Jury Barančyk: Niaklajevu para vyznačacca

Hutarka z palitołaham, redaktaram sajta imperiya.by Juryjem Barančykam.

«Naša Niva»: Ci jość imaviernaść taho, što Rasija nie padtrymaje na vybarach Łukašenku?

Jury Barančyk: U pryncypie, jość. Asabliva, kali ŭličyć apošnija padziei ŭ miždziaržaŭnych adnosinach. Maju na ŭvazie hazavy kanflikt, padpisańnie Mytnaha sajuzu.

«NN»: Što kankretna Maskvie nie padabajecca ŭ pavodzinach Łukašenki?

JUB: Tut ceły šerah momantaŭ. Admaŭleńnie padtrymać Rasiju ŭ asiecinskim kanflikcie, zaihryvańnie z Zachadam, nievykanańnie dvuchbakovych abaviazkaŭ. Pry hetym Łukašenka nie spyniajecca vybivać z Rasii datacyi. Zdajecca, što takaja niesumlennaść i aburyła rasijskaje kiraŭnictva.

«NN»: A kirhizski varyjant padziej u Biełarusi realny?

JUB: Ja nie dumaju. Asabista ja praciŭnik takoha raźvićcia padziej. Čamu ŭ Kyrhyzstanie tak skłałasia? Bo niadaŭna prajšli prezidenckija vybary, i čakać nastupnych jašče try hady ludzi nie mahli, hledziačy na tyja biasčynstvy, što vytvarali Kurmanbiek Bakijeŭ sa svaim synam. Tamu i ŭźnikli biesparadki. Dla nas bolš prymalny varyjant svabodnych i adkrytych vybaraŭ, kab usie kandydaty atrymali roŭnuju kolkaść efirnaha času, roŭnyja mahčymaści. I nie tak važna, chto pieramoža. Voś va Ukrainie na svabodnych vybarach pieramoh Juščanka z dapamohaj amierykancaŭ. Ciapier Juščanka syšoŭ, i ŭžo mała chto pomnić pra takoha prezidenta. Toje samaje pavinna paŭtarycca i ŭ nas.

«NN»: Ale na siońnia taki varyjant vyhladaje fantastyčnym.

JUB: Sapraŭdy, varyjant małavierahodny. Zrešty, heta zaležyć ad taho, u jakim stanie na vybary padyduć praciŭniki dziejsnaj ułady. Voś była situacyja ŭ Sierbii. Apazicyja išła na vybary z kankretnymi faktami falsifikacyj. U nas apazicyja pakul dosyć iniertnaja. Zrešty, pazicyja ZŠA i Jeŭrasajuzu zaŭsiody pa biełaruskim pytańni była jasnaj, kali da ich dałučycca Rasija, heta budzie inšaja sprava. Kali navat bližejšyja partniory nie pryznajuć jaje lehitymnaści.

«NN»: U adnym z apošnich artykułaŭ Vy pisali, što Maskva jašče daje Łukašenku šaniec syści pryhoža.

JUB: Heta było b najbolš adekvatna i prymalna jak dla samoha kiraŭnictva, tak i dla biełaruskaha naroda. Treba łahična i racyjanalna rastłumačyć hetaje rašeńnie. Možna ž nie prosta syści, a zabiaśpiečyć varyjant ź pierajemnikam. Važna taksama zachavać stabilnaść u pierachodny pieryjad.

«NN»: A niekaha z apazicyjanieraŭ Maskva moža padtrymać?

JUB: Nu, jak na moj pohlad, to apazicyja zaŭsiody była prazachodniaj. To niachaj jaje padtrymlivaje Zachad, ale jon nie moža. Što datyčyć Sańnikava, to jon zaŭsiody pazicyjanavaŭ siabie jak palityk prazachodni. Sproba syhrać na rasijskaj karcie chutčej zaklučajucca ŭ tym, što jon maje adnosiny z častkaj rasijskich apazicyjanieraŭ. Uładzimir Niaklajeŭ pakul nie maje jasnaj pazicyi ŭ hetym pytańni. Da vybaraŭ zastałosia nie tak šmat času, para by ŭžo i vyznačycca. Niaklajeva tolki Milinkievič nazyvaje prarasijskim. Siabie ž Milinkievič nazyvaje prabiełaruskim, pry hetym žyvie za amierykanskija hrošy.

«NN»: Infarmacyjnaja ataka ŭ rasijskich ŚMI na biełaruskaje kiraŭnictva budzie praciahvacca?

JUB: Budzie zaležyć ad pavodzin Minska. Kali źjaviacca novyja ahresiŭnyja vypady ŭ bok Maskvy, to nie vyklučana, što budzie praciah tych pieradač, što pakazvalisia na NTV i «Rośsii». Prosta treba pavodzić siabie ŭ ramkach prystojnaści i nie vynosić na ludzi tyja supiarečnaści, što nakapilisia pamiž dvuma prezidentami.

***

Jury Barančyk — kandydat fiłasofskich navuk, były dyrektar Infarmacyjna-analityčnaha centra NDI Teoryi i praktyki dziaržaŭnaha kiravańnia Akademii kiravańnia pry prezidencie. Kiraŭnik internet-prajekta imperiya.by.

• 0
• 0
• 0
• 0
• 0
• 0
• 0
• 0