 2 hadoŭ i 6 miesiacaŭ. Kirył Nhujen adbyvaŭ pakarańnie ŭ kałonii №17 u Škłovie i vyjšaŭ na volu ŭ pačatku krasavika 2026 hoda.
«Naša Niva» — bastyjon biełaruščyny
PADTRYMAĆ
Kamientary
I vaabšče, kakaja raźnica.