Machlarka ašukała piaciarych minčan bolš čym na 35 miljonaŭ rubloŭ
Supracoŭniki adździeła pa baraćbie z ekanamičnymi złačynstvami Zavodskaha RUUS Minska zatrymali 30-hadovuju žycharku stalicy, jakaja padazrajecca ŭ machlarskich dziejańniach, učynienych u dačynieńni jak minimum da piaci hramadzian.
Jak paviedamili ŭ adździele infarmacyi i hramadskich suviaziaŭ HUUS Minharvykankama, reśpiektabielnaja žančyna nazyvałasia redkim imiem Jasia i paśpiachova ŭvachodziła ŭ davier da nieznajomych ludziej. Dziela svajho imidžu dziełavoj łedzi machlarka fiktyŭna vyjšła zamuž za 22-hadovaha minčanina
nibyta na dva tydni, paabiacaŭšy jamu za pasłuhu ŭznaharodžańnie, adnak abiacańnie hetaje nie vykanała. "Šlub" doŭžycca ŭžo kala hoda.
Pieršaj prykładna miesiac tamu z zajavaj u milicyju źviarnułasia 24-hadovaja minčanka, jakaja addała Jasi za sadziejańnie ŭ atrymańni vadzicielskaha paśviedčańnia i tannuju "haračuju" pucioŭku 3.750 dołaraŭ, ale nie dačakałasia vykanańnia abaviazacielstvaŭ.
Jašče adnamu staličnamu žycharu, taksistu, machlarka prapanavała dapamohu ŭ afarmleńni rabočaj vizy ŭ Polšču i ŭziała za pasłuhi 1,2 miljona rubloŭ.
Uvajšoŭšy ŭ davier da školnaha vykładčyka, žančyna prapanavała pačać ahulny vyhadny biźnies i stać saŭdzielnikam firmy. Paabiacaŭšy nadzvyčajny prybytak, jana ŭhavaryła mužčynu pieradać joj bolš za 6 miljonaŭ rubloŭ dla farmiravańnia statutnaha fondu sumiesnaha pradpryjemstva.
Śledčym adździełam papiaredniaha rasśledavańnia Zavodskaha RUUS u dačynieńni da zatrymanaj raspačata sprava pa č. 3 art. 209 KK (machlarstva). Pa materyjałach spravy ciapier prachodziać piaciora paciarpiełych, a ahulnaja suma vykradzienaha składaje bolš za 35 miljonaŭ rubloŭ. Adnak, jak miarkujuć milicyjaniery, śpis asob, paciarpiełych ad dziejańniaŭ žančyny, jakaja nazyvałasia imiem Jasia, papoŭnicca.
Ciapier čytajuć
Chłopca, jaki ŭ Lebiedzievaj chajaŭ Jeŭropu, asudzili za ŭdzieł u pratestach i ŭchileńnie ad vojska2
Kamientary