Pieratrusy ŭ Miadźviedzievaj (Babrujsk), Sałaŭjova (Mahiloŭ)

Na kvatery ŭ babrujskaj aktyvistki «Havary praŭdu» Aleny Miadźviedzievaj adbyŭsia pieratrus. Pravodziŭsia jon u miežach raśśledavańnia kryminalnaj spravy ab masavych biesparadkach 19-20 śniežnia ŭ Miensku.

Jak paviedamiła aktyvistka, pieratrus pačaŭsia a pałovie na dziaviatuju. Jaho pravodzili čaćviora supracoŭnikaŭ u cyvilnym. Paniatych pryvieźli z saboju. Pieratrus doŭžyŭsia kala dźviuch

hadzinaŭ:

Miadźviedzieva: «Zabrali šasnaccać blankaŭ paśviedčańniaŭ inicyjatyŭnaj hrupy, sšytki z zapisami, niekalki dyskaŭ. Zabrali taksama knihu Karbaleviča „Alaksandar Łukašenka. Palityčny partret“. Pavodzili siabie karektna».

Alena Miadźviedzieva była kaardynatarkaj babrujskaha štaba kandydata ŭ prezydenty Uładzimiera Niaklajeva. Dva razy jaje vyklikali na dopyt u KDB usio pa toj ža kryminalnaj spravie, jakaja stała nahodaj dla pieratrusu.

* * *

Na kvatery ŭ staršyni abłasnoj arhanizacyi partyi BNF Źmitra Sałaŭjova adbyŭsia pieratrus. Haspadara nie było doma. U kvatery znachodzicca jaho žonka j małaletniaja dačka.

Pavodle žonki, Nadziei Sałaŭjovaj, ludzi ŭ cyvilnym spačatku zapatrabavali adčynić dźviery, a potym zajavili, što buduć pravodzić pieratrus. Jon pačaŭsia ab adzinaccataj hadzinie i doŭžyŭsia paŭtary hadziny.

Sałaŭjova: «Zabrali dva bieł-čyrvona-biełyja ściahi, systemny blok kamputara, fotakameru z kasetaj. Na joj zapis padziejaŭ na Płoščy. Adnu fłeš-kartku. Pierahledzieli ŭsie šafy j papki. Kopii pastanovy mnie nie pakinuli. Skazali, što nia majuć prava. Prapanavali tolki aznajomicca. Sankcyja na pieratrus vydadzienaja minskim prakuroram Kulikom 13 studzienia. U pastanovie napisana, što „Źmicier Sałaŭjoŭ braŭ udzieł u niesankcyjanavanym mierapryjemstvie „Płošča-2010“. Zdymaŭ padziei na videa. Pa miescy žycharstva mohuć znachodzicca videamateryjały padziejaŭ, a taksama inšyja pradmiety j dakumenty, jakija adnosiacca da arhanizacyi i praviadzieńnia masavych mierapryjemstvaŭ“. Padpisaŭ pastanovu śledčy ŭpravy KDB pa Mahiloŭskaj vobłaści major Batvinkoŭ. Pieratrus pravodzili śledčyja KDB Aleh Machunoŭ i Anton Romski».

Pavodle spadaryni Sałaŭjovaj, dvaich paniatych supracoŭniki KDB pryvieźli z saboju.

Źmicier Sałaŭjoŭ pa spravach znachodzicca ŭ Miensku. 12 studzienia jaho vyklikali ŭ KDB i vynieśli papiaredžańnie za arhanizacyju letaś niesankcyjanavanych mierapryjemstvaŭ.

• 0
• 0
• 0
• 0
• 0
• 0
• 0
• 0