Mikałaj Aŭtuchovič — u śpisie najviadomiejšych palitviaźniaŭ śvietu

U śpisie 15 najbolš viadomych palitviaźniaŭ śvietu Freedom House pryvodzić imia biełarusa Mikałaja Aŭtuchoviča.

Śviet maje šmat Lu Siao Bo. Da Dnia pravoŭ čałavieka i dnia zavočnaha ŭručeńnia Nobeleŭskaj premii miru źniavolenamu kitajskamu dysidentu

na sajcie foreignpolicy.com źjaviŭsia śpis najbolš viadomych palitźniavolenych śvietu. Śpis składzieny pravaabarončaj arhanizacyjaj Freedom House.

Lu Siao Bo, havorycca ŭ artykule, adzin z sotniaŭ prykładaŭ nievinavatych mužčynaŭ i žančynaŭ , jakija źniavolenyja pa ŭsim śviecie za ich palityčnyja pohlady i adstojvańnie pravoŭ čałavieka.

U śpis pad nazvaj “Płanieta Hułah” uklučanyja 15 krainaŭ: Bachrejn, Biełaruś, Birma, Vjetnam, Hambija, Iran, Kazachstan, Kyrhyzstan, Kitaj, Kuba, Paŭnočnaja Kareja, Rasija, Ruanda, Siryja, Uźbiekistan.

Najbolš viadomymi palitźniavolenymi Rasii nazyvajucca Michaił Chadarkoŭski i Płaton Lebiedzieŭ. U Kazachstanie adbyvaje svoj termin Jaŭhien Žoŭcis, były kiraŭnik mižnarodnaha biuro pravoŭ čałavieka, asudžany za nibyta ŭčynienuju im darožnuju avaryju sa śmiarotnym vynikam. U Iranie za antydziaržaŭnuju prapahandu była asudžanaja advakatka Nasryn Satoŭdech, jakaja abaraniała Nobeleŭskuju łaŭreatku miru Šyryn Ebadzi.

U persanalnym raździele, pryśviečanym Mikałaju Aŭtuchoviču, adznačajecca, što ŭpieršyniu hety paśpiachovy pradprymalnik i demakratyčny aktyvist byŭ aryštavany ŭ kastryčniku 2005 hoda. Abvinavaciŭšy ŭ niavypłacie padatkaŭ, jaho asudzili na try z pałovaj hady. Jon byŭ adnym z šaści palitźniavolenych, vyzvalenych u vyniku žorstkich sankcyj ZŠA i ES, adnak užo ŭ 2009-m jaho znoŭ asudzili, hetym razam na piać hadoŭ nibyta za zachoŭvańni zbroi. Zdaroŭje Aŭtuchoviča surjozna padarvanaje sieryjaj doŭhich haładovak pratestu i niedachopam nieabchodnaj miedycynskaj dapamohi. Na dumku Freedom House, na samoj spravie Aŭtuchovič zaklikaŭ da demakratyčnych źmienaŭ u Biełarusi i natchniaŭ ziemlakoŭ nie bajacca vykazvacca suprać režymu Łukašenki.

Adnym ź niamnohich jašče isnujučych stalinskich režymaŭ na płaniecie nazyvajecca Paŭnočnaja Kareja. Pakolki ŭ krainie nie isnuje nivodnaj pravaabarončaj arhanizacyi, Freedom House uklučyła ŭ śpis kalektyŭnaha nieviadomaha palitviaźnia.

Pavodle prybliznych padlikaŭ, u krainie kala 200 tysiač ludziej źniavolenyja za palityčnyja pohlady ŭ šaści vialikich łahierach.

Pavodle śviedčańniaŭ tych, kamu ŭdałosia vyrvacca z krainy, staŭleńnie da viaźniaŭ paŭnočnakarejskaha hułahu možna nazvać złačynstvam suprać čałaviečnaści. Śviedki havorać pra sistematyčnyja katavańni, publičnyja pakarańni, rabskuju pracu i prymusovyja aborty.

Bolš za toje, režym praktykuje abvinavačvańni ŭ “saŭdziele”, pavodle jakich siemji palitźniavolenych, uklučajučy dziaciej, karajucca až da treciaha kalena.

• 0
• 0
• 0
• 0
• 0
• 0
• 0
• 0