Premija imia Sacharava: lidar apazicyi Tanzanii, Mižnarodny kryminalny sud i asudžanyja na śmierć iranskija siostry ŭ liku finalistaŭ
Jeŭraparłamient vyznačyŭ troch finalistaŭ premii imia Sacharava. U šort-list uvajšli Mižnarodny kryminalny sud, tanzanijski apazicyjanier Tundu Lisu i dźvie iranki, prysudžanyja na radzimie da śmiarotnaha pakarańnia, piša DW.
Deputaty Jeŭraparłamienta vyznačyli troch finalistaŭ u paniadziełak u Strasburhu. Staršynia Jeŭraparłamienta Rabierta Mietsoła abvieścić łaŭreata 22 kastryčnika.
Sacyjał-demakraty vyłučyli na premiju imia Sacharava Mižnarodny kryminalny sud, jaho sudździaŭ, advakataŭ i supracoŭnikaŭ za rasśledavańni hienacydu, vajennych złačynstvaŭ i złačynstvaŭ suprać čałaviečnaści.
Sud znachodzicca pad mocnym ciskam z boku prezidenta ZŠA Donalda Trampa, jaki ŭvioŭ sankcyi suprać samoha MKS i jaho supracoŭnikaŭ, a taksama rasparadziŭsia zabłakiravać ich aktyvy ŭ Złučanych Štatach i kredytnyja karty.
Apazicyjanier z Tanzanii i iranskija siostry
Tundu Lisu z 2025 hoda znachodzicca ŭ źniavoleńni i ŭznačalvaje apazicyjnuju ŭ Tanzanii partyju «Za demakratyju i prahres» (Chadema). Jamu pahražaje śmiarotnaje pakarańnie pa abvinavačańni ŭ dziaržaŭnaj zdradzie.
Jeŭrapiejskaja narodnaja partyja i frakcyja Jeŭrapiejskich kansiervataraŭ i refarmistaŭ, jakija vyłučyli jaho kandydaturu, patłumačyli svajo rašeńnie tym, što Lisu vystupaje za svabodnyja vybary, niezaležnuju sudovuju sistemu i spynieńnie palityčnaha hvałtu ŭ Tanzanii.
Akramia taho, u jakaści pradstaŭnic pratestaŭ u Iranie sioleta byli vyłučany siostry Tarane i Ramina Rachimi, pryhavoranyja tam da śmiarotnaha pakarańnia. Ich kandydaturu prapanavała frakcyja «Patryjoty za Jeŭropu», u jakuju, siarod inšych, uvachodziać francuzskija pravyja papulisty.
Staršynia kamiteta Jeŭraparłamienta pa zamiežnych spravach Devid Makalister, jaki pradstaŭlaje JENP, zajaviŭ: «U časy vajny i narastajučych represij tyja, chto vystupaje ŭ abaronu svabody, pavinny viedać, što ŭ ich jość sajuźniki. Premija imia Sacharava dapamahaje zrabić ich hałasy bolš čutnymi. Ich mužnaść nahadvaje nam, što pravy čałavieka pavinny vyznačać našu źniešniuju palityku, asabliva kali ich abarona stanovicca palityčna składanaj zadačaj».
Uručeńnie premii ŭ śniežni
Premiju imia Andreja Sacharava za svabodu dumki ŭručać 16 śniežnia ŭ Strasburhu. Z 1988 hoda Jeŭraparłamient prysudžaje jaje asobnym asobam i arhanizacyjam, jakija vystupajuć za pravy čałavieka i svabodu słova. Pamier hrašovaha ŭznaharodžańnia składaje 50 000 jeŭra.
Pradstaŭniki Biełarusi ŭznaharodžvalisia premijaj niekalki razoŭ: u 2004 hodzie — Biełaruskaja asacyjacyja žurnalistaŭ, u 2006 hodzie Alaksandr Milinkievič, u 2020 hodzie demakratyčnaja apazicyja Biełarusi. Letaś premiju padzialili žurnalist Andrej Pačobut, jaki znachodziŭsia tady ŭ źniavoleńni, i hruzinskaja žurnalistka Azija Amahłabieli, jakaja taksama znachodziłasia ŭ źniavoleńni.
Kamientary