Kijeŭ adnaviŭ intensiŭnyja ŭdary pa rasijskich NPZ paśla taho, jak Vašynhton praihnaravaŭ jaho patrabavańni
Novaja sieryja ŭdaraŭ pačałasia niepasredna pierad vybarami ŭ ZŠA i čakanymi trochbakovymi pieramovami.
Uzbrojenyja siły Ukrainy druhi dzień zapar atakujuć rasijskija naftapierapracoŭčyja zavody (NPZ) paśla dvuchtydniovaj paŭzy. Kijeŭ časova abmiežavaŭ udary pad ciskam Donalda Trampa, adnak Rasija praciahnuła atakavać ukrainskuju enierhietyku, a ZŠA nie pryniali ŭkrainskija ŭmovy spynieńnia atak. Novaja sieryja ŭdaraŭ pačałasia niepasredna pierad vybarami ŭ ZŠA i čakanymi trochbakovymi pieramovami, piša «Ahienctva».
Siońnia va Ufie atakavany NPZ. Napiaredadni Ukraina atakavała Navakujbyšaŭski NPZ «Rasnafty». Jašče adzin pažar uźnik pobač z naftabazaj «Rasnafty» kala Šaramiećjeva.
Da hetaha Kijeŭ nie nanosiŭ udaraŭ pa rasijskich NPZ z 15 kastryčnika, kali byŭ paškodžany Razanski zavod.
Zacišša pačałosia na fonie patrabavańniaŭ Donalda Trampa spynić ataki na NPZ. Prezident ZŠA źviazvaje ŭdary pa ich z rostam cen na dyzielnaje paliva ŭ ZŠA.
11 kastryčnika Tramp abviaściŭ, što Rasija i Ukraina damovilisia nieadkładna spynić uzajemnyja ŭdary pa enierhietyčnych abjektach.
I choć heta znoŭ nie było ŭzhodniena z Maskvoj i Kijevam, Ukraina zajaviła pra hatoŭnaść padtrymać pieramirje, paśla čaho Kijeŭ try dni nie atakavaŭ rasijskija NPZ. Rasijskija ŭdary pa ŭkrainskich enierhietyčnych abjektach praciahvalisia, i 15 kastryčnika Zialenski zajaviŭ, što «z nas chopić».
U toj ža dzień byŭ naniesieny ŭdar pa Razanskim NPZ, ale paśla hetaha znoŭ nastupiła paŭza na niekalki tydniaŭ.
Pavodle źviestak The Wall Street Journal, jašče ŭ siaredzinie kastryčnika ŭkrainskim padraździaleńniam dalokich udaraŭ paviedamili pra faktyčnaje spynieńnie atak na NPZ paśla zaviaršeńnia ŭžo pačatych apieracyj.
Na pieryjad paŭzy prypała jašče niekalki padziej, jakija mahli paŭpłyvać na taktyku pavietranych udaraŭ USU.
Z 14 da 24 kastryčnika ŭkrainskija vajskoŭcy sutyknulisia z prablemami ŭ pracy terminałaŭ Starlink, a 20—21 kastryčnika adbyŭsia novy raŭnd pieramoŭ z udziełam amierykanskich pieramoŭščykaŭ Styva Uitkafa i Džareda Kušniera (apošni ŭdzielničaŭ pa videasuviazi). Kušnier naŭprost zapatrabavaŭ ad Zialenskaha 30‑dzionnaha spynieńnia atak jak žestu padziaki ZŠA za pasiarednictva, pisała WSJ.
Za čas paŭzy Zialenski ahučyŭ niekalki ŭmoŭ, pry vykanańni jakich Kijeŭ hatovy admovicca ad udaraŭ pa rasijskich NPZ va ŭmovach praciahłych rasijskich atak na enierhietyčnuju infrastrukturu Ukrainy: dazvoł na vykarystańnie Starlink nad terytoryjaj Rasii; pieradača rakiet Patriot. Nivodnaja z hetych umoŭ nie była vykananaja.
U piatnicu ZŠA ŭchvalili prodaž Ukrainie 500 rakiet Patriot PAC-3 na sumu 2,1 młrd dołaraŭ za košt srodkaŭ Ukrainy i jaje partnioraŭ. Adnak rakiety jašče nie vyrablenyja, i ich pastaŭki mohuć pačacca tolki praź niekalki hadoŭ.
Pavodle źviestak WSJ, niekatoryja jeŭrapiejskija sajuźniki raili Ukrainie dačakacca amierykanskich vybaraŭ, ale Kijeŭ adnaviŭ ataki raniej.
Jany adnaŭlajucca napiaredadni trochbakovych pieramoŭ Rasii, Ukrainy i ZŠA i mohuć uzmacnić pazicyju Kijeva: za čas paŭzy rasijskija NPZ pavialičyli pierapracoŭku nafty prykładna na čverć.
Reakcyi Trampa pakul niama. Miarkujecca, što svaju zajavu jon budzie rabić va ŭmovach, kali amierykanskija kampanii admaŭlajucca kuplać paliva, adpraŭlenaje ŭ ramkach dyzielnaj ździełki z Maskvoj.
U čaćvier The Washington Sun paviedamiła, što biznes aścierahajecca reputacyjnych i jurydyčnych nastupstvaŭ: ukaza Trampa i dazvołu Ministerstva finansaŭ ZŠA moža być niedastatkova dla źniaćcia sankcyj, uviedzienych Kanhresam.
Raniej Dźmitryj Piaskoŭ zajaviŭ, što ŭdary pa rasijskich NPZ nie staviać pad sumnieŭ praviadzieńnie pieramoŭ.
Kamientary
Kali 500 rakiet pak-3 jany mohuć dać u 2030 hodzie, chaj tady ŭ 30m hodzie i prosiać kab nie bambili rasiju.