Film «Listy» Andreja Kuciły atrymaŭ «Załatoha hołuba» ŭ Lejpcyhu

Mižnarodnaje žury vyłučyła karcinu pra biełaruskich palitźniavolenych z nastupnaj farmuliroŭkaj:

«Praz zachaplalny paralelny vopyt mužčyn i žančyn — adnych, jakija havorać, druhich, jakija malujuć, i trecich, jakija zmahajucca, — film pieraŭtvaraje śviedčańni ŭ supraciŭ. Ad kiniematahrafista, jaki admaŭlajecca dazvolić krainie źniknuć z vačej, pachodzić film, što z kiniematahrafičnaj rašučaściu i prazrystaściu pieranosić nas u miesca, niedasiahalnaje dla astatnich».

Pra što film «Listy»?

Stužka Andreja Kuciły — heta hłybokaje i emacyjnaje zanureńnie ŭ sučasnyja biełaruskija realii praz asabistyja historyi, listy i śviedčańni ludziej, jakija prajšli praz represii, źniavoleńnie ci musili pakinuć svaju radzimu. Film pakazvaje stojkaść, čałaviečnaść i niazłomnaść biełarusaŭ, čyje hałasy imknucca zahłušyć, ale jakija praciahvajuć hučać na ŭvieś śviet.

U centry siužeta — mazaika ź losaŭ piaci čałaviek, siarod jakich i historyja zahinułaha ŭ kałonii Vitolda Ašurka, a taksama maładoj mastački i studentki, čyje turemnyja malunki i dziońniki lahli ŭ asnovu animacyjnych frahmientaŭ filma.

Kino, nad jakim biełaruski dakumientalist pracavaŭ bolš za piać hadoŭ, stvorana ŭ mižnarodnaj kaapieracyi: u jaho vytvorčaści ŭdzielničali niamieckaja kampanija Inselfilm Produktion, polski fond Doc Edu Foundation i litoŭskaja kinakampanija Moonmakers.

Nahadajem, što raniej stała viadoma, što stužka «Listy» taksama ŭvajšła ŭ šort-list Jeŭrapiejskaj kinapremii (European Film Awards 2027) — Jeŭrapiejskaha «Oskara» — i pretenduje na pieramohu ŭ katehoryi «Najlepšy dakumientalny film». Suśvietnaja premjera filma biełaruskaha režysiora adbyłasia na 81‑m Vieniecyjanskim kinafiestyvali ŭ vieraśni.

Što takoje DOK Leipzig

DOK Leipzig (Mižnarodny fiestyval dakumientalnaha i animacyjnaha kino ŭ Lejpcyhu) — adzin z najstarejšych u śviecie i najbolš prestyžnych fiestyvalaŭ dakumientalistyki, zasnavany jašče ŭ 1955 hodzie. Fiestyval źjaŭlajecca važnaj suśvietnaj placoŭkaj dla kiniematahrafistaŭ, jakija padymajuć vostryja sacyjalnyja, palityčnyja i čałaviečyja temy.

Andrej Kuciła naradziŭsia ŭ Baranavičach, skončyŭ fakultet žurnalistyki BDU, a taksama vučyŭsia ŭ Biełaruskaj dziaržaŭnaj akademii mastactva (kurs Alaksandra Karpava). Jahonyja stužki zavajavali viadomaść na jeŭrapiejskaj scenie dziakujučy hłybokamu humanizmu i ŭvazie da čałaviečych losaŭ.

Siarod viadomych rabot biełaruskaha filmmiejkiera — dakumientalnyja filmy «Stryptyz i vajna», «Summa» (jaki zdabyŭ uznaharodu za najlepšy siaredniemietražny dakumientalny film u Amsterdamie), a taksama «Kali kvietki nie maŭčać» (When Flowers Are Not Silent, 2021), pryśviečany biełaruskim revalucyjnym padziejam i pratestam žančyn, jaki taksama paśpiachova demanstravaŭsia na mižnarodnych placoŭkach. Taksama ŭ režysiorskim darobku aŭtara: «Dniuka», «Hości», «Abdymkaŭ treba mnie tvaich», «Car hary», «Śviataja vada» (2023) dy inšyja kinatvory.

• 3
• 0
• 0
• 0
• 0
• 0
• 0
• 0