U servisie dla zvarotaŭ u dziaržaŭnyja orhany adbyŭsia vyciek danych. Papalilisia i viadomyja prapahandystki
Piersanalnyja danyja biełarusaŭ, zarehistravanych u servisie «Obraŝienija.bieł» dla elektronnaha ŭzajemadziejańnia ź dziaržaŭnymi orhanami, stali dastupnyja praz papularny telehram-bot «Šerłak», jaki vykarystoŭvajuć dla pošuku asabistaj infarmacyi. Pra vyciek paviedamiła vydańnie «Lusterka». Aficyjnych paviedamleńniaŭ pra incydent nie było.
U bazie bota źjavilisia źviestki, paznačanyja jak danyja karystalnikaŭ «Obraŝienija.bieł». Pravierka pakazała, što praz servis možna znajści sapraŭdnyja zvaroty hramadzian u dziaržaŭnyja orhany.
Siarod danych, jakija trapili ŭ čužyja ruki, — proźviščy, imiony i imiony pa baćku, numary telefonaŭ, adrasy elektronnaj pošty, a ŭ niekatorych vypadkach identyfikacyjnyja numary, a taksama teksty zvarotaŭ. Dataŭ padačy zvarotaŭ i dałučanych da ich dakumientaŭ u bazie niama. Vydańnie nie zmahło vyznačyć, kolki čałaviek paciarpieli ad vycieku.
U bazie znajšlisia, u pryvatnaści, źviestki pra Siarhieja Bielikava, dyrektara dziaržaŭnaj kampanii «Centr ličbavaha raźvićcia», jakaja raspracavała «Obraŝienija.bieł». Zachavaŭsia jahony zvarot z adnym słovam — «Pravierka». Mahčyma, jon byŭ adnym ź pieršych karystalnikaŭ płatformy i testavaŭ jaje pracu.
Taksama ŭ bazu trapili zvaroty supracoŭnicy dziaržaŭnaj haziety «SB» Ludmiły Hładkaj. U adnym ź ich jana dziakavała miedykam za akazanuju dapamohu, a ŭ druhim patrabavała abviaržeńnia artykuła rajonnaha vydańnia.
Prarasijskaja aktyvistka Volha Bondarava, pavodle źviestak z uciečki, skardziłasia na «dziejańni hrupy asobaŭ», jakija, jak śćviardžałasia ŭ zvarocie, dyskryminavali jaje, publikavali chłuślivuju infarmacyju, što škodzić jaje reputacyi, i akazvali na jaje publičny psichałahičny cisk.
U servisie «Obraŝienija.bieł» zarehistravanyja bolš za 413 tysiač fizičnych asobaŭ, a taksama kala 19 tysiač dziaržaŭnych orhanaŭ i arhanizacyj. Z 2023 hoda elektronnyja zvaroty ŭ dziaržaŭnyja ŭstanovy prymajucca tolki praz hetu płatformu. Jaje raspracoŭščyk — «Centr ličbavaha raźvićcia», jaki padparadkoŭvajecca Ministerstvu suviazi.
Pavodle dziejnych pravił, u vypadku vycieku piersanalnych danych apieratar sistemy abaviazany paviedamić pra heta ŭ Nacyjanalny centr abarony piersanalnych danych. Centr publikuje infarmacyju pra najbolš maštabnyja incydenty. Sioleta, naprykład, paviedamlałasia pra vypadki, kali staronnija asoby atrymali dostup da danych biełaruskich klijentaŭ kampanij «DoDo Pica», «Dženerał lizinh» i «Makśbiet-M».
Adnak pra vyciek z «Obraŝienija.bieł» aficyjnaj infarmacyi nie źjaviłasia. Na dumku «Lusterka», heta moža aznačać, što administratary servisu jašče nie viedajuć pra incydent abo što na niejkim etapie było pryniata rašeńnie nie paviedamlać pra jaho.
Kali čałaviek ličyć, što jahonyja pravy ŭ śfiery abarony piersanalnych danych parušanyja, jon moža padać skarhu ŭ Nacyjanalny centr abarony piersanalnych danych.
Kamientary