Parad śpiectechniki MNS projdzie 25 lipienia ŭ Minsku

Śviatočnyja mierapryjemstvy z nahody Dnia pažarnaj słužby Biełarusi startujuć 24 lipienia. U hety dzień u Minsku kala Nacyjanalnaj biblijateki 40 maładych supracoŭnikaŭ Ministerstva pa nadzvyčajnych situacyjach va ŭračystaj abstanoŭcy pryniasuć prysiahu.

Na nastupny dzień u stalicy adbudziecca parad śpiecyjalnaj techniki orhanaŭ i padraździaleńniaŭ pa nadzvyčajnych situacyjach. Pa hałoŭnym praśpiekcie ad budynka cyrka i da płoščy Pieramohi projduć kałony śpiecyjalnaj techniki. Možna budzie ŭbačyć, naprykład, aŭtamabili słužby chimičnaj i radyjacyjnaj abarony ciažkaha kłasa, mabilny punkt kiravańnia, ustanoŭku «Kobra», jakaja prymianiajecca dla tušeńnia pažaraŭ u zakrytych reziervuarach, rabatyzavany kompleks dla raboty z krynicami ianizujučaha vypramianieńnia, a taksama aŭtamabili chutkaha reahavańnia, aŭtacysterny i aŭtaleśvicy, kalenčatyja padjomniki. Upieršyniu na ahlad šyrokaj publicy pradstaviać try novyja matacykły MNS, adzin ź jakich pryznačany dla raboty na pažarach, druhi — dla vyratavańnia ludziej pry DTZ, a treci asnaščany miedycynskim abstalavańniem.

Akramia sučasnaj techniki, u čas parada buduć prademanstravany staradaŭnija ŭzory srodkaŭ pažaratušeńnia — konna-bočačny chod z koniami i pompava-liniejny chod.

Adrazu paśla zakančeńnia parada ŭsia technika raźmieścicca ŭzdoŭž nabiarežnaj raki Śvisłač u parku imia Horkaha. Jak zapeŭnili ŭ MNS, luby žadajučy zmoža pablizu aznajomicca sa składanymi miechanizmami vyratavalnych mašyn. Bolš taho, haściam śviata prapanujuć na sabie źviedać składanaści raboty pažarnych: naprykład, prajści ŭ zaścierahalnym kaściumie va ŭmovach nulavoj bačnaści ŭ zadymlenym pamiaškańni abo papaści pa mišeni sa stvała vysokaha cisku. Va ŭnikalnym reanimabili luby žadajučy zmoža asvoić navyki akazańnia pieršaj miedycynskaj dapamohi na śpiecyjalnym maniekienie.

Zabaŭlalnaja prahrama ŭ parku abiacaje być jarkaj i nasyčanaj.

Na čatyroch kancertnych placoŭkach vystupiać zorki biełaruskaj estrady, duchavyja arkiestry Kamandna-inžyniernaha instytuta, abłasnych i Minskaha haradskoha upraŭleńniaŭ MNS. Darosłych i dziaciej čakajuć cikavyja konkursy i spabornictvy, siarod jakich «Skaładrom» i «Piramida sa skryń». Tradycyjna vialikuju cikavaść u hledačoŭ vyklikajuć vystupleńni kinołahaŭ. Na hety raz jany prademanstrujuć mahčymaści sabak pa vyratavańniu ludziej na vadzie i pa pošuku ludziej.

U MNS adznačyli, što Dzień pažarnaj słužby nielha ličyć vyklučna prafiesijnym śviatam ratavalnikaŭ, pakolki pieršapačatkova pažarnaja achova mieła charaktar pavinnaści, uskładzienaj pa čarzie abo pa hramadskich prysudach, u vyhladzie spahnańnia za niepłaciažy haradskich pavinnaściej. Da baraćby z ahniom u abaviazkovym paradku pryciahvałasia praktyčna ŭsio nasielnictva.

Historyja prafiesijnaj pažarnaj słužby ŭ Biełarusi pačynajecca z 25 lipienia 1853 hoda, kali Minskaje hubiernskaje praŭleńnie i Minskaja haradskaja duma, razhledzieŭšy pytańnie «Ab stvareńni pažarnaj čaści ŭ h. Minsku», zaćvierdzili kaštarys raschodaŭ na ŭtrymańnie pažarnaj čaści ŭ składzie 51 čałavieka. U hety ž čas byli arhanizavany pažarnyja čaści ŭ Viciebsku, Mahilovie i inšych biełaruskich haradach.

• 0
• 0
• 0
• 0
• 0
• 0
• 0
• 0