Muzyčny duet Dead Man’s Bones, u jaki ŭvachodziać akcior Rajan Hoślinh i muzyka Zak Šyłds, abviaściŭ pra viartańnie paśla 17‑hadovaha pierapynku. Novyja pieśni vyjduć 27 kastryčnika. Pra heta hurt paviedamiŭ u sacyjalnych sietkach.
Prajekt uźnik u 2005 hodzie, kali Hoślinh i Šyłds vyśvietlili, što abodva zachaplajucca atrakcyjonam Haunted Mansion u Dysnejłendzie. Šyłds u dziacinstvie nastolki cikaviŭsia pryvidami, što jamu navat pryznačyli terapiju, a baćki Hoślinha pierajechali z domu, jaki ličyli nasielenym pryvidami. U vyniku muzyki vyrašyli stvarać luboŭnyja historyi pra pryvidaŭ i monstraŭ.
Pieršapačatkova jany zadumvali prajekt jak saŭndtrek da śpiektakla pra kachańnie monstra i pryvida, adnak pastanoŭku skasavali praz vysoki košt vytvorčaści.
Pieršy i pakul adziny albom Dead Man's Bones vyjšaŭ 6 kastryčnika 2009 hoda na łejble ANTI-. U jaho zapisie ŭdzielničaŭ dziciačy chor Silverlake Conservatory Children's Choir, zasnavany Fli, basistam hurta Red Hot Chili Peppers.
Hoślinh i Šyłds sami hrali na ŭsich instrumientach, u tym liku na tych, jakimi raniej nie vałodali. Jany taksama vyznačyli peŭnyja praviły zapisu: nie vykarystoŭvać klik-trek i rabić nie bolš za try dubli kožnaj pieśni. Muzyki ličyli, što niedaskanałaści vykanańnia dapamohuć padkreślić mocnyja baki muzyki.
Uvosień 2009 hoda duet adpraviŭsia ŭ tur u padtrymku alboma, jaki ŭklučaŭ vystupleńni na Chełoŭin. U kožnym horadzie da muzykantaŭ dałučaŭsia miascovy dziciačy chor.
Pieśni Dead Man's Bones hučali ŭ filmie «Zaklaćcie» (2013), francuzskaj karcinie «Stahodździe paniki» (2013), sieryjale Netflix «The Boroughs» (2026) i filmie «They Will Kill You» (2026). Vykarystańnie dziciačaha choru taksama natchniła polski błek-det-mietał-hurt Behemoth na zapis alboma «Ja kachaŭ ciabie ŭ tvajoj najciamniejšaj pary» (I Loved You at Your Darkest), jaki vyjšaŭ u 2018 hodzie.
Pra viartańnie dueta stała viadoma 22 kastryčnika. U apublikavanym videa hučyć hołas, jaki pramaŭlaje radki pra pryvidaŭ i tancy ŭ pryciemkach, a datu vychadu novych piesień nazyvaje dzicia. Aktrysa Eva Miendes, žonka Hoślinha, raniej pisała, što chacieła b «vyklikać novuju muzyku Dead Man's Bones». Paśla abviaščeńnia pra viartańnie jana adznačyła, što muž vykanaŭ svajo abiacańnie.
Rajan Hoślinh taksama viadomy muzyčnymi numarami ŭ filmach «Ła-Ła Łend» i «Barbi». Za pieśniu «Ja prosta Kien» (I'm Just Ken) jon atrymaŭ naminacyju na premiju «Hremi», a ŭ 2024 hodzie vykanaŭ jaje na cyrymonii ŭručeńnia «Oskara».
Ciapier akcior udzielničaje ŭ rekłamnaj kampanii filma «Prajekt «Kaniec śvietu». U 2027 hodzie pavinien vyjści film «Zorny źniščalnik», a taksama abmiarkoŭvajecca jaho mahčymaje źjaŭleńnie ŭ roli Pryvidnaha vieršnika ŭ kiniematahrafičnym suśviecie Marvel.
Trahiedyja z 30‑hadovaj doktarkaj sa Starobina — pajšła vydalać zub mudraści i pamierła24
Kamientary