Prahrama Łukašenki: za ŭzbahačeńnie i za svabodu

Aŭtarytarny kiraŭnik idzie na čaćviorty termin z abiacańniami rostu dabrabytu. «U krainie budzie ŭkaraniony pryncyp: dazvolena ŭsio, što naŭprost nie zabaroniena». Ni słova pra intehracyju z Rasijaj.

Dziaržaŭnyja haziety 27 listapada apublikavali pieradvybarnuju prahramu Alaksandra Łukašenki. Takim čynam, Łukašenka akazaŭsia pieršym, kamu jany dali svaje staronki.

Svaju prahramu dziejny prezident adkryvaje pieralikam taho, što «my zrabili»:

— pabudavali svaju dziaržavu, jakaja zajmaje pa ŭzroŭni raźvićcia čałaviečaha patencyjału 61-je miesca z amal 200 krain śvietu;

— abaranili krainu ad razrabavańnia;

— vystajali ŭ suśvietnym kryzisie;

— vyratavali viosku i zabiaśpiečyli charčovuju biaśpieku krainy;

— raźniavolili dziełavuju inicyjatyvu;

— zabiaśpiečyli poŭnuju zaniataść;

— pabudavali dziasiatki miljonaŭ kvadratnych mietraŭ žylla;

— rašuča prasunuli napierad miedycynu i adukacyju;

— stali žyć lepš.

U najbližejšyja piać hadoŭ «Biełaruś pavinna ŭvajści ŭ lik pieršych 50 krain śvietu z najvyšejšym indeksam raźvićcia čałaviečaha patencyjału», zaznačajecca ŭ prahramie.

Kab dasiahnuć hetaha, kandydat Łukašenka stavić pierad saboj nastupnyja asnoŭnyja mety:

— umacavać nacyju.

«Kožnaja siamja, dzie jość čaćviora i bolš dziaciej, za košt dziaržavy atrymaje kvateru.

Siemjam z tryma dziećmi buduć kampiensavanyja 75 pracentaŭ koštu žylla»;

— stać bahaciejšymi.

«Za košt rostu ekanomiki budzie zabiaśpiečany pastajanny rost zarabotnaj płaty, piensij, stypiendyj, ich poŭnaja i svoječasovaja vypłata»;

— uzmacnić sacyjalnuju abaronu.

«Kožnamu budzie harantavanaje pracoŭnaje miesca. Dziaržava dapamoža ŭsim, chto maje patrebu ŭ dapamozie»;

— zabiaśpiečyć suśvietny ŭzrovień miedycynskaha absłuhoŭvańnia.

«Usie palikliniki i balnicy ŭ krainie buduć poŭnaściu ŭkamplektavanyja śpiecyjalistami, čerhi adyduć u minułaje»;

— budavać 10 młn kvadratnych mietraŭ žylla štohod

. «Da kanca piacihodki na kožnaha žychara Biełarusi budzie prypadać nie mienš jak 28 kvadratnych mietraŭ žylla. Uzrovień dachodaŭ pavinien dazvalać siemjam nabyć ułasnaje žyllo ŭ siarednim na praciahu piaci hadoŭ»;

— umacavać nacyjanalnuju valutu.

«Buduć zabiaśpiečanyja stabilnaść kursu biełaruskaha rubla, absalutnaja zachavanaść pryvatnych układaŭ, dastupnaść bankaŭskaha kredytu»;

— stvaryć novaje abličča biełaruskaj ekanomiki.

«Na praciahu najbližejšych piaci hadoŭ u krainie buduć realizavanyja nie mienš jak 100 mahutnych inviestycyjnych prajektaŭ. Źjaviacca novyja haliny: kaśmičnaja, nana- i bijatechnałohii, alternatyŭnaja enierhietyka i inšyja. Sielskaja haspadarka stanie prybytkovym ahrabiźniesam. Ekspart charčavańnia budzie pavialičany bolš čym u dva razy — da 7 miljardaŭ dołaraŭ za hod»;

— dać poŭnuju svabodu inicyjatyvie.

