«Vializnaje pačućcio viny, ale nie za toje, što biła syna». Byłyja palitźniavolenyja raskazali, jak siadzić žančyna, asudžanaja za zabojstva dziciaci

Padčas suda ŭ kastryčniku 2023 hoda Anastasii było 37 hadoŭ, ciapier — 40. Pravaabaronca Nasta Łojka ŭpieršyniu pierasiakałasia ź joj u SIZA-1, jaki na toj momant znachodziŭsia ŭ Minsku na vulicy Vaładarskaha. Heta adbyłosia viasnoj 2023 hoda, kali Taratutu z Žodzina tranzitam vieźli ŭ RNPC psichičnaha zdaroŭja ŭ Navinki.

«Naścia była z nami litaralna niekalki dzion. Potym jaje advieźli na ekśpiertyzu. Na advarotnym šlachu jana znoŭ paprasiłasia da nas u kamieru, ale mianie tam, na žal, užo nie było, — viartajecca da tych padziej Nasta. — Zabojstva dziciaci ličycca adnym z samych žudasnych złačynstvaŭ, i da ludziej, jakija heta zrabili, za kratami jość peŭnaje dyskryminacyjnaje staŭleńnie. Ale, mnie padajecca, ad nas ź dziaŭčatami jana hetaha nie adčuła. Pa-pieršaje, čałaviek tolki zatrymany, i pa sutnaści spravy jašče ničoha nie zrazumieła. Pa-druhoje, chto my takija, kab jaje sudzić?»

Pravaabaronca nie chavaje, Anastasija jaje ŭraziła z parohu: vysokaja, schudniełaja i zmročnaja, pad vačyma miaški. Žančyny spali pobač.

«Usiu noč u jaje skryhatali zuby, to-bok adčuvałasia, što jana ŭ kiepskim maralnym stanie: tryvožnaja, razhublenaja, nie razumieła, što vakoł adbyvajecca. Ja b navat skazała, zackavanaja inšymi, — dzielicca ŭražańniami Nasta. — Kali jana daviedałasia, što ja jurystka, pačała troški raicca, raskazvać pra svaju spravu. Pa-čałaviečy mocna joj spačuvała».

Pavodle słoŭ pravaabaroncy, Taratuta raskazała, što jana hramadzianka Rasii, ale daŭno žyvie ŭ Biełarusi. U jaje piaciora dziaciej. U repartažach z suda raskazvałasia, što dvoje starejšych chłopčykaŭ nie źjaŭlajucca bijałahičnymi dziećmi Alaksandra. Adzin ź ich žyŭ sa svaim baćkam. Anastasija raskazvała, što ŭ zabitaha Siamiona byli asablivaści razumovaha raźvićcia.

«Kazała, što muž pačaŭ źbivać heta dzicia, i jana nie mahła ź im ničoha zrabić. Pa słovach Anastasii, jana padała na muža zajavu ŭ milicyju, zaviali kryminalnuju spravu i tolki dali štraf, — pierakazvaje tyja razmovy Nasta. — Jana zrazumieła ŭsiu biezdapamožnaść. Joj było vielmi ciažka, jana była ŭ poŭnaj zaležnaści ad jaho».

U repartažach z suda infarmacyi pra zajavu Anastasii na muža, praŭda, nie hučała.

— Na sudzie daktary, jakija pryjechali na vyklik u dzień zabojstva, havaryli, što trochhadovy chłopčyk važyŭ mienš za 10 kiłahramaŭ. Prakuratura paviedamlała, što baćki źviazvali jaho adzieńniem i paścielnaj bializnaj, kab abmiežavać jaho pieramiaščeńnie. Ci raskazvała jana pra heta?

— Pra hetuju častku jana, na žal, nie kazała, — adkazvaje Nasta.

Surazmoŭca pytałasia ŭ Taratuty, čamu taja nie pajšła ad muža, kali žyć ź im było nastolki ciažka.

«Tut treba zrabić remarku. Naścia — vielmi prostaja dziaŭčyna. Biez vyšejšaj adukacyi, vialikaj sacyjalnaj padtrymki, jaje rodnyja ŭ inšych haradach. Finansava jana zaležała ad muža, — razvažaje pravaabaronca. — Nakolki mnie viadoma, niejak jana patelefanavała ŭ miascovuju sacsłužbu, prasiła dapamahčy pajści ad jaho i raźvieścisia. Jaje pieraklučyli na psichołaha. Jon skazaŭ: «U vas šmat dziaciej, vam treba pamirycca z mužam».

