U voku vyjavili nieviadomuju raniej sistemu ačyščeńnia. Heta moža dapamahčy ŭ baraćbie sa ślepatoj

Bolš za sto hadoŭ navukoŭcy ličyli, što voka ŭ adroźnieńnie ad bolšaści inšych orhanaŭ nie maje ŭłasnych limfatyčnych sasudaŭ. Jany dapamahajuć vyvodzić z tkanak lišniuju vadkaść i pradukty abmienu rečyvaŭ, a taksama adyhryvajuć rolu ŭ imunnaj abaronie arhanizma.

Hetyja ŭjaŭleńni pačali mianiacca ŭ 2009 hodzie, kali daśledčyki vyjavili źviazany ź limfatyčnaj sistemaj šlach adtoku vadkaści ŭ piaredniaj častcy voka. Adnak toje, jak vyvodziacca vadkaść i pradukty abmienu rečyvaŭ z zadniaj častki voka, doŭhi čas zastavałasia niedastatkova vyvučanym.

Asablivaje značeńnie heta maje dla siatčatki — śviatłoadčuvalnaj abałonki voka, jakaja spažyvaje šmat enierhii i pastajanna ŭtvaraje pradukty abmienu rečyvaŭ. Mienavita siatčatka i prylehłyja da jaje tkanki pakutujuć pry šerahu ciažkich zachvorvańniaŭ, zdolnych pryvieści da niezvarotnaj straty zroku.

Nieviadomy šlach adtoku vadkaści

Jak paviedamlaje ScienceDaily, daśledčyki z Univiersiteta Brytanskaj Kałumbii i Univiersiteta Taronta praviali sieryju ekśpierymientaŭ na myšach, kab vyśvietlić, jak vadkaść vyvodzicca z zadniaj častki voka.

Dla hetaha jany ŭviali śpiecyjalnyja fłuarescentnyja markiery ŭ vuzkuju prastoru ŭ zadniaj častcy vočnaha jabłyka, a zatym adsočvali ich pieramiaščeńnie z dapamohaj mahnitna-rezanansnaj tamahrafii, infračyrvonaj vizualizacyi i mikraskapii.

Daśledčyki vyjavili pad siatčatkaj voka drobnyja limfatyčnyja sasudy, pra isnavańnie jakich raniej nie było viadoma. Jany prasačyli, jak vadkaść vychodzić z zadniaj častki voka ŭ tkanki, a adtul traplaje ŭ limfatyčnuju sistemu arhanizma. Uviedzienyja navukoŭcami markiery ŭžo praź niekalki chvilin znajšlisia ŭ najbližejšych limfatyčnych vuzłach.

Vyjaŭleny šlach atrymaŭ nazvu POLO — ad anhlijskaha posterior ocular lymphatic outflow, što aznačaje «limfatyčny adtok z zadniaj častki voka».

Navukoŭcy miarkujuć, što hetaja sistema moža dapamahać vyvodzić lišniuju vadkaść, białki i rečyvy, źviazanyja z zapaleńniem.

Ci dapamoža adkryćcio ŭ baraćbie sa ślepatoj?

Adkryćcio moža mieć značeńnie dla vyvučeńnia hłaŭkomy, uzrostavaj makularnaj dehienieracyi i inšych zachvorvańniaŭ, jakija pryvodziać da paharšeńnia abo straty zroku. Ich raźvićcio moža supravadžacca parušeńniami rehulacyi vadkaści, nazapašvańniem praduktaŭ abmienu rečyvaŭ i zapalenčymi pracesami.

Kali daśledčykam udasca vyśvietlić, jak uzmacnić pracu novaj sistemy ačyščeńnia, heta moža dapamahčy raspracavać mietady lačeńnia, nakiravanyja na abaronu siatčatki. Akramia taho, vyvučeńnie hetaha šlachu moža adkryć novyja mahčymaści dla dastaŭki lekaŭ u hłybokija struktury voka.

Adnak pakul havorka idzie tolki pra pierśpiektyvy. Sistemu POLO vyjavili ŭ myšej, i navukoŭcam jašče treba vyśvietlić, jak jana pracuje ŭ čałavieka i ci ŭpłyvajuć parušeńni jaje dziejnaści na raźvićcio zachvorvańniaŭ.

• 4
• 0
• 0
• 0
• 0
• 0
• 0
• 0