Vučysia nie chaču

Na niekatoryja śpiecyjalnaści staličnych VNU konkurs adsutničaŭ.

Niahledziačy na mienšuju kolkaść vypusknikoŭ škoł, kolkaść miescaŭ u vyšejšych navučalnych ustanovach sioleta pavialičyli amal na piać tysiač. Praŭda, bolšaść dadatkovych miescaŭ — płatnyja. A jakaść adukacyi płatnikaŭ takaja, što na ŭzrovień viedaŭ uvaha nie źviartajecca.

Ekanomika i prava pa-raniejšamu ŭ modzie

Prachadnyja bały i konkursy ŭ VNU jaskrava śviedčać ab modach. Čym bały vyšejšyja, tym prestyžniejšaja śpiecyjalnaść. Tradycyjna vysokija prachadnyja bały zachoŭvajucca na śpiecyjalnaści, źviazanyja z ekanomikaj i pravam.

Nastaŭnikaŭ rychtujuć z troječnikaŭ

Z druhoha kanca rejtynhu — najmienš prestyžnyja śpiecyjalnaści. Siarod ich — piedahoh. Sioleta prablemy ŭźnikli ŭ raźmieščanym u Minsku Biełaruskim dziaržaŭnym pieduniviersitecie imia Maksima Tanka. Na šerah śpiecyjalnaściaŭ dzionnaj biudžetnaj formy navučańnia adsutničaŭ konkurs. Vyjaviŭsia niedachop achvotnych stać nastaŭnikami matematyki, fiziki i infarmatyki. Dastatkova było atrymać 20 bałaŭ pa kožnym pradmiecie CT, kab stać studentam! Budučymi nastaŭnikami mahli stać navat realnyja dvoječniki.

Zatoje prachadnyja bały na śpiecyjalnaść «Łahapiedyja. Śpiecyjalnaja psichałohija» byŭ roŭny 311. Daloka nie kožnaja VNU sioleta pierastupiła miažu ŭ try sotni.

Niežadańnie vykładać u škołach paśla atrymańnia dypłoma strymała abituryjentaŭ i ad pastupleńnia na fiłfak BDU. Na asobnyja jaho śpiecyjalnaści adsutničali prachadnyja bały — zaličyli ŭsich, chto vytrymaŭ ispyty.

Vučysia nie chaču

U hetym hodzie nie było ažyjatažu na płatnuju formu navučańnia. A ŭ niekatorych VNU konkurs prosta adsutničaŭ. U Technałahičnym univiersitecie, kab stać studentam dzionnaha adździaleńnia pa śpiecyjalnaści «Bijaekałohija», dastatkova było nabrać 74 bały. U BNTU (byłym Palitechu) na «Technałohiju i abstalavańnie tarfianoj vytvorčaści» — 79, a na śpiecyjalnaść «Materyjałaznaŭstva ŭ mašynabudaŭnictvie» nie było padadziena nivodnaj zajavy.

Jašče horšaja situacyja ŭ Pieduniviersitecie, dzie na bolšaść płatnych śpiecyjalnaściaŭ prachadnyja bały adsutničali.

Achvotnych vučycca zavočna taksama było niedastatkova.

Usiaho ź mierkavanych 103 tysiač studenckich miescaŭ sioleta zaniatyja tolki kala sta. Ale ŭžo ciapier zrazumieła, što patrebnaj kolkaści studentaŭ nie dabrali. Dy i płanka z patrabavańniami dla ich viedaŭ u cełym paniziłasia.

• 0
• 0
• 0
• 0
• 0
• 0