Paźniej, zhadvaje Nasta, da jaje dajšła infarmacyja, što paśla historyi ź siamjoj Taratutaŭ niekatorych słuckich čynoŭnikaŭ zvolnili, suprać kahości raspačali kryminalnuju spravu. Publična paviedamlałasia, što na łavie padsudnych apynulisia Alaksandr Dziadok — načalnik ISN Słuckaha RAUS, i Arciom Hałavinski — śledčy Słuckaha RASK.

«Nakolki mnie viadoma, Naścia jeździła ŭ jakaści śviedki raskazvać, jak ź jaje boku vyhladała praca sacsłužbaŭ, — uspaminaje pravaabaronca.

«Kali b viedała, chto heta, to ŭvohule nie stała b jaje karmić»

Pa słovach pravaabaroncy, u SIZA Taratuta raskazvała, što nie daje nijakich pakazańniaŭ.

«Jana kazała, što kali paśla zatrymańnia jaje pryvieźli ŭ Słucki RAUS, tam na jaje mocna kryčali, pahražali i ŭdaryli elektradrotam, — pieradaje razmovy z Anastasijaj Nasta. — Navat nie elektrašokieram, a adniekul vyrvali elektradrot i ŭdaryli».

Pavialičyć

Nasta ŭspaminaje, što nijakich papier pa spravie ŭ Anastasii z saboj nie było. Łojka dapamahła joj napisać u konsulstva Rasii, paprasić, kab jany jaje naviedali. Nakolki viadoma eks-palitźniavolenaj, «za ŭsie hady hetaha nie adbyłosia».

Na Vaładarcy da Nasty dachodziła infarmacyja i pra Alaksandra Taratutu. Pavodle jaje słoŭ, mužčynu źmiaścili ŭ «pres-chatu», dzie siadzieŭ źniavoleny pa mianušcy Słon. Apošni, kaža surazmoŭca, adbyvaŭ pakarańnie za dva zabojstvy i pracavaŭ na administracyju.

«Da jaho padkidvali asobnych ludziej, jakich pa prośbie administracyi jon, možna skazać, katavaŭ. Čuła, jak jon heta robić, kali apynułasia praź dźvie kamiery, — uspaminaje jana. — Pierad kožnaj viačeraj jon prymušaŭ kahości adciskacca, prysiadać. Ludzi kryčali, płakali».

Druhaja eks-palitźniavolenaja Maryna (imia źmieniena), jakaja taksama ŭ hety pieryjad siadzieła na Vaładarcy, čuła, što mužčynu davodziłasia spać pad narami.

Maryna ŭpieršyniu daviedałasia pra Anastasiju Taratutu taksama ŭ SIZA-1. Žančyna raskazvaje, što ŭ izalatary dobra pracuje sarafannaje radyjo. Navina pra toje, što sužency na Vaładarcy, była na słychu.

U peŭny čas surazmoŭca apynułasia ŭ kamiery, dzie raniej utrymlivali Taratutu. Adnojčy padčas razmovy susiedka Valancina (imia źmienienaje), jakaja siadzieła pa «ekanamičnym» artykule, abmoviłasia joj pra heta. Praŭda, padrabiaznaści spravy daviedałasia z televizara tolki tady, kali Anastasiju ŭžo zabrali. Valancina pryznavałasia, što była šakavanaja.

«Vala z zamožnaj siamji. Niejak razmova zajšła pra charčavańnie. Jana skazała, što dapamahała Anastasii. Kaža: «Kali b viedała, chto heta, to ŭvohule nie stała b jaje karmić», — raskazvaje Maryna. — Paźniej u kałonii niekatoryja dziaŭčaty-«narkamanki» ź jaje atrada padčas abiedu navat nie chacieli siadzieć nasuprać, hladzieć, jak jana jeść. U toj ža čas znajomaja, jakuju taksama zatrymali za «palityku», raskazvała, što niejak da ich u kamieru pieraviali žančynu, jakaja z Naściaj siadzieła [ŭ SIZA]. Jana Taratutu vielmi škadavała i mnoha ź joj razmaŭlała. U adnym pamiaškańni ź imi znachodziłasia macioraja kryminalnica, jakaja ŭvieś čas ździekavałasia z Naści, zabirajučy ježu i pieradačy. Taja ž, nakolki pamiataju, zamiest adkazu tolki płakała i moŭčki ciarpieła».

