Pavieł Šurmiej ahučyŭ pytańni kalinoŭcaŭ adnosna śpiecroty «Vola»

Šurmiej padkreślivaje, što biełaruskija vajskoŭcy, jakija ŭžo vajujuć va Ukrainie, nie vystupajuć suprać źjaŭleńnia novych padraździaleńniaŭ i ličać kankurencyju karysnaj. Adnak, na jaho dumku, jana pavinna adbyvacca ŭ prazrystych i zrazumiełych dla ŭsich umovach. Tamu jon zadaje Jarasłavu Čarnahoru piać pytańniaŭ.

Pieršaje pytańnie tyčycca taho, chto i na jakim uzroŭni pryniaŭ rašeńnie ab stvareńni novaj biełaruskaj śpiecroty BPŁA: ci maje heta rašeńnie sistemny charaktar i ci prymałasia jano na ŭzroŭni palityčna-vajskovaha kiraŭnictva Ukrainy.

Kali ž havorka tolki pra ekśpierymient, to pavodle jakich kryteryjaŭ buduć vyznačać jaho paśpiachovaść i ci mohuć vyniki paŭpłyvać na staŭleńnie da inšych biełaruskich dobraachvotnikaŭ?

Druhoje pytańnie datyčycca pryncypaŭ adboru ludziej, jakim daručana kiravać novaj rotaj.

Šurmiej cikavicca, čamu hetuju pracu nie daručyli biełarusam ź vialikim bajavym dośviedam, u tym liku ŭ śfiery BPŁA. Pa jaho słovach, siońnia mnohija ź biełaruskich vajskoŭcaŭ majuć praktyčny dośvied bajavoj pracy, płanavańnia apieracyj i kiravańnia.

U toj ža čas vykanaŭcam abaviazkaŭ kamandzira novaj śpiecroty, jakaja pretenduje na status elitnaj, pryznačyli Mikitu Zabuhu — čałavieka, jaki, jak śćviardžajecca ŭ zvarocie, mieŭ krychu bolš za miesiac dośviedu pracy łahistam roty BPŁA. U suviazi z hetym Pavieł Šurmiej choča viedać, stali padstavaj dla takoha pryznačeńnia vajskovaja adukacyja, dośvied sučasnaj vajny, arhanizacyjnyja zdolnaści abo reputacyja siarod vajskoŭcaŭ.

Treciaje pytańnie źviazanaje z zajavaj pra toje, što biełarusy narešcie pačnuć atrymlivać aficerskija pasady.

Ci budzie heta aznačać aficyjnaje pryznačeńnie na aficerskija pasady z adpaviednymi pravami, abaviazkami i jurydyčnaj adkaznaściu, ci biełarusy i nadalej buduć farmalna ličycca sałdatami abo snajpierami, faktyčna pry hetym vykonvajučy aficerskija funkcyi, cikavicca Šurmiej. Jon śćviardžaje, što takaja situacyja razychodžańnia farmalnaha i faktyčnaha vielmi raspaŭsiudžanaja ŭ biełaruskich padraździaleńniach i raniej, i ciapier. Kali ž zaraz situacyja źmienicca i płanujecca aficyjnaje pryznačeńnie biełarusaŭ na aficerskija pasady, to jak budzie vyhladać hetaja pracedura, pavodle jakich kryteryjaŭ jana budzie ažyćciaŭlacca i ci raspaŭsiudzicca na inšyja padraździaleńni?

Čaćviortaje pytańnie tyčycca zajaŭ pra pačatak pracy z dalokimi i siarednimi ŭdarnymi bieśpiłotnikami.

Pavieł Šurmiej spasyłajecca na dośvied biełaruskich śpiecyjalistaŭ pa BPŁA, jakija słužać va Uzbrojenych siłach Ukrainy, i śćviardžaje, što jakasnaja padrychtoŭka techničnaha piersanału zajmaje nie mienš za šeść miesiacaŭ. Dla paŭnavartasnaha kiravańnia BPŁA apieratyŭnaha ŭzroŭniu, pavodle jaho słoŭ, patrebnyja nie tolki navučańnie, ale i nie mienš za dva hady ahulnaha bajavoha dośviedu. Jon adznačaje, što biełarusaŭ z takim uzroŭniem kampietencyj niašmat, i pytajecca, chto budzie navučać asabovy skład novaj roty i zabiaśpiečvać jaje padrychtoŭku, kab jana była elitnaj nie tolki pa naźvie.

Piataje pytańnie źviazanaje z prablemami lehalizacyi biełaruskich dobraachvotnikaŭ.

U suviazi sa stvareńniem novaj roty zajaŭlałasia, što pavieličeńnie kolkaści biełarusaŭ u vojsku moža dapamahčy vyrašyć prablemy ź lehalizacyjaj, vydačaj dakumientaŭ, adnaŭleńniem stračanych pašpartoŭ, vypłatami, navučańniem i inšymi pytańniami. Aŭtar zvarotu stavić pad sumnieŭ metazhodnaść takoha padychodu, pakolki, pavodle jaho słoŭ, prablemy biełaruskich dobraachvotnikaŭ, jakija vajujuć z 2022 hoda, da hetaha času vyrašajucca vielmi pavolna albo zastajucca niavyrašanymi.

U vyniku Pavieł Šurmiej stavić pytańnie, što pavinna być pieršasnym: stvareńnie nieabchodnych jurydyčnych umoŭ dla ŭźniknieńnia novych biełaruskich i inšych padraździaleńniaŭ albo stvareńnie novych padraździaleńniaŭ u raźliku na toje, što heta ŭ budučyni padšturchnie dziaržavu da zakanadaŭčych źmien. Aŭtar adznačaje, što nieabchodnyja źmieny nie adbylisia na praciahu bolš čym čatyroch hadoŭ.

• 22
• 1
• 4
• 0
• 0
• 3
• 0
• 1