U brakańjeraŭ pad Słaŭharadam znajšli tracił i bajavyja hranaty
U Słaŭharadskim rajonie zatrymali dvuch miascovych žycharoŭ, jakich padazrajuć u brakańjerstvie. Padčas pravierki inśpiektary pa achovie žyviolnaha i raślinnaha śvietu znajšli ŭ adnaho ź ich doma značny zapas vybuchovych rečyvaŭ, bajavych hranat, bojeprypasaŭ i niezarehistravanaj zbroi.
Spačatku ŭvahu supracoŭnikaŭ Mahiloŭskaj abłasnoj inśpiekcyi achovy žyviolnaha i raślinnaha śvietu pryciahnuli padazreńni ŭ niezakonnym rybałoŭstvie. U mužčyn kanfiskavali sietki ahulnaj daŭžynioj 180 mietraŭ. Za parušeńnie pravił rybałoŭstva pačali administracyjny praces.
Adnak padčas ahladu doma adnaho z zatrymanych inśpiektary znajšli bolš za 20 kiłahramaŭ traciłu, kala 400 hramaŭ porachu i detanujučy šnur. Akramia taho, tam zachoŭvalisia 80 elektradetanataraŭ, dzieviać uzryvalnikaŭ, kapsuli-detanatary i zapały UZRHM.
Siarod znojdzienych bojeprypasaŭ byli try artyleryjskija snarady kalibru 45 milimietraŭ, hranaty RH-42, RHD-5 i F-1, a taksama ružejnaja hranata. Inśpiektary taksama znajšli niezarehistravany bajavy karabin SVT — vintoŭku Tokarava, niezarehistravanuju strelbu IŽ-58 i bolš za 750 patronaŭ roznych kalibraŭ, u tym liku 7,62 milimietra, 12‑ha i 16‑ha kalibraŭ.
Akramia zbroi i vybuchovych rečyvaŭ, u domie znajšli i mietałašukalnik. Pavodle mierkavańnia inśpiektaraŭ, jaho mahli vykarystoŭvać dla pošuku i raskopvańnia starych vajskovych schoviščaŭ i bojeprypasaŭ, jakija zastalisia z časoŭ Druhoj suśvietnaj vajny.
Z ulikam kolkaści znojdzienych pradmietaŭ i patencyjnaj niebiaśpieki dla hramadskaj biaśpieki da pravierki dałučylisia siłavyja struktury. Abstaviny spravy vyśviatlaje 11‑ie ŭpraŭleńnie HUBAZiK MUS Biełarusi.
Ciapier vyrašajecca pytańnie ab zaviadzieńni kryminalnaj spravy pavodle artykuła 295 Kryminalnaha kodeksa, jaki praduhledžvaje adkaznaść za niezakonnyja dziejańni sa zbrojaj i vybuchovymi rečyvami, u tym liku pakarańnie ŭ vyhladzie pazbaŭleńnia voli.
Ciapier čytajuć
Daradca prezidenta Polščy prakamientavaŭ zvarot Kaleśnikavaj i Zołatavaj: Łukašenka vypuskaje niekalki dziasiatkaŭ viaźniaŭ, a na nastupny dzień zatrymlivaje novych2020
Kamientary