«Pa praŭdzie, kali tudy trapiła, była ŭ absalutnym šoku»

U listapadzie 2023 hoda Nastu Łojku pieraviali ŭ PK-4 u Homieli, dzie jana iznoŭ sustrełasia z Anastasijaj Taratutaj. Pieršy čas žančyny pracavali na fabrycy ŭ adnu źmienu i pieryjadyčna sustrakalisia, ale mała razmaŭlali.

Pavialičyć

«Kali my bačylisia ŭ SIZA, jana raskazvała, što nie čytaje nijakich papier i nie daje pakazańniaŭ. Tak jana rabiła jašče paŭhoda. Paśla jaje starejšamu synu spoŭniłasia 14 hadoŭ. Śledčyja pryjšli da jaho z vobyskam, dapytali, a potym skazali maci, što kali nie pačnie pryznavać vinu, to zrobiać jaho saŭdzielnikam, — pierakazvaje razmovu z Anastasijaj Nasta. — Jak čałaviek, jaki nie viedaje jurydyčnych pracedur, ničoha nie razumieje, jana, kaniešnie ž, na ŭsio pahadziłasia i z taho momantu stała ŭsio padpisvać, nie čytajučy. Jana nie pračytała navat svoj prysud i jaho vykinuła. Tamu, kali ja pačała ŭdakładniać niejkija niuansy spravy, jana adkazvała: «Nie viedaju».

Pa słovach Nasty, žančyna była «ŭ absalutnym šoku» ad taho, što joj dali 25 hadoŭ.

«Dla jaje heta było prosta nieparazumieńnie, — kaža pravaabaronca. — I jak by jana ni staviłasia da muža, jak by ni nienavidzieła, jaho rasstreł dla jaje taksama byŭ poŭnym udaram, — uspaminaje Nasta. — Jana ŭvieś čas trochi płača. Jana ŭ takim paŭdepresiŭnym stanie».

Praź niekatory čas Nastu adpravili ŭ inšuju źmienu, i doŭha žančyny nie bačylisia. U studzieni 2026-ha, za paŭtara miesiaca da vyzvaleńnia, Łojku pieraviali ŭ 18‑y atrad, dzie siadzieła Taratuta. Pravaabaronca nazyvaje jaho «samym žudasnym» u kałonii.

«Pa praŭdzie, kali tudy patrapiła, była ŭ absalutnym šoku. Tam ludzi mohuć adna na adnu ŭvieś čas abraźliva vykazvacca, — uspaminaje pravaabaronca. — Akramia taksičnaści, tut jašče i kiepskija ŭmovy: tam na sto čałaviek adno bide, a jašče niezaštoranyja prybiralni, niama pralnaj mašyny».

Nakolki viadoma Łojcy, Taratuta znachodzicca ŭ hetym atradzie niekalki hadoŭ.

U hety čas eks-palitźniavolenaja daviedałasia ad Anastasii, što Alaksandra, vierahodna, rasstralali. Pa słovach Nasty, aficyjna žančynie pra heta nichto nie paviedamiŭ.

«Pakolki astatnich dziaciej u siamji zabrali, i jany abodva stali abaviazanymi asobami, to suma na ŭtrymańnie niepaŭnahadovych dzialiłasia napałam, — raskazvaje Nasta Łojka. — U 2024-m, niedzie da Novaha hoda, Naściu vyklikali ŭ buchhałteryju i vystavili novuju papierku, što zrabili pieraraźlik. Tam stajała inšaja suma. I kali ŭ papiarednim dakumiencie było proźvišča jaje i muža, to zaraz tolki jaje. Z hetaha my zrabili vysnovu, što prysud Alaksandru vykanali».

Pa słovach Nasty Łojki, Anastasiju za kratami vielmi padtrymlivaŭ baćka, ale ŭ 2023‑m ci 2024‑m jon pamior.

