Uśled za Mienskam i abłasnymi centrami zaviadzionka pa-barbarsku źniščać pomniki staraśvieččyny zachoplivaje ŭsie biełaruskija harady j miastečki. Hetym razam smutnaja viestka pryjšła ź Lachavičaŭ.
U hetym rajcentry na Bieraściejščynie byŭ zrujnavany ansambl centralnaje płoščy. Jaje kampazycyjnym jadrom byli dźvie dźviuchpaviarchovyja kamianicy kanca XIX st. Ich upryhožvali j unikalnyja staraśvieckija kavanyja hanki, jakich u Biełarusi ŭžo vobmal. Niama ŭžo i hetych, lachavickich. Asablivaje charastvo hetym damam nadavali kryžovyja sklapieńni, arkavyja vyhby vakon. Niekali hałoŭny budynak viančaŭ i fihurny vyhinasty franton. Jašče ŭletku ŭ hetych salidnych staradaŭnich muravankach mieściŭsia tuzin dziaržaŭnych ustanovaŭ i redakcyja hazety “Lachavicki vieśnik”. Rajadździeł kultury, miž inšym, taksama. Peŭna ich čakaje navasielle. A ŭ Lachavičach pomnikaŭ užo bolš nia budzie. Peŭna lohika ŭ ciapierašniaha režymu, dy ichnych najmitaŭ ad kultury, usio ž jość: źniščyć, vykarčavać usio, što było da Łukašenki. Bo za apošni tuzin hadoŭ u Biełarusi było zrujnavan hetulki pamiatak staraśvieččyny, što straty možna paraŭnać tolki chiba z apošniaj vajnoju. Kali ž i hetkaje lohiki niama, to ciapierašniaja epocha zastaniecca ŭ pamiaci naščadkaŭ časam biazhłuzdaha ničym nie apraŭdanaha rujnavańnia našaje nacyjanalnaje spadčyny.
Ciapier čytajuć
Łukašenka: Razmova z Makronam doŭžyłasia 1 hadzinu 40 chvilin. Projduć pieramovy z pradstaŭnikom Francyi1
Kamientary