Dvum vysokapastaŭlenym čynoŭnikam raniejšaha ŭrada — byłomu premjeru Siarhieju Sidorskamu i jaho namieśniku Ivanu Bambizu, jakim, u adroźnieńnie ad byłohavice-prem jera Andreja Kabiakova, nie znajšłosia miesca ŭ prezidenckaj administracyi, krynicy «Zaŭtra tvajoj krainy» pradkazvajuć dypłamatyčnuju karjeru.
Što da Siarhieja Sidorskaha, jaki ŭziaŭ paŭhoda, kab adpačyć ad pracy na premjerskaj pasadzie, to jaho «svatajuć» u pasolstva Biełarusi ŭ Rasii. Paśla pierajezdu ŭ Minsk ź Piekina Anatola Tozika vakantnaj zastałasia dypłamatyčnaja pasada ŭ Kitai. Jašče varyjant — pasolstva ŭ PAR (čutki ab tym, što tudy adpraviać Ivana Bambizu, chadzili i raniej), Vjetnamie i ŭ šerahu inšych krain.
Bolšaść kiraŭnikoŭ dypłamatyčnych misij Biełarusi za miažoj uznačalvajuć prafiesijnyja dypłamaty ci čynoŭniki, jakija peŭny čas słužyli ŭ Ministerstvie zamiežnych spravaŭ, jak, naprykład ciapierašni pasoł Biełarusi ŭ Vialikabrytanii Alaksandr Michnievič. Da taho, jak stać namieśnikam ministra zamiežnych spravaŭ u 2000 hodzie, jon doŭhi čas byŭ adnym z kiraŭnikoŭ kancerna «Biellehpram».
U šerahu krain kiraŭnikami biełaruskich dypłamatyčnych misij źjaŭlajucca byłyja vysokapastaŭlenyja čynoŭniki ŭrada, administracyi prezidenta i inšych orhanaŭ dziaržaŭnaj ułady. Siarod takich pradstaŭnikoŭ biełaruskaha dypłamatyčnaha korpusa — pasoł Biełarusi ŭ Rasii Vasil Dałhaloŭ, jaki da svajho pieravodu ŭ Maskvu pabyvaŭ praktyčna va ŭsich kiroŭnych orhanach — Administracyi prezidenta, uradzie, kiravaŭ Bresckaj vobłaściu.
Pasłom Biełarusi ŭ Francyi źjaŭlajecca były kiraŭnik Dziaržpamiežkamiteta Alaksandr Paŭłoŭski. Biełaruski pasoł u Litvie Uładzimir Dražyn doŭhi čas pracavaŭ u Minskim abłvykankamie i va ŭradzie. Misija ŭ Vieniesuele davieranaja byłomu hiendyrektaru «BiełaŭtaMAZ» i namieśniku ministra pramysłovaści Valancinu Hurynoviču, u Armieniju pajechaŭ hienierał KDB Ściapan Sucharenka. Va Uźbiekistanie i Turkmienistanie stali pasłami taksama dosyć upłyvovyja ŭ svoj čas čynoŭniki — Ihar Sokał i Juryj Małumaŭ.
Kamientary