«Jana ŭvieś čas pieražyvała za dziaciej. Vielmi chvalavałasia za starejšaha. Joj było škada, što jon mała piša, a ŭ niejki momant pierastaŭ, i jany kantaktavali tolki praź jaje siastru. Jon zapytvaŭ, jak jana, pieradavaŭ pryvitańni. Naścia pieražyvała, što dziaŭčynak nie zabrali da siabie rodnyja, — dzielicca nazirańniami pravaabaronca. — Kali zrazumieli, što, mahčyma, mianie chutka vyzvalać, jana maliła: «Daviedajsia, što z maimi dziećmi».

Pa słovach Nasty, Taratuta pieražyvaje, što ŭ jaje niama suviazi ź dziećmi, i chacieła b niešta z hetym zrabić. Pra zabitaha Siamiona z Nastaj jana amal nie razmaŭlała.

«Naścia pracavała malarom, u jaje jość schilnaści da ručnoj pracy, — dzielicca mierkavańniem surazmoŭca. — Zaŭvažała ŭ joj niejkuju azłoblenaść, ale, mnie padajecca, jana źjaviłasia paśla ŭsioj hetaj situacyi. U cełym Naścia dobrazyčlivaja, ładzić u atradzie, naprykład, ź dziaŭčynkami pamaładziej, katoryja troški razhublenyja byvajuć. Apiakujecca kimści, niahledziačy na svoj ciažki psichałahičny stan».

Pa słovach Nasty, byli ludzi, jakija stavilisia da Taratuty niehatyŭna. Mahli skazać štości abraźlivaje ci nahadać, za što taja siadzić.

«Znajomaja, jakaja bližej ź joj pierasiakałasia, uspaminała, što Taratuta narmalny čałaviek, ale zabity. Vielmi strymanaja, — uspaminaje eks-palitźniavolenaja Maryna. — Pa jaje nazirańniach, Naściu ŭ siekcyi nichto nie zadziraŭ, jak heta rabili ŭ adnosinach da «palityčnych» i tak zvanych alimientščyc».

U PK-4 z Taratutaj Maryna taksama pierasiakłasia. Pa jaje ŭražańniach, šmatdzietnaj maci było niepryjemna znachodzicca na fabrycy, bo «na jaje pastajanna svarylisia».

«Uvieś čas čuła, što jana dapuskaje niejki brak. Praz heta bryhada atrymlivała mienšy pracent vykananaha, adpaviedna, na jaje złavalisia, — kaža eks-palitźniavolenaja. — Pamiataju, jana ŭvieś čas prasiła kahości z apieratyŭnych supracoŭnikaŭ pieravieści jaje na lubuju fizičnuju pracu na vulicy, kab nie być u cechu».

Maryna zaŭvažyła na adzieńni Anastasii žoŭtuju birku «jak schilnaj da suicydu».

« U Žodzinie ŭ jaje była sproba sełfcharma (samapaškodžańnia. — Zaŭv. «Lusterka»), — tłumačyć Nasta Łojka. — Pieršy čas joj nastolki ciažka było vytrymać napružańnie, što jana pačała siabie rezać. Kali psichołahi zaŭvažyli, heta stała padstavaj, kab pastavić jaje na ŭlik».

Nasta ŭspaminaje, što, pakul jana była ŭ kałonii, Anastasiju naviedvaŭ jaje brat, jaki žyvie ŭ Rasii. Pa słovach surazmoŭcy, Taratuta chacieła b, kab jaje pieraviali ŭ RF, dzie «značna lepšyja ŭmovy». Nakolki viedaje Łojka, žančynie prychodziŭ adkaz z pasolstva, što pakul joj nie mohuć dapamahčy z ekstradycyjaj, bo na joj «visić» zapazyčanaść za dziaciej.

«Naścia vielmi pieražyvaje praz toje, što zdaryłasia. U jaje vializnaje pačućcio viny, i heta jaje zžyraje, — dzielicca nazirańniami pravaabaronca. — Vina ŭ jaje nie za toje, što jana biła syna ci niedakormlivała. Jana chutčej vinavacić siabie za toje, što nie syšła, nie znajšła abarony ad muža. Za toje, što trapiła ŭ takuju situacyju, u takuju zaležnaść».

• 0
• 0
• 0
• 2
• 0
• 5
• 0
• 0