«My piarojdziem ad ekanomiki dyrektyŭ da ekanomiki inicyjatyŭ. Budzie abaronienaje prava kiraŭnika na dziełavuju ryzyku. Pavysicca rola pradprymalnictva. Źnizim padatki. Radykalna sprościm spravazdačnaść i administracyjnyja pracedury. U krainie budzie ŭkaraniony pryncyp: dazvolena ŭsio, što prama nie zabaroniena»;

— ažyćciavić praryŭ u infarmatyzacyi.

«Infarmacyjnyja technałohii achopiać usie śfiery dziejnaści. U nas źjavicca paŭnacenny elektronny ŭrad. Usie bazavyja pasłuhi možna budzie ažyćciaŭlać praź internet. My pazbavim čałavieka ad chadžeńnia pa kabinietach, biurakratyzmu i ciahaniny. Internet pa jakaści i canie zraŭnujecca z raźvitymi krainami»;

— uzmacnić rolu maładoha pakaleńnia.

«Stvorym novyja stymuły dla realizacyi jaho inicyjatyŭ i karjernaha rostu. Umacujem moładździu kiraŭničy kadravy korpus dziaržaparatu i pradpryjemstvaŭ»;

— udaskanalić dziejnaść ułady.

«Harantavanaja adkrytaść dziaržaŭnych orhanaŭ dla ludziej i hramadzianskich inicyjatyŭ. Uzmocnicca rola hramadskich abjadnańniaŭ i miascovaha samakiravańnia ŭ žyćciadziejnaści dziaržavy. My budziem praciahvać biaźlitasnuju baraćbu z karupcyjaj i pryčynami, što jaje paradžajuć»;

— źbierahčy mir i zhodu ŭ hramadstvie.

«Biełaruś była i budzie dziaržavaj, dzie kamfortna i biaśpiečna žyć usim ludziam, niezaležna ad nacyjanalnaści, pohladaŭ i relihii. My nie dapuścim razhułu kryminału, sacyjalnych razładaŭ i kanfliktaŭ».

«My abaviazkova ŭsio heta zrobim. U nas z vami jość vopyt. Krainie nie patrebnyja ekśpierymienty», — upeŭnieny Łukašenka.

Napiaredadni vybaraŭ jon prosić hramadzian «tolki ab adnym: nie miarkujcie pa słovach — miarkujcie pa spravach!»

Ni słova ŭ prahramie nie havorycca pra padtrymku biełaruskaj movy i nacyjanalnaj kultury.

U cełym, prahrama ŭ aŭtarytarnaha kiraŭnika takaja ž papulisckaja, jak i ŭ jahonych hałoŭnych apanientaŭ. Papulizm staje charakternaj rysaj palityčnaj kultury biełarusaŭ. U hetym sensie kraina mocna roźnicca ad jeŭrasajuzaŭskich i prypadabniajecca chutčej da nieraźvitych krain Azii i Łacinskaj Amieryki.

Punkty «čerhi adyduć u minułaje» i «budavać 10 młn kvadratnych mietraŭ žylla» nahadvajuć pra «da 2000 hoda kožnaj savieckaj siamji — asobnuju kvateru». Adnak u prahramie jość i realistyčnyja, jasna pastaŭlenyja zadačy: naprykład, stvareńnie elektronnaha ŭrada. Anałahična dziejničali paraŭnalnyja z našaj krainy, jak Estonija ci Słavaččyna. Jany, darečy, u vyniku demakratyčnych i rynkavych reformaŭ, vyjšli i ŭ top-50 krainaŭ śvietu, pra što havorycca i ŭ prahramie Alaksandra Łukašenki.

Źviartaje ŭvahu adsutnaść zhadak pra intehracyju z Rasijaj,

jakija raniej byli ahulnym miescam łukašenkaŭskaj rytoryki. U toj ža čas abiacajecca dalejšaja «pabudova niezaležnaj admietnaj Biełarusi», jakaja nie budzie «niečym prydatkam».

• 0
• 0
• 0
• 0
• 0
• 0
• 0
• 0