«Chłuśnia ledź nie kaštavała žyćcia bolš čym 10 vieterynaram». Vietklinika raskazała pra vypadak šalenstva

U akaŭncie minskaj vieterynarnaj kliniki «Doktar Viet» raskazali pra niadaŭni vypadak z pacyjentam. U videa havorka idzie pra kata, jakomu śpiecyjalisty akazvali dapamohu, piša Onliner.by.

Tolki paśla raptoŭnaj śmierci žyvioły vyśvietliłasia, što ŭ kata było šalenstva. Pry hetym haspadary vyklučali kantakt chatniaha hadavanca ź inšymi žyviołami. Zaraz bolš za 10 supracoŭnikaŭ vymušanyja prachodzić kurs ekstrannaj vakcynacyi.

U videa padrabiazna raskazali chranałohiju zdareńnia.

Kata dastavili ŭ kliniku «Doktar Viet» u stanie ahulnaha pryhniečańnia i depresii.

Taksama ŭ žyvioły nazirałasia poŭnaja tazavaja paraplehija — paralič abiedźviuch zadnich łap. Viadoma, što za tydzień da hetaha byli skarhi na bol u pajaśničnym adździele i admovu ad ježy.

«Da hetaha haspadary ŭžo abyšli niekalki klinik, ale biespaśpiachova. Kot nie byŭ pryščepleny, adnak dostupu na vulicu nie mieŭ, a kantakt ź inšymi žyviołami haspadar vyklučaŭ», — havorycca ŭ videa.

Śpiecyjalisty vietkliniki pačali poŭnuju dyjahnostyku žyvioły. Ale zaviaršyć jaje nie paśpieli — kot raptoŭna pamior.

«Padčas lačeńnia haspadary padazrona ŭdakładniali: «A heta nie moža być šalenstva?» Šalenstva? My ŭsialak adkidali hetuju viersiju, niahledziačy na nieŭrałahičnyja simptomy, bo virus nielha prynieści na vopratcy abo abutku — patrebny niepasredny kantakt: ukus, drapina abo traplańnie śliny chvoraj žyvioły. Haspadary heta vyklučali», — praciahvaje raskaz vieterynarny doktar.

Paśla śmierci žyvioły haspadary ŭ pryvatnym paradku vyrašyli pravieści daśledavańnie na šalenstva.

«I jakoje ž było naša ździŭleńnie, kali pryjšoŭ stanoŭčy vynik. Jak takoje mahčyma, kot ža chatni? U sanepidemstancyi nam skazali, što hety kot kantaktavaŭ z kažanom, pra što nam padčas zboru anamniezu ničoha nie paviedamili.

Z-za taho, što haspadary ŭtaili hetuju infarmacyju, bolš za 10 maich kaleh — daktaroŭ i asistentaŭ našaj kliniki — apynulisia pad śmiarotnaj pahrozaj, byli špitalizavanyja i prosta ciapier prachodziać kurs ekstrannaj vakcynacyi», — havorycca dalej u videa.

Śpiecyjalistka asabliva padkreśliła: šalenstva nievylečnaje, pry žyćci jaho nielha dyjahnastavać sa stoadsotkavaj dakładnaściu, a paśla źjaŭleńnia simptomaŭ śmiarotnaść składaje 100%.

«Zhodna z zakanadaŭstvam Biełarusi, vakcynacyja suprać šalenstva abaviazkovaja dla ŭsich sabak i katoŭ. Vieterynarnyja ŭračy majuć prava admović u ahladzie niepryščeplenaj žyvioły. Budźcie ščyrymi z daktarami — heta pytańnie žyćcia ludziej», — padkreślili aŭtary dopisu.

Pavialičyć

Na momant publikacyi videa nabrała kala 150 tysiač prahladaŭ i 500 kamientaryjaŭ.

• 2
• 0
• 0
• 5
• 4
• 3
• 3
• 0