Prahułka ź niabožčykam

Prezydenty Rasiei i Kazachstanu vyrašyli adkłaści – usiaho na miesiac – zaplanavany na kastryčnik u Miensku samit SND. Rašeńnie Ŭładzimiera Pucina i Nursułtana Nazarbajeva ŭžo vyklikała hnieŭ Alaksandra Łukašenki, niezadavalnieńnie ŭkrainskaha MZS – i heta, vierahodna, jašče nie kaniec ździŭlena-aburanaha reahavańnia: pakul što ŭ historyi SND jašče nie było vypadku, kab dva prezydenty tak prosta vyrašali za astatnich, što im rabić, tak lohka advažvalisia na pierakrojvańnie čužych hrafikaŭ. Ale, ź inšaha boku, Pucin i Nazarbajeŭ zrabili absalutna słušna.

Kali b samit SND adbyŭsia ŭ čas, naziralniki zvykła kanstatavali b, što arhanizacyja nie funkcyjanuje, i lideram krainaŭ, što ŭvachodziać u jaje, niama čaho sustrakacca. A tak – stolki hałasu! Dla taho, kab dakazać astatnim, što niabožčyk chutčej žyvy, čymsia miortvy, treba pravałačy jaho pa dyplamatyčnych kalidorach.

Na postsavieckaj prastory, jak heta niaredka zdarajecca, pakul što nie zaŭvažyli, što sytuacyja vakoł SND źmianiłasia. Jašče niadaŭna arhanizacyju nazyvali prezydenckim klubam pa zacikaŭlenaściach i ličyli, što ŭvieś sens – u znosinach kiraŭnikoŭ dziaržaŭ. Zaraz ža stracili ŭvieś sens mienavita hetyja znosiny. U ramkach SND padpisanyja tysiačy dakumentaŭ, sotni ź ich dziejničajuć, adnak havorka idzie mienavita pra mechanizmy, prydumanyja dla taho, kab paśla krachu Savieckaha Sajuzu dach vialikaha gmachu nie abrynuŭsia na hałovy tych, chto zastaŭsia žyć u roznych kvaterach.

Padtrymańnie pracazdolnaści prydumanych mechanizmaŭ – da taho momantu, kali zapracujuć novyja – zadačy čynoŭnikaŭ, a nie prezydentaŭ. Prezydenty jakraz zaniatyja pošukam novych mechanizmaŭ – i ich namiery dy intaresy nie zaŭždy supadajuć. Pra što budzie havaryć na samicie SND Uładzimier Pucin ź Michaiłam Saakašvili, i pytacca niama čaho. Ale i z haspadarom samitu Alaksandram Łukašenkam rasiejskaha prezydenta čakaje nialohki dyjaloh. Nazvać biaschmarnymi pieramovy ź Viktaram Juščankam, Uładzimieram Varoninym, Ilchamam Alijevym taksama nielha. Mižsobku prezydenty taksama daŭno razyšlisia ŭ mierkavańniach i mahčymaściach. I kali možna raźličvać na ŭzajemarazumieńnie ŭ dvuchbakovym dyjalohu ci ŭ ramkach niejkich arhanizacyj, stvoranych na pareštkach SND, to šmatbakovyja pieramovy – čystaja dekaracyja ŭsio bolšaha nierazumieńnia i razdražnieńnia.

Koliś prezydentam krain SND było cikava sabracca razam prosta tamu, što jany byli ludźmi adnaho koła, byłymi členami palitbiuro, kadravymi partyjnymi rabotnikami, jakija havaryli na adnoj palityčnaj movie. Navat Alaksandar Łukašenka, jaki kiravaŭ usiaho saŭhasam, a nie CK respublikanskaj kampartyi, hladzieŭsia paryjaj u hetym kole. Navat Leanidu Kučmu, byłomu dyrektaru zavodu, daviałosia zavajoŭvać u im aŭtarytet. Siońnia čužyncaŭ tak šmat, što niemahčyma zrazumieć, chto svoj. Prezydentami byłych savieckich respublik pracujuć vielmi roznyja ludzi. A rešta veteranaŭ adkryta niedalublivajuć adno adnaho. Tak, moža być, lepš zusim nie sustrakacca takim teraryjumam?

• 0
• 0
• 0
• 0
• 0
• 0
• 0